QR Prezıdentine jáne birqatar joǵary laýazymdy memlekettik qyzmetkerlerge qastandyq jasaýdy josparlaǵan delingen azamatqa baınalysty derekter shyqty. Jýrnalıs Mıhaıl Kozachkovtyń jazýynsha, kúdiktide shynymen de snaıperlik vıntovka bolǵan.
"Prezıdent pen quqyqqorǵaý organy qyzmetkerlerine qastandyq jasamaq boldy delingen yqtımaldy terrorıst týraly. Onyń aty-jóni Aıan Atyǵaev, bıylǵy qańtardan bastap ol astanada advokat bolyp jumys istegen, dálirek aıtqanda lısenzıa alǵan. Bul jóninde zańgerdiń tanystary bilmegen. Snaıperlik vıntovkasy shynymen bolǵan. Ony elge bólshektep Shyǵys Eýropa elderiniń birinen ákelgen" deıdi jýrnalıs Telegram kanalynda.
Aqparat resmı organdar tarapynan rastalǵan joq. Mıhaıl Kozachkov ózi isteıtin "Vremá" gazetinde sot salasyndaǵy zańsyzdyqtar, Telegram kanalynda túrli ınsaıderlik aqparattar týraly jıi jazady. Ádette onyń jazǵandary artynsha ras bolyp shyǵyp jatady.
Keshe UQK 2022 jylǵy 25 naýryzda vedomstvoǵa qarasty qarsybarlaý qyzmeti Nur-Sultan qalasynda QR Prezıdentine jáne birqatar joǵary laýazymdy memlekettik qyzmetkerlerge qastandyq jasaýdy josparlaǵan shetel barlaý agenti "A"degen QR azamatyn ustaǵanyn habarlaǵan.
Resmı aqparatqa qaraǵanda ol bir mezgilde arnaýly jáne quqyq qorǵaý organdary qyzmetkerlerine qatysty terorıstik aktiler jasaýdy josparlaǵan. Tintý barysynda shetelde shyǵarylǵan dybys óshirgishi bar snaıperlik vıntovka, esirtki zattary jáne iri aqsha somasy tárkilendi. Qarý Qazaqstanǵa kásibı jasyrylǵan túrde bólshektermen ákelingen.
UQK kúdikti budan ózge QR-da áleýmettik jelilerde tıisti materıaldardy jarıalaý arqyly reseıge qarsy úndeýdi nasıhattaý jáne qoǵamda rýsofobtyq kózqarastardy týdyrý tapsyrmalaryn oryndaǵanyn, aldyn ala tergeý barysynda ol joǵaryda kórsetilgen isterdi shetel memleketiniń tapsyrmasy jáne múddesinde jasaǵanyn moıyndaǵanyn málim etken.
Áleýmettik jelide UQK taratqan habarlamanyń qısynyna sene qoımaǵandar, ony qoıylym dep sanaıtyndar az bolmady.
Pikir qaldyrý