Búgin QR Parlament Májilisiniń jalpy otyrysy ótti. Májilis depýtaty Ermurat Bapı tómengi palatadaǵy alǵashqy saýalyn Qazaqstandaǵy separatıstik áreketter men saıası tutqyndar máselesin kóterýden bastady. 

"Separatızm sıpatyndaǵy oǵash oqıǵa Qazaqstandaǵy ulttyq jikshildiktiń óte qaýipti ekenin taǵy bir ret kórsetti. Bizdiń eldiń namysyn qorǵaǵan ultjandy azamattar – Marǵulan Boranbaev pen Danat Namazbaev ultaralyq narazylyq qozdyrdy degen jeleýmen árqaısy 5 jylǵa sottalyp ketti. Bul qatarǵa Ermek Narymbaevty da qosýǵa bolady. Anyǵynda bul azamattar ultaralyq arazdyqtan buryn áleýmettik jelilerdegi separatıstik kózqarastarǵa qarsy shyqqany úshin sottaldy. Olarǵa óreskel qıanat jasaldy. Bir el óziniń syńar ezý saıasatshylaryna tyıym salmaıdy? Al bizdiń el óziniń eldik múddesi men halyqtyq namysyn qorǵaǵan azamattardy sottaıdy" – dedi ol. 

Sonymen qatar, Ermurat Bapı kórshi eldiń uranshylary qylmystyq sotqa taǵylmaq túgili óz eliniń bıliginen eskertý de almaǵanyn aıtty. Ol bul jaǵdaıdy  Qazaqstandaǵy oqıǵamen salystyryp, el namysyn qorǵaǵan azamattardyń nege sottalǵanyn surady. 

"Halyqaralyq uıymdar bul azamattardy saıası tutqyn tizimine engizgen. Bizge bul kerek pe? Endeshe buǵan deıin Qazaqstanda bolyp kelgen separatızm sındromyn eskere otyryp, Marǵulan Boranbaev pen Danat Namazbaevqa qatysty úkimdi qaıtadan qaraıtyn ýaqyt ta, saıası sebep te, ulttyq qaýipsizdik muqtajdyǵy da týdy dep esepteımin. Azamattyq minez kórsetetin ýaqyt keldi" – dep málimdedi depýtat. 

Sondaı aq, Ermurat Bapı Bas prokýrordan Marǵulan Boranbaev pen Danat Namazbaevqa qatysty qylmystyq istiń zań talaptaryna saı qaıta qaraýyn surady.

Ol bul saýalynan depýtat Abzal Quspan da qosylatynyn atap ótti.

Eske sala ketsek, byltyr naýryzda blogerler Marǵulan Boranbaı men Danat Namazbaı Facebook jelisindegi jazbalary úshin 5 jylǵa qamaýǵa alyndy. Sot sheshimine sáıkes, aıyptalýshylar 2018 jyldan bastap áleýmettik jelidegi paraqshalarynda ultaralyq alaýyzdyqty qozdyrý maqsatynda jazba jarıalap, orys ulty ókilderin kemsitken.