Aqmola oblysy polısıa departamenti Qazaqstandy Reseıge qosý ıdeıasyn qoldaıtynyn málimdegen Aqmola oblysy turǵynynyń málimdemesinde qylmys quramy joq dep sheshken. Bul týraly KazTAG saıty habarlady.

Polısıa deportamenti azamatpen profılaktıkalyq áńgime júrgizýmen shektelgen.

"Artem Abramovpen profılaktıkalyq áńgimeler júrgizildi, qylmystyq áreket belgileri baıqalǵan joq", delingen Aqmola oblystyq polısıa departamenti baspasóz qyzmetiniń habarlamasynda.

Atbasar qalasynyń týmasy Artem Abramov "Chatroulette" qosymshasy arqyly ýkraınalyq blogerdiń baǵdarlamasyna bildirgen pikirinde Qazaqstannyń Reseıge qosylýyn qoldaıtynyn, Pýtın "arnaıy operasıa" ótkizýge sheshim qabyldasa, qolyna qarý alyp, qazaqstandyqtarǵa qarsy kúresýge daıyn ekenin aıtqan. Keıin jelide Abramovtyń arandatýshylyq qurbany retinde keshirim suraǵan jazbasy paıda boldy.

Buǵan deıin Aqmola oblysy Jarqaıyń aýdany Derjavınsk qalasynyń turǵyny Rýslan Elfımov ta osy qosymsha arqyly Reseı Qazaqstannan soltústik aımaqtardy tartyp alsa, qýanatynyn aıtqan edi. Ol Reseı tarapynda Qazaqstanǵa qarsy soǵysqysy keletinin ashyq málimdegen. 

Al 2022-jyldyń qazan aıynda áleýmettik jelide Elfımovtyń kollaborant (Reseı okýpasıasyn jaqtaý - Red.) ekenin aıtqan vıdeosy taraǵan. Osyǵan baılanysty Ulttyq qaýipsizdik komıtetiniń Aqmola oblystyq departamenti QR Qylmystyq kodeksiniń 180-baby (separatıstik áreket) boıynsha qylmystyq is qozǵady.