Sáýir aıynyń 13 juldyzynda Ál-Farabı atyndaǵy Qazaq Ulttyq ýnıversıtetiniń Ál-Farabı ǵylymı kitaphanasynda «Maǵrıpa Jylqybaeva - Altyn adamnyń kúmis zerenshedegi 26 tańbasynyń qupıasyn ashqan ǵalym» dep atalatyn dóńgelek ústel-konferensıa ótti. JOO men ǵylymı ınstıtýttardyń profesor-oqytýshylary qatysqan alqaly jıynda ǵalymnyń «Altyn adamnyń amanaty», «Altyn adamnyń murasy» jáne «Qupıa kúshter qudireti» dep atalatyn kitaptary týraly baıandamalar jasaldy.

Maǵrıpa Jylqybaeva - kvanttyq fızıka arqyly álemde tuńǵysh ret Esik qorǵandaǵy Altyn adam murasy boıynsha proto dáýirdegi alǵashqy adamzat tiliniń rasshıfrovkasyn jasaǵan jaratylystanýshy ǵalym. Altyn adamdardyń Planetalyq deńgeıdegi ereksheligin zertteý arqyly Saq qorǵandar men Kók Túrik pıramıdalarynyń qupıasyn ashqan qazaqtan shyqqan tuńǵysh oqymysty.

Esik qorǵanynan tabylǵan Altyn adam jazýlaryn zertteýshiler buǵan deıin de bolǵan. Biraq kúmis zerenshege bederlengen 26 tańbanyń álemdik deńgeıdegi mańyzy zor mura ekendigin ǵylymı turǵyda dáleldegen ǵalym bireý. Ol – Maǵrıpa Jylqybaeva. Altyn adam tańbalaryn 30 jyl zerttep, qupıasyn fızıka-matematıkalyq ádispen ashqan álemdegi tuńǵysh fızık. Sharany júrgizgen qalamger Bolat Sharahymbaı osy týraly keńinen tolǵady.

Esik qorǵanynan tabylǵan Altyn adamnyń qupıasyn ashý úshin ǵalym otyz jyl ýaqytyn sarp etkendigin, adamzat balasy úshin asa qundy málimetterdiń bárin Altyn adamnyń janynan shyqqan kúmis zerenshedegi jazýdan alǵanyn, kóne jazýdyń syryn ashýda munshama kóp ǵylymı tásilderdi bir ortaǵa jumyldyryp zertteý amaldary oǵan deıin bir de bir ret tájirıbeden ótpegendigin atap aıtty. «Maǵrıpa Jylqybaeva jazýdyń qupıasyn fızıkalyq-matematıkalyq ádispen tereń zerttep, oqyǵan álemdegi tuńǵysh ǵalym bolatyny sol sebepten» dedi Bolat Jumynuly.

Jıynda sóz alǵan «Esik» memlekettik tarıhı-mádenı mýzeı-qoryǵynyń aǵa ǵylymı qyzmetkeri Aıtqul Hamıt artyna mol mura qaldyrǵan Maǵrıpa Jylqybaeva eńbekteriniń elimiz úshin erekshe ekendigin atap ótti. Sondaı-aq profesor Gúlzıa Pirálıeva (M.Áýezov atyndaǵy Ádebıet jáne óner ınstıtýty), A.Baıtursynov atyndaǵy Til bilimi ınstıtýtynyń ǵylymı qyzmetkeri, fılologıa ǵylymdarynyń kandıdaty Gúljıhan Kóbdenova  Altyn adam murasyna ómirin arnaǵan ǵalym eńbekteriniń ǵylymı mańyzdylyǵyna toqtaldy. «Qazaqstan dáýiri» gazetiniń bas redaktory Ertaı Aıǵalıuly kezinde Maǵrıpa Shójeǵulqyzymen kezdeskende estigen tarıhı-tanymdyq áńgimelerin eske alyp, estelikterimen bólisti. Qalamger Kádirbek Qunypıauly el-jer tarıhyn tanýda ǵalym eńbekterin zerdelep oqý qajettigin aıtty. Shara barysynda Maǵrıpa Shójeǵulqyzynyń ǵylymı murasyna arnalǵan kórme ótkizildi.

Ál-Farabı atyndaǵy kitaphana – JOO-nyń negizgi qurylymdyq bólimsheleriniń biri. Qazirgi ýaqytta ol oqý prosesin aqparattyq súıemeldeýdi qamtamasyz etedi. JOO-nyń ǵylymı jáne bilim berý qyzmetine belsendi qatysady.

Kitaphana – rýhanı-mádenı ortalyq. Kitaphanamyzdy mádenıet pen tárbıe mekenine aınaldyrýda ál-Farabı kitaphanasy ólsheýsiz úles qosýda. Kitaphanamyzdyń damý qarqyny jaqsarýda, jas býyndy tárbıeleý joldaryna – jalpy adamzattyq qundylyqtarǵa,  ulttyq patrıotızmdi jańǵyrtý, rýhanı baıý, adamdy qurmetteý, tulǵany taný, halqymyzdyń adamzat kóshinde laıyqty oryn alý sıaqty máselelerge kóńil bólip, ár túrli is-sharalar uıymdastyrady.

Ál-Farabı kitaphanasynyń Aqparattyq qyzmet basqarmasynyń uıymdastyrýymen Abaı atyndaǵy konferensıa zalynda ótken fızıka-matematıka ǵylymdarynyń kandıdaty, dosent, jaratylystanýshy ǵalym Maǵrıpa Jylqybaevanyń murasyn nasıhattaýǵa arnalǵan shara barysynda oqyrmandar da ortaǵa shyǵyp, óz pikirlerin ortaǵa saldy.

Esik qorǵanynan tabylǵan Altyn adam jazýynyń qupıasyn fızıka-matematıkalyq ádispen ashqan Maǵrıpa Shójeǵulqyzy – Qazaq ulttyq ýnıversıtetiniń túlegi. Fızıka salasy boıynsha birneshe ǵylymı eńbektiń avtory. Ǵylym men kórkem ádebı shyǵarmashylyqty qatar alyp júrgen ǵalym edi.

Jaratylystaný ǵylymdary boıynsha kópshilikke arnalǵan zertteý maqalalary men ádebıet salasyndaǵy dúnıeleri ár jyldary respýblıkalyq jáne halyqaralyq basylym betterinde jarıalanǵan. Ókinishke oraı ǵalym ortamyzda joq, 2019 jyly dúnıeden qaıtty. Biraq artynda murasyn jalǵastyrýshy, nasıhattaýshylary bar.

Aqmaral Jamankózeva

Ál-Farabı atyndaǵy kitaphananyń

Aqparattyq qyzmet

Basqarmasynyń basshysy