«Men baǵy zaman Sarynynyń muragerimin. Qudaı bul áýendi, bul erekshe saryndy jaıdan jaı maǵan qaldyrmady. Meniń balalyq shaǵym, ónerge ákelgen alǵashqy notamda Qazaq sarynymen kelgen. Ol meniki, men onyń ıesimin! Men kelesi urpaqqa qolymnan kelgenshe jańartyp qaldyramyn. Bul alǵa qoıǵan úlken maqsattyń eń alǵashqy bastamasy», – deıdi ánshiniń ózi.

Shynaıy sóz, júrekjardy lebiz osylaı bolsa kerek. Ushqynnyń atasy Jamalbek Ábdiruly İle óńirindegi ataqty kúıshi Áshim Dúńshiniń shákirti bolǵan. Apasy Qamyrjan Tekebaıqyzy Kúnes jerindegi jıyn-toıda qazaqtyń halyq ánderin tamyljytyp shyrqaıtyn óz ortasyna syıly ana. «Sýsamyr eldiń jaılaýy-aı» dep syzylta jónelgende tyńdarman jurt siltideı tynatyn. Aýyl arasyndaǵy toılarda ájeler bir-birine aqyryn ǵana sybyrlap, «Abaı kók» sıaqty bir áýendi shyrqaı jónelgende jınalǵan qaýym tańdaı qaǵyp, tamsanyp jatýshy edi... Ushqyn sondaı ortadan shyqqan baǵzy áýenniń búgingi jalǵastyrýshysy.

Qazaq estradasyna tyń serpin, jańa ekpin ákelgen «Alashuly» tobynyń túgelge jýyq shyǵarmashylyǵy Ushqynnyń qoltańbasy desek artyq aıtqandyq bolmas. Al belgili akter, ánshi Áset Esjannyń oryndaýyndaǵy «Dúr qamshy» áni ultym deıtin azamattardyń uranyna aınalǵan. Bul kúnde Ushqyn Jamalbek qurǵan «Ugai» prodússerlik ortalyǵy jańa juldyzdardyń túlep ushar uıasy, jas ónerpazdardyń qanatqaqty bilim ordasy bolyp tanyldy. «Muzbalaq» syndy ánderimen «Balapan» arnasyn kóretin bar qazaqtyń balasyn ulttyq áýenge tárbıelep keledi.

Ushqyn Almatydaǵy shaǵyn keshti «SARYN-1» dep atapty. Iaǵnı qazaqtyń «saryny» sarqylmaıdy, ary qaraı 2,3… dep jalǵasady degen sóz. Bul keshte ıisi qazaqqa tanymal aıtysker, qara sózdiń qara nary Qaırat Qul-Muhamet, Teatr óneriniń profesory, Halyqaralyq, respýblıkalyq konkýrstardyń jeńimpazy, Ushqynnyń ustazy Maqsut Orazuly jańa álbomnyń tusaýyn kesip, «Saryndy» sary altyndaı jarqyratqan ánshige tilek batasyn berdi.

Bir qýantarlyǵy kileń jastardan quralǵan kesh kórermenderi dý qol shapalaqpen, erekshe yqylaspen Ushqynnyń áýenine tolqydy. Bul qoshamet qazaqtyń túpsanasyna tunǵan dalalyq áýezdiń tym ómirsheń ekenin, qazaq bar jerde ulttyq sarynnyń umytylmaıtynyn pash etti.

Dańǵoı áýen, dańǵaza mýyzkaǵa tolǵan búgingi qazaq estradasy tym arzandap ketkeni jurtqa aıan. Osyndaı kezeńde sara jolyn taýyp, «Saryndy» qaıtarǵan, sanany túletken, qarabaıyr jyn oınaqqa qamshy salǵan Ushqyn Jamalbekke qazaq balasy dán rıza dep oılaımyz. «El búginshil, meniki erteń úshin» degen Baıtursynulynyń sózi osy Ushqyn sıaqty jastardyń ustanymy bolsa kerek. Ushqyn jalyndady, jalyn laýlaıdy, ot shoqqa aınalady... Alashtyń án álemine erekshe «saryn», aıryqsha áýen qosyldy. Tekti túısigi, tereń tamyry bar ár qazaq jaryq juldyzdyń temirqazyqqa aınalǵanyn sezer dep senemiz.