Shymkent qalasynyń polısıa departamenti jergilikti polısıa qyzmeti basqarmasynyń bastyǵy bolyp Ulyqbek Myltyqov taǵaıyndaldy. Bul týraly qalalyq polısıa departamentiniń baspasóz qyzmeti habarlady.
"İshki ister mınıstri Erlan Turǵymbaevtyń kelisimi boıynsha Shymkent qalasy polısıa departamentiniń bastyǵy, polısıa general-maıory Qaırat Dálbekovtyń buıryǵymen Jergilikti polısıa qyzmeti basqarmasynyń bastyǵy laýazymyna polısıa polkovnıgi Myltyqov Ulyqbek Turǵunuly taǵaıyndaldy" delingen habarlamada.
Myltyqov atalǵan laýazymǵa sybaılas jemqorlyq daýynan keıin qyzmetinen bosatylǵan Muhtar Buharbaevtyń ornyna kelgen. Sońǵysyn qol astyndaǵylardyń biri qymbat zattardy satyp alýǵa "májbúrledi" dep aıyptap, dálel retinde tıisti hat-habarlardyń skrınshottaryn keltirgen.
Ulyqbek Myltyqov 1975 jyly Shymkent qalasynda dúnıege kelgen. İshki ister organdarynda 1996 jyldan bastap qyzmet etedi. Orta jáne aǵa basshy quramnyń ártúrli laýazymdarynda qyzmet atqarǵan.
Ol 2011 jylǵy Jańaózen oqıǵasy kezinde Mańǵystaý oblysy İshki ister departamenti qoǵamdyq qaýipsizdik basqarmasynyń bastyǵy qyzmetin atqarǵan.
Jańaózendegi tártipsizdikter kezinde ol eki is boıynsha fıgýrant bolǵan. Birinde jábirlenýshi retinde, ekinshisinde beıbit demonstranttardy atý faktisinde kýáger atanǵan. Sol kezde Myltyqov beıbit turǵyndardy atýǵa buıryq bermegenin málimdegen.
Mańǵystaý oblysy Jańaózen qalasynda jalaqy máselesin aıtyp, jeti aı boıy alańda narazylyq bildirgen munaıshylarǵa 2011 jylǵy 16 jeltoqsanda polısıa oq atyp, ereýildi kúshpen basqan. Sonyń saldarynan 17 adam qaza taýyp, 100-den astam adam jaralanǵan.
Jańaózen isi boıynsha júrgen sot prosesteriniń nátıjesi boıynsha munaıshylarǵa oq atqany úshin 5 polıseı 5 jyldan 7 jylǵa deıin sottalǵan. Sondaı-aq 37 adamǵa "jappaı tártipsizdik uıymdastyrý" aıyby taǵylyp, olardyń 13-i úsh pen jeti jyl aralyǵyndaǵy merzimge sottalǵan. 21 adamǵa shartty jaza kesilse, 3-eý aqtalǵanyp shyqqan.
