Durys medısınalyq kómek kórsetpedi dep dárigerlerdi aıyptaıdy, keshegi Talǵar aýrýhanasyndaǵy jaǵdaı sıaqty «tiriden ólikke jetkizdiń» dep medısına ókilderin uryp-soǵady. Balabaqshada tárbıeshilerdiń balany urǵany túsirilgen vıdeolar tarap jatady. Endi qoǵamnyń qyzý talqysyna ushyraǵan jaıt meshitte boldy. Beınekameraǵa túsip qalǵan oqıǵada búldirshin namaz oqyp jatqan ımamnyń aldynan ótkende, din ókili balany aıaýsyz betinen qaǵyp jibergen eken.

Áleýmettik jelide vıdeo astyna san alýan pikir jazylǵan. Kóbi Rınat Zaıytovtyń «namazhandardyń 80%-y alaıaq» degenin negizge alyp, onyń rastyǵyn tilge tıek etip jatyr. Alaıaqtyq pen balaǵa degen aıaýsyzdyq qabyspaıtyn, eki bólek is. Biraq qoǵam sanasyna sol pikirdiń sińisti bolyp, qabyldanyp ketkeni sonshalyq, ıslamǵa qatysty ár iske baǵany solaı qoımaq.

Depýtattyń sózinde dindi oıynshyq etkenderge silteme bar. Elimizde ıa sheteldegi jaıttardy alsaq ta, kúmán týǵyzbas úshin din jamylyp júrgenderdiń bary jasyryn emes. Teris baǵyt ustanǵandardyń birqatary Sırıaǵa ketkende, kópshilik qarapaıym óz qandastarymyzdy ekstremısteı kórip, Qazaqstanda dinı jaǵdaı ýshyǵyp ketti. Mine, el aldynda aıtylǵan bir pikir sondaı deńgeıde qaıta qysym týyp ketýine ákelip soǵýy ábden múmkin. Sonyń bir kórinisi osy jaıt.

«Dinshilder» men «qarapaıym adamdar» dep bólý aǵattyq. Deı turǵanmen Paıǵambar súnnetin ustanamyn dep, elge úgit-nasıhat aıtyp júrgen moldalardyń sózi men isi túzý bolmaı, kópshilikke ne ǵıbrat beredi?! Meshit ókilderiniń aǵattyǵy birinshi ret aıtylyp jatqan joq, keıde «túımedeıdi túıedeı» etip el asyryp qabyldaıdy, endi birde adamgershilik sheńberine syımaıtyn isterin aqtaýǵa da negiz bolmaıdy. Tek olardyń da qarapaıym stýdentter sıaqty ýnıversıtet oqyǵanyn, basqalardaı endi jumysqa turǵan jas maman ekenin kóp eskere bermeımiz.  

Vıdeodaǵy jaǵdaıdy taldaıtyn bolsaq, namazda adam aldyn kesip ótýge bolmaıdy. Qazaqstan musylmandary Dinı basqarmasynyń sharıǵat jáne pátýa bólimi namaz oqyp turǵan adamnyń aldynan eshbir qajettiliksiz kesip ótýge tyıym salynǵanyn aıtady, Paıǵambarymyz (oǵan Allanyń salaýaty men sálemi bolsyn): «Namaz oqýshynyń aldyn kesip ótken adam óziniń qanshalyqty kúná jasaǵandyǵyn bilgende, namaz oqýshynyń aldyn kesip ótkenshe, qyryq toqtap, kúte turǵany jaqsyraq bolar edi», – degen sózin dálel retinde keltiredi. Alaıda bul jaǵdaıda kúnásiz balanyń kesip ótýi qalaı bolmaq?

Paıǵambarymyzdyń jubaıy Úmmý Sálámadan (r.a.) jetken hadıs jaqsy mysal bola alady:

«Alla elshisi (s.a.ý.) Úmmý Sálámányń bólmesinde namaz oqyp jatqan tusta, Abdýlla ma, álde, Omar ıbn Sálámá ma, Paıǵambarymyzdyń aldyn kesip ótpekshi bolady. Sonda Alla elshisi qolymen ıshara jasap (ótpeýin bildiredi), ol (ótpeı) keıin qaıtady. Onyń artynan Úmmý Sálámányń kishkentaı qyzy Záınáp aldynan kesip ótip bara jatady, oǵan da Alla elshisi qolymen ótpeýine ıshara jasaıdy, alaıda Záınáp oǵan qaramaı ótip ketedi. Paıǵambarymyz (s.a.s.) namazyn oqyp aıaqtaǵannan soń Záınaptyń qaıtpaı kesip ótkenine oraı: "Olar (ulǵa qaraǵanda) qıqarlaý keledi" degen eken».

Hadısten uqqanymyz, namaz oqyp turǵanda aldynan bala ótse aıyp emes, biraq toqtatýǵa, belgi berý lázim. Aldynan adam ótip ketpeýi úshin jaınmazdyń mólsherindeı bas jaǵyna bir zat qoıǵany abzal. Ony «sútra» dep ataıdy, ıaǵnı, bóget. Sútra koıylǵan jaǵdaıda, namaz oqyp turǵan kisiniń aldynan óte berýge bolady dep jazylǵan.