AQSH pen Eýroodaq elderi Reseıdiń munaı-gaz sektory eksportyna aýyr soqqy bolatyn sharalar qabyldap jatyr.

VVS-diń orys qyzmetin habarlaǵandaı, AQSH prezıdenti Djo Baıden Reseıden munaı men ózge de energıa tasymaldaýshylardy jetkizýge tyıym salǵan. İzinshe Ulybrıtanıa jyl sońyna deıin Reseıden munaı men munaı ónimderin alýdy toqtatatynyn málim etti.

Artynsha Eýroodaq Reseı gazynan bas tartý josparyn ázirlep jatqanyn jetkizdi. Jańa energetıkalyq jol kartasyna saı, Eýropa bir jyl ishinde reseılik gazdyń 2/3-inen bas tartýǵa tıis. Sonymen qatar jospar boıynsha 2030 jylǵa deıin Reseıdiń barlyq paıdaly qazbalarynan bas tartý kózdelip otyr.

EO bıogaz men sýtek sekildi energıanyń jańartylatyn túrlerin jappaı qoldanýdy usynady. 

Qysqa merzimde Eýroodaq elderine gaz AQSH pen Afrıka elderinen jetkizilýge tıis. Tipti keı elder gaz ornyna kómirdi kóbirek tutyna turýy múmkin.

Qazirgi ýaqytta Eýroodaq elderiniń gazǵa degen qajetiniń 40 paıyzyn Reseı ótep otyr. Transport & Environment zertteý tobynyń dereginshe, Reseıden gaz satyp alý kúnine 118 mıllıon dollardy quraıdy.

Brıtanıalyq Capital Economics analıtıkalyq kompanıasynyń dereginshe, mundaı senarı Reseı ekonomıkasyn turalatyp jiberýi múmkin. Qymbatshylyq 30 paıyzǵa jetip, eldi jappaı jumyssyzdyq jaılaýy ǵajap emes. Dollar 200 rúblge deıin qymbattaıdy. Bul – kompanıalardy defoltqa ushyratyp, Reseı eknomıkasy 20 paıyzǵa qulaýy múmkin. Onyń áseri Reseı ekonomıkasy 1990 jyldary ótkergen jaǵdaılarmen para-par bolady dep boljanyp otyr.

Alaıda bul jaǵdaı Reseıge ǵana emes, álem úshin de teris saldar týdyrady. Munaı men gaz baǵasy sharyqtap, ol energıa men janar-jaǵarmaıǵa, sáıkesinshi, azyq-túlik pen aýyl sharýashylyǵy ónimderiniń qymbattaýyna ákelip soqpaq.