Aqmola oblysy Qosshy qalasynda quny 65 mln teńge bolatyn jer ýchaskesi memleketke qaıtaryldy. Bul týraly oblystyq prokýratýra habarlady. 

Qala prokýratýrasy jer zańnamasynyń qoldanylýyn taldaý barysynda komersıalyq maqsatta jer berý kezinde jergilikti atqarýshy organdar tarapynan óreskel buzýshylyqtar anyqtaldy.

"Máselen, Qosshy aýyldyq okrýgi ákiminiń ókimimen 2016 jylǵy tamyzda Jaýapkershiligi shekteýli seriktestikke (budan ári - JSHS) aýdany 3,2778 gektar jer ýchaskesine ýaqytsha óteýli jer paıdalaný quqyǵyn berdi. Osy ókimniń negizinde JSHS men Selınograd aýdanynyń jer qatynastary bólimi arasynda jer ýchaskesine ýaqytsha óteýli jer paıdalaný týraly shart jasaldy", - delingen prokýratýra habarlamasynda.

Jaldaý merzimi birneshe ret uzartyldy. Alaıda, 2016 jyldan bastap kásiporyn jer ýchaskesin nysanaly maqsaty boıynsha paıdalanýǵa baǵyttalǵan biryńǵaı is-qımyl jasaǵan joq. Al qujattarǵa sáıkes, JSHS turǵyn úı keshenin salýdy kózdegen.

"Qosshy qalasy ákimdiginiń málimetteri boıynsha osy jer ýchaskesinde «Jaıly mektep» ulttyq jobasyn iske asyrý sheńberinde mektep salý josparlanatyn bolady. Qosshy qalasynda halyqtyń qarqyndy damýy men ósýine baılanysty jyldan jylǵa mektepterdiń apatty tapshylyǵy baıqalatynyn atap ótken jón. Osy baǵyttaǵy jumys jalǵasatyn bolady", - delingen habarlamada.