Depýtattar Jańaózendi damytýdyń keshendi josparyn usyndy

/image/2022/02/09/crop-6_7_430x765_7cc94522-84d1-46b7-87cf-678d50f71119_cx0_cy1_cw0_w1023_r1_s.jpg

Májilistegi "Nur Otan" partıasy fraksıasynyń Mańǵystaýdan saılanǵan depýtattary, "Jańa Qazaqstan" tobynyń músheleri Samat Musabaev pen Edil Jańbyrshın Jańaózen qalasyndaǵy áleýmettik-ekonomıkalyq máselelerdi sheshý boıynsha usynystar ázirlep, premer-mınıstr Álıhan Smaılovqa depýtattyq saýal joldady. Saýaldyń tolyq nusqasy tómende usynylyp otyr.

Saýal, alpys jyldaı tarıhy bar Jańaózen qalasynyń áleýmettik-ekonomıkalyq jaǵdaıyna qatysty. «Qara altyndy» ıgerý arqyly elimizdiń damýyna eleýli úles qosyp otyrǵan bul shahar, Qazaqstan demografıasynyń qarqyndy ósýine de oń yqpal etip otyr. 2001 jyly qala turǵyndarynyń sany 66 myń adam bolsa, 2022 jyldyń basynda 163 myńǵa jetti. Iaǵnı jıyrma jylda turǵyndar sany 100 myń adamǵa kóbeıgen. Biraq, halyq sany kóbeıgenimen, óndiris oshaqtary damymaı, turǵyndardy jumyspen qamtý, eń ózekti máselege aınaldy. Qazirgi tańda, Jańaózen qalasyndaǵy jumyssyzdar sany 8 myń adamnan asqan.

2011 jylǵy Jańaózen oqıǵasynan keıin Úkimet tarapynan munaıshylar qalasyn damytýǵa arnalǵan keshendi jospar qabyldandy. Jospar aıasynda qyrýar qarjy bólinip, qaladaǵy úılerdiń syrty jeńil-jelpi árlenip, ár jerden ınjınerlik jeliler aýystyrylyp, kóshede abattandyrý jumystary júrgizildi. Biraq, bul sharalar túbegeıli Jańaózen qalasyndaǵy qordalanyp qalǵan suraqtardy sheshken joq. Al, Mańǵystaýda «QazMunaıGaz» AQ qaraıtyn munaı-gaz kompanıalaryna jumysqa alýǵa qatysty moratorıı jáne jumysshylardy 5/50 baǵdarlamasymen jumystan shyǵarý jalǵyz Jańaózen qalasynda emes, búkil oblys deńgeıinde áleýmettik jaǵdaıdy ýshyqtyryp jiberdi.

2019 jyly Úkimet «Atameken» Ulttyq kásipkerlik palatasymen birlesip «Ózenmunaıgaz» aksıonerlik qoǵamnyń syrttan ımporttalatyn taýarlar, jumystar jáne qyzmetterdi Jańaózen qalasynda oqshaýlaý boıynsha jumystardy bastaǵan. Negizgi maqsaty jumys nysandaryn Jańaózen qalasynda salý jáne 100% jańaózendikterdi jumysqa alý bolatyn. Alaıda, bul jobalar «Ózenmunaıgaz» ben Samuryq Qazyna qorynyń tarapynan búrokratıalyq kedergilerge tap bolyp,  nátıjesinde ıdeıa, tek jaqsy ıdeıa bolyp qaldy da, jumys oryndary sol kúıi ashylǵan joq.

Taǵy bir másele. Jańaózen qalasynda 2011 jyldan beri memleket esebinen 1 sharshy metr turǵyn úı salynbady. Kerisinshe, Úkimettiń saıasaty qala halqyn basqa óńirlerge kóshirý boldy. Biraq, ol oń nátıje bergen joq.

Jańaózen qalasynyń máselesi tek áleýmettik-ekonomıkalyq másele emes, saıası máselege aınaldy. Sondyqtan biz, Mańǵystaýdan saılanǵan Májilis depýtattary retinde, kelesi sheshimderdi usynamyz:

  1. Jańaózen qalasyndaǵy jumyssyz azamattardyń naqty tizimin jasaqtaý jáne ol ashyq bolýy úshin sıfrlyq platformaǵa engizý.
  2. Jaqyn arada jumyssyzdyq máselesin sheshý úshin «Ózenmunaıgazǵa» qyzmet kórsetip otyrǵan 7-8 servıstik kompanıalardyń aınalasynan aýtsorsıng mekemelerdi quryp, áleýmettik jaǵdaıy tómen azamattardy jumyspen qamtý.
  3. Tıisti mamandyǵy bar jumyssyz azamattardy Mańǵystaý oblysyndaǵy jáne basqa óńirlerdegi kompanıalarǵa jumysqa ornalastyrý múmkindigin qaraý.
  4. Jańaózendi keshendi damytý úshin qalanyń bas jospar men egjeı-tegjeıli jospar jobasyn ázirlep, jańa qala qurylysyn Kendirli baǵytyna qaraı salýdy qolǵa alý.
  5. Jańaózen óndiristik aımaǵynda «Arnaıy ekonomıkalyq aımaq» quryp, kásipkerliktiń damýyna tyń serpilis berý.
  6. Mańǵystaýda ashýǵa josparlanyp otyrǵan sheteldik joǵary oqý orynynyń fılıalyn Jańaózen qalasynda ashý.
  7. «Ózenmunaıgaz» AQ-nyń ımportyn oqshaýlaý jobasyn iske asyrý úshin tıisti Erejeni naýryz aıyna deıin bekitip, sáýir aıyna deıin jobaǵa qatysatyn jergilikti kompanıalardy anyqtaý jáne olardyń jobalaryna jan-jaqty qoldaý kórsetý.
  8. Jańaózen qalasynda qandaı da bir kásip ashýǵa nıettengen azamattarǵa, ekinshi deńgeıli bankter men basqa da qarjylyq ınstıtýttardan paıyzdyq mólsheri jyldyq 2-3% aspaıtyn kólemde nesıe berýdi jolǵa qoıý.
  9. Búgingi tańda Ózenmunaıgazǵa tıimdi jumys isteýge múmkindik bermeı otyrǵany «Samuryq-Qazyna» ulttyq ál-aýqat qorynyń jumysyndaǵy jasandy ákimshilik kedergilerdiń barlyǵyn joıýdy usynamyz.
  10. «Ózenmunaıgaz» aksıonerlik qoǵamy jyl saıyn Jańaózen qalasynyń áleýmettik-ekonomıkalyq damýyna 750 mln teńge kóleminde qarjy bólip keledi. Bul «Ózenmunaıgazdyń» munaıdan túsetin jyldyq paıdasynyń 0,5% ǵana ekenin eskere otyryp, qalanyń áleýmettik-ekonomıkalyq máselelerin sheshýge bólinetin qarjynyń kólemin kem degende 5-10 esege deıin ulǵaıtý qajet.
  11. Prezıdent tapsyrmasyna sáıkes Jańaózen qalasynda jumyssyzdyq máselesin retteıtin úkimettik komısıa qurylyp, jergilikti jerde jumys atqarýy tıis.

Eń bastysy halqy jyl saıyn ósip kele jatqan Jańaózenniń taǵdyryna Úkimet beıjaı qaramaýy tıis dep esepteımiz.

Jańa Qazaqstandy – Jańaózendi damytýdan bastaýymyz qajet!

Qurmetti Alıhan Asqanuly, osy depýtattyq saýaldy zańnamada belgilengen merzimde qarastyryp jaýap berýińizdi suraımyz.

Qatysty tegter :

Pikir qaldyrý

Qatysty Maqalalar