Búgin úıqamaqta otyrǵan Janbolat Mamaı sottaǵy sońǵy sózin sóıledi. Ol ózine taǵylǵan aıyptardyń shyndyqqa janaspaıtynyn aıtyp, qarsy tarap birde–bir dálel kórsete almaǵanyn málimdedi.

Sot otyrysynda Janbolat Mamaı ózin "Demokratıalyq partıa" jetekshisi ári ultjandy azamat retinde tanystyrdy. 

"Alyp memlekette nebári 20 mıllıon adam turamyz. Bul Qytaıdyń bir-aq qalasynyń turǵyndarymen teń. Sol 20 mıllıon adamnyń ulan ǵaıyr jeri men mol baılyǵy bar. Alaıda olar gúldengen memlekette ómir súrý ornyna kedeıliktiń shegine jetti. Shyndyqty ashyq aıtqanym úshin meni sottaǵannan eshteńe ózgermeıdi. Biz halyqtyń muń-muqtajyn aıtqandardy qýdalaǵansha, sol máselelerdiń sheshý jolyn izdeýmiz kerek"– dedi ol.

Sonymen qatar, Janbolat Mamaı qańtar oqıǵasynyń shynaıy baǵasyn beretin ýaqyt kelgenin de aıtty.

"Qandy qańtar kezinde bir jigittiń 30 samsa urlaǵany úshin tergeý ızolátoryna túskenin estidim. Velosıped nemese moped urlap sottalǵandar da boldy. Iá bul qylmys jáne jaýapqa tartý durys. Biraq qylmys pen jaza bir-birine saı bolý kerek. Bireý 30 samsa úshin sottalsa 30 jyl eldi tonaǵandar jaýapqa tartylmaıdy. Nege aıyptalǵandar arasynda mılıardtaǵan qarajatty jymqyrǵan jemqorlar joq?"– dep málim etti ol.

Janbolat Mamaıdyń isi boıynsha sot úkimi 10 sáýir tańerteń oqylady.

Eske sala keteıik, osyǵan deıin prokýror Janbolat Mamaıdy 6,6 jylǵa sottap, jýrnalıstik jáne qoǵamdyq qyzmetpen aınalysýyna tyıym salýdy suraǵan edi.

Al Rysbek Sársenbaev prokýror suranysyn  "prezıdentke taban tiresip qarsylasatyn adamdy saıası arenaǵa shyǵarmaýdyń esebi, bıliktiń qylmysyn áshkerelemeýdiń amaly" dep baǵalaǵan bolatyn.