Parlamenttiń tómengi palatasy májilis depýtaty Darıǵa Nazarbaevanyń ókilettigin merziminen buryn toqtatty. 

Nazarbaevanyń otstavkasyna 99 depýtat daýys berse, 1 depýtat qalys qalǵan. Darıǵa Nazarbaevanyń ózi otyrysqa qatysqan joq.

Qańtar oqıǵasynan beri májilistegi otyrystarǵa kelmegen Darıǵa Nazarbaeva 25 aqpan kúni Ortalyq saılaý komısıasyna depýtattyq ókilettigin toqtatý týraly ótinish bergen.

Resmı aqparat boıynsha ol koronavırýs juqtyryp, Almatydaǵy úıinde emdelip jatty. Beıresmı aqparattarda Dýbaıda ekeni aıtylǵan.

Ol 28 qańtarda NurOtan partıasy saıası keńesi quramynan shyǵarylǵan.

Qańtar oqıǵasyna deıin bılik qatarynda, kvazımemlekettik sektorda basshylyq qyzmette bolǵan eks-prezıdent Nursultan Nazarbaev áýletiniń ókilderi osylaısha tolyqtaı qyzmetterinen ketti.