Reseı prezıdenti Vladımır Pýtınniń baspasóz hatshysy Dmıtrıı Peskov Reseı Ýkraınadaǵy áskerı maqsattarynyń eshqaısysyna áli qol jetkize almaǵanyn moıyndady jáne Máskeýdiń ıadrolyq qarý qoldaný múmkindigin joqqa shyǵarýdan bas tartty.

CNN arnasynyń tilshisi Krıstıan Amanpýrǵa aǵylshyn tilinde bergen suhbatynda Peskov Reseı "ekzıstensıaldy qaýip" dep sanaıtyn jaǵdaılarǵa qarsy Kremldiń ıadrolyq qarý qoldaný múmkindigin joqqa shyǵarýdan birneshe ret bas tartty.

"Pýtın Reseıdiń ıadrolyq múmkindigin qandaı jaǵdaıda paıdalanady?" degen suraqqa Peskov "Eger bul bizdiń el úshin ekzıstensıaldy qaýip bolsa, solaı bolýy (ıadrolyq qarýdy qoldanýy) múmkin" dep jaýap berdi.

Pýtın buǵan deıin ıadrolyq qarýdy Reseıge qaýip tóndiretin elderge qarsy qoldanatynyn aıtqan bolatyn.

Reseı prezıdenti aqpan aıyndaǵy málimdemesinde "Bizdiń jolymyzǵa kim kedergi jasasa, elimiz ben halqymyzǵa qaýip tóndirse, olar Reseı dereý jaýap beretinin jáne onyń saldary bolatynyn bilýi kerek. Búkil tarıhta eshqashan kórmegendeı saldar bolady" degen.

Reseı áskerleri Ýkraınaǵa basyp kirgennen birneshe kún ótken soń Pýtın eldiń strategıalyq ıadrolyq kúshterin joǵary daıyndyqqa qoıǵanyn málimdedi.

Al, Pentagon Kreml baspasóz hatshysynyń Ýkraınadaǵy qaqtyǵys kezinde ıadrolyq qarýdy qoldanýdan bas tartýyn aıyptady. Reseı ıadrolyq oqtumsyqtyń eń kóp qoryna ıe.

Pentagon ókili Djon Kırbı Máskeýdiń ıadrolyq qarýdy qoldaný yqtımaldyǵy týraly rıtorıkasyn "qaýipti" dep atady.

"Biz muny kún saıyn múmkindiginshe qadaǵalaımyz" dep qosty ol.

AQSH-tyń burynǵy qorǵanys mınıstri Leon Panetta da Peskovtyń sózderin synǵa aldy.

"Ashyǵyn aıtqanda, Reseıge qandaı da bir túrde qaýip tónip tur degen óte jalǵan tujyrym. Meniń oıymsha, kem degende, Reseıdiń bul múmkindikti qarastyryp jatqany alańdaýshylyq týdyrady. Men munyń bolatyn, bolmaıtynyn bilmeımin. Pýtın áli de AQSH-tyń qalaı jaýap beretini týraly alańdaýy kerek jáne ol óziniń aman qalý, qalmaýy týraly alańdaýy kerek dep oılaımyn" dedi Panetta.