«Týǵan elge taǵzym» ólketaný-zertteý ekspedısıasy – Zıatkerlik mektepterdiń patrıottyq tárbıe berýde mańyzy zor dástúrli joba. Jyl saıyn NIS-tiń úzdik oqýshylarynan quralǵan ekspedısıalyq top elimizdiń túrli aımaqtaryna saıahattap, sol jerdiń tabıǵatyn, mádenıetin, tarıhı eskertkishteri men arhıtektýralyq nysandarǵa zertteý júrgizip, ǵylymı jańalyqtar ashýǵa daǵdylanady.

Ekspedısıa aıasynda Shymkent qalasy hımıa-bıologıa baǵytyndaǵy Nazarbaev Zıatkerlik mektebiniń oqýshylary Túrkistan oblysy jáne Shymkent qalasy tarıhymen tanysýǵa arnalǵan tanymdyq ekskýrsıaǵa shyqty.

Jas ólketanýshylar ekspedısıa marshrýty boıynsha alǵashqy kúni ólkeniń kóne mádenı mekemeleriniń biri bolyp tabylatyn tarıhı-ólketaný murajaıy men «Ádet-ǵuryp, salt dástúrler» ortalyǵyna bardy. Murajaı jetekshileri tarıhı jádigerler jaıyndaǵy derektermen tereńirek bólisti.

Ary qaraı zıatkerler Asanbaı Asqarov atyndaǵy Shymkent memlekettik dendrologıalyq saıabaǵyn aralady.

Sondaı-aq Shymkent qalasyndaǵy óndiris orny – otandyq farmasevtıka salasynyń kóshbasshysy, 135 jyldyq tarıhy bar «Hımfarm» AQ farmasevtıkalyq kompanıasymen tanysty.

Aıta keteıik, joba aıasynda 1-5 qarasha aralyǵynda Shymkenttik zıatkerler Túrkistan oblysynyń tarıhı, mádenı jáne ınovasıalyq damýyn tereńirek zerttep, «Ǵaıyp eren qyryq shilten» mádenı ornyna, «Sıtadel» qalashyǵyna, «Bórte Mılka» JSHS sút zaýytyna, Qajymuqan Muńaıtpasuly atyndaǵy oblystyq sport murajaıyna, «Otyrar tóbe» qalashyǵy men Qoja Ahmet Iassaýı (Áziret Sultan) kesenesi, Shyǵys monshasy tarıhymen tanysady.