Bas prokýratýraǵa qarasty Arnaıy prokýrorlar qyzmetiniń basshysy Rızabek Ojarov "Kazahstanskaıa pravda" basylymyna bergen suhbatynda ýaqytsha ustaý ızolátorlarynda azaptaý faktileriniń saldarynan 6 adam mert bolǵanyn málim etti.
Onyń aıtýynsha, azaptaý faktilerin jemqorlyqqa qarsy qyzmet mamandary tergeıdi. Al Arnaıy prokýrorlar qyzmetine adam ólimi sekildi aýyr saldarǵa soqtyrǵan azaptaý faktileri týraly ister kelip túsedi.
– Bizdegi málimetke saı, osyndaı jaǵdaı (azaptaý – red) kezinde Almatydaǵy ýaqytsha ustaý ızolátorynda eki adam qaza tapqan, úsh adam – Shyǵys Qazaqstan oblysynda, bir adam Talqyqorǵanda mert bolǵan. Budan bólek Taldyqorǵan turǵynyn útikpen azaptaýǵa baılanysty rezonans týdyrǵan isti de qaraýymyzǵa aldyq. Bul derek boıynsha tergeý jalǵasyp jatyr, onyń nátıjesi týraly mindetti túrde habarlanady. Biraq mundaı qylmystar jappaı sıpat almaǵan atap ótkim keledi, – deıdi ol.
Qańtar oqıǵasynan keıin ustalǵandar polısıa bólimshelerinde, tergeý ızolátorlarynda azaptaýǵa ushyraǵany týraly kóptegen faktiler belgili. Keı jerderde polısıa qyzmetkerleri ustalǵandardy uryp soǵýdan bólek, útikpen kúıdirgen, tyrnaq astyna ıne suqqan, tisten toq soqqan, kúdiktilerdiń ústine qaınaǵan sý quıǵan, basyna selofan kıgizip tunshyqtyrǵan.
Buǵan deıin azaptaý men zańsyz tergeý ádisterine baılanysty 178 qylmystyq is qozǵalǵany habarlanǵan.
Pikir qaldyrý