Almatyda Kenjeǵalı Saǵadıev atyndaǵy Halyqaralyq bıznes ýnıversıtetinde "Saǵadıev oqýlary 2022 – QR-nyń Jańa ekonomıkalyq saıasaty: Búgini men perspektıvasy" taqyrybynda halyqaralyq-ǵylymı konferensıa jumysyn bastady.

Oǵan sheteldik jáne otandyq ǵalymdar, profesorlar, JOO oqytýshylary, doktoranttar, magıstranttar qatysyp jatyr. 

Ǵylymı konferensıa Kenjeǵalı Saǵadıev atyndaǵy Halyqaralyq bıznes ýnıversıtetiniń rektory Anar Mahmetovanyń quttyqtaý sózimen bastaldy. Anar Mahmetova konferensıa talqylaýlarynyń barysynda túıindelgen usynystar el ekonomıkasynyń ósip-órkendeýine, otandyq ónimdi tıimdi paıdalaný jolynda kádege asatynyna senim bildirdi.

Plenarlyq otyrysta "Ekonomıkalyq-saıası daǵdarys jaǵdaıynda Qazaqstannyń ekonomıkalyq qaýipsizdigin qamtamasyz etý joldary" taqyrybynda baıandama jasaǵan Bilim jáne ǵylym mınıstrligi Ekonomıka ınstıtýty basshysynyń keńesshisi Naılá Nurlanova Qazaqstandaǵy ekonomıkalyq qaýipsizdik máselesindegi negizgi problemalardy atady.

Ǵalym olardyń qataryna shıkizat pen onyń álemdik naryqtaǵy suranysyna degen táýeldilikti, joǵary tehnologıalyq óndiris úlesiniń tómendigin, álemdik naryqta básekelese alatyn taýarlardy óndiretin salalardyń kenjeleýin, memlekettik basqarýdaǵy búrokratızasıa men jemqorlyqty jáne óndiristik, kólik-logıstıkalyq, áleýmettik, komýnaldyq ınfraqurylymnyń jetkilikti damymaýyn jatqyzady.

Sarapshy ekonomıkalyq qaýipsizdikti kúsheıtý úshin onyń quramdas bólikteriniń biri  –tehnologıalyq qaýipsizdikti damytýǵa basymdyq berý kerektigin atap ótti. Ol úshin tómendegideı usynystar bildirdi:

♦ Dástúrli salalardaǵy tehnologıalyq modernızasıa baǵytyn keńeıtý;

♦ Ǵylymǵa negizdelgen kúrdeli joǵary tehnologıalyq ónim shyǵaratyn óndiristerdi qurý;

♦ İT qyzmet salasyn damytý;

♦ 2050 jylǵa deıin ǵalymǵa bólinetin búdjet qarajatyn birtindep ulǵaıtý. Qarjylandyrý kólemin JJİ-niń  0,5 paıyzyna, búdjettiń 1,7 paıyzyna deıin jetkizý;

♦Ǵylymdy uıymdastyrý men basqarýǵa, onyń ınfraqurylymdyq damýyna, qarjylandyrýdyń ashyqtyǵyna, ǵylymnyń kadrlyq potensıalyn arttyrýǵa, ǵalym mamandyǵynyń mártebesin kóterýge jańasha kózqaras qalyptastyrý;

♦ Ǵylymı kadrlardy daıarlaýda ǵylymı-zertteý ınstıtýtynyń quqyǵyn keńeıtý.

Plenarlyq otyrys barysynda ózge de ǵalymdar baıandama jasaıdy. Olardyń arasynda Halyq Fınastyń basqarma basshysy Farhad Ohonov, IQAA agenttigi Akredıtasıa keńesiniń akademıgi Gennadıı Gamarnık, Management and Statistics of Forlì Bologna ýnıversıtetiniń (Italıa) profesory Massimo Bianchi, Narhoh ýnıversıteti Akademıalyq keńesi tóraǵasynyń orynbasary Samajan Ómirzaqov, Qazaqstan ǵalymdary odaǵynyń prezıdenti Orazaly Sábden, Tuńǵysh prezıdent qory janyndaǵy Álemdik ekonomıka jáne saıasat ınstıtýtynyń keńesshisi Magbat Spanov bar.

Konferensıa jumysy búgin eki seksıa, erteń bes seksıa boıynsha jalǵasyp, 22 sáýir kúni dóńgelek ústelmen túıindeledi.