Májilis "Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly" zań jobasyna senat engizgen túzetýlerdi maquldady.
Senat túzetýlerin májilistiń jalpy otyrysyna qatysqan 101 depýtattyń júzi qoldasa, bir depýtat qalys qaldy. Zań prezıdenttiń qol qoıýyna jiberildi.
Zań jobasyndaǵy daýly túzetýlerdi engizýmen depýtattar Aıdos Sarym men Dınara Zakıeva aınalysqan.
Buǵan deıin senat zań jobasyn qaraý barysynda jobadaǵy qoǵamda narazylyq týdyrǵan áleýmettik jeliler men messendjerlerdiń jumysy shekteýge qatysty normalardy alyp tastaǵan. Joǵary palata depýtattary aqparat jáne qoǵamdyq damý mınıstrligine balaǵa qatysty kıberbýlıng dep tanylǵan aqparatty joıýǵa ǵana quzyret qaldyryp, ınternet-resýrstardyń, áleýmettik jeliler men messendjerlerdiń jumysyn shekteýge nemese toqtatýǵa qatysty ókiletin qysqartty.
Zań jobasynyń májilis maquldaǵan alǵashqy redaksıasynda áleýmettik jeliler men messendjerlerdi Qazaqstanda "zańdy ókilderin" taǵaıyndaýǵa, sonymen qatar, aqparat jáne qoǵamdyq damý mınıstrligi talap etken kontentti 24 saǵattyń ishinde óshirýge mindetteıtin tus bolǵan. Eger áleýmettik jeli ýákiletti organ talabyn oryndamasa, mınıstrlik jeliniń "Qazaqstan aýmaǵynda jumysyn shekteýge" quqyly.
Zań jobasyndaǵy osy túzetýler medıasarapshylar arasynda qyzý talqylanyp, olardyń narazylyǵyn týdyrǵan. Olardyń sózinshe, mınıstrlikke berý kózdelgen quzyret Facebook, Instagram, Youtube, Telegram, Whatsapp jáne basqa da jelilerdiń Qazaqstan ınternet keńistiginde jumys isteýine qaýip tóndirgen.
Pikir qaldyrý