Qazir kóp jigitter materıaldyq jaǵdaıǵa baılanysty úılenýge asyqpaıdy degen pikir bar. Osy rette almatylyq qyz-kelinshekterden otbasy qurý úshin er adam aıyna qansha tabýy kerek ekenin surap kórdik.
Sońǵy ýaqytta er adamǵa qyz-kelinshekter, qoǵam tarapynan artylǵan áleýmettik júk aýyrlap ketkeni týraly áńgime jıi qozǵalatyn bolǵan. Ǵalymdar "er adam myqty bolýy kerek, kez kelgen máseleni sheshe alýy qajet, kóz jasyn kórsetpeýi kerek, tabysy joǵary bolýy kerek" degen sıaqty túsinik saldarynan er-azamattar udaıy moraldyq, psıhologıalyq qysym jaǵdaıynda júretinin aıtady.
Álemde, sonyń ishinde Qazaqstanda erler arasynda sýısıd jıi kezdesedi. Resmı statısıkaǵa saı, 2020 jyly el boıynsha 3515 adam ózine qol salǵan. Onyń 2765-i er-azamat. 2075 er adam bul áreketke alkogóldiń, esirtki zatynyń yqpalynsyz, ıaǵnı saý kúıinde barǵan.
Áleýmettanýshy, Ál-Farabı atyndaǵy Qazaq ulttyq ýnıversıtetiniń doktoranty Aıtýar Kospakov er azamattarǵa qoǵam tarapynan qoıylatyn talaptar áli de joǵary ekenin aıtsa, psıhologıa ǵylymdarynyń doktory Balabek Saqtaǵanov "qazirgi tańda qoǵamnyń ashyq bolý túsýi, demokratıalyq qundylyqtardyń enýi er adamdarǵa degen talapty tómendetti" deıdi.
– 30 jasqa deıin er adam mynany jasap úlgerýi kerek, qarjylyq jaǵdaıy turaqty, qandaıda bir jetistikke jetýi kerek degen sıaqty kózge kórinbeıtin qoǵamdyq pikir, talap adamdar, toptar arasynda áli de bar, – deıdi áleýmettanýshy.
Al Balabek Saqtaǵanov er adamnyń qoǵamda orny men otbasyn asyraýda, adamdarmen qarym-qatynasta belgili bir róli bolǵanymen, búginde januıadaǵy barlyq máseleni tek er adam sheshýi kerek degen túsinik, stereotıp joq degen pikirde.
– Qazirgi tańda áıel azamattar er adamdarmen birge jumys isteıdi, birdeı aqsha tabady. Budan bólek, qoǵam, qyz-kelinshekter tarapynan qansha júk artylǵanyna qaramastan, ony qabyldaý, seziný jáne sony oryndaý er adamnyń tulǵalyq ereksheligine baılanysty bolady. Eger er adam óziniń áleýmettik róline jaýapkershilikpen qarasa, onda qandaıda bir áleýmettik júkti, jaýapkershilikti sezinedi, – deıdi ol.
"Er bala ósip kele jatqan kezde "sen er-azamatsyń", "sen myqty bolýyń kerek", "álsizdigińdi kórsetpeýiń kerek" dep bala kezden sanasyna belgili bir stereotıpterdi qalyptastyrý áli de bary jasyryn emes" degen psıholog er adamnyń beınesi týraly túsinik adamdardyń sanasyndaǵy másele ekenin, búgingi ýaqytta "er adam mynandaı bolýy kerek", "mynany jasaýy kerek" degen túsinik qoǵam talabyna da, jańa trendterge de sáıkes kelmeıtinin aıtady.
Oqı otyryńyz:
Pikir qaldyrý