Qazaqstanda ákimshilik quqyq buzýshylyq týraly kodekstiń jol júrý erejesine qatysty úsh túrli babyna ózgerister men tolyqtyrý engizilmek. 

Ádilet mınıstrligi «Ashyq NQA» portalynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrý engizý týraly» zań jobasyn jarıalady. Ózgeristerge sáıkes 592-bap boıynsha jyldamdyqty 80 km/saǵ jáne odan asyrǵan júrgizýshige 40 AEK (138 000 teńge) kóleminde aıyppul salynady. Bir jyl ishinde taǵy tártip buzǵan jaǵdaıda aıyppul 60 AEK-ke (207 000 teńge) deıin ósedi.

Sonymen qatar, 593-bap boıynsha kólik júrgizý kezinde esikterdi ashý jáne osyǵan uqsas áreketterdi jasaǵan jaǵdaıda 10 AEK (34 500 teńge) mólsherinde aıyppul salynbaq.

«Qazirgi ýaqytta mektep bitirý keshi men úılený toılary kezinde, kólik júrip bara jatqan kezde jolaýshylar kólik lúkterinen nemese terezeden shyǵyp, ómirine qaýip tóndiretin áreket jasaıdy. Sondyqtan mundaı jaıttardyń aldyn-alý úshin júrgizýshimen qatar jolaýshylardy da jaýapkershilikke tartý qarastyrylýda», - delingen habarlamada.

Temirjol ótkelderinen ótý erejelerin buzǵan jaǵdaıda aıyppuldy – 10 AEK-ten (34 500 teńge) 20 AEK-ke (69 000 teńge) deıin kóterý usynylýda, eger zań buzýshylyq bir jyl ishinde qaıtalansa, júrgizýshini bir jylǵa júrgizýshi kýáliginen aıyrady. Qujat jobasy qoǵamdyq talqylaýda 13 naýryzǵa deıin bolady.