Reseı shabýylynan Kıev irgesindegi Býcha qalasynda kóptegen beıbit turǵyndardyń qaza tabýyna baılanysty Reseıge qarsy jańa, qatańyraq sanksıalar engizý týraly úndeý aıtyldy.

Qala kóshelerinen azamattyq kıim kıgen keminde 20 adamnyń máıiti tabylǵan. Ýkraına reseılik áskerlerdi "ádeıi qyrǵyn" jasady dep aıyptady.

Ýkraına bıliginiń habarlaýynsha, Reseı áskerleri aımaqtan shyǵarylǵannan keıin Kıevtiń syrtyndaǵy qalalardan júzdegen máıit tabylǵan. Al Reseı kisi óltirý jaǵdaılaryn joqqa shyǵarady.

Fransıa prezıdenti Emmanýel Makron Reseıdiń kómir men munaı eksportyna baǵyttalǵan sanksıalardy odan ári kóbeıtýge shaqyrdy. Fransýz BAQ-tary soǵys qylmystarynyń anyq belgileri bar ekenin jazdy.

Germanıanyń qorǵanys mınıstri Krıstın Lambreht Eýropalyq Odaq endi Reseı gazyn ımporttaýǵa tyıym salýdy talqylaýy kerek deıdi. Ýkraınanyń talap etkenine qaramastan, tyıym eýropalyq tutynýshylarǵa áser etetindikten, kóshbasshylar tyıymdy áli de jasaǵysy kelmeı tur.

AQSH memlekettik hatshysy Entonı Blınken kez kelgen áskerı qylmystar úshin jaýaptylar jazalanýy kerek ekenin aıtty. 

Blınken reseılik ásker genosıd jasaǵan, jasamaǵany týraly suraqqa jaýap beryp, halyqaralyq sot sıaqty tıisti mekemeler men uıymdar adamzatqa qarsy qylmysty tergeýge kúsh biriktiretinin aıtty.

Brıtan premer-mınıstri Borıs Djonson oqıǵany "jekkórinishti shabýyldar" dep atap, aıyptady. Sondaı-aq Ulybrıtanıa osy aptada jańa sanksıalar jarıalaýy múmkin ekeni habarlandy.

Bul rette EO keńesiniń tóraǵasy Charlz Mıshel EO-nyń qosymsha sanksıalary daıyndalyp jatqanyn jetkizdi.