Qońyraý shalyndy... Kótersem beıtanys daýys. «  «Qamshy» portaly ma eken?»,- dep surady menen. «Iá»,- dedim. Solaı bastaldy bul oqıǵa. Oqıǵa bolǵanda qalaı? Áńgime sońynda Almatynyń mańyndaǵy Aqshı deıtin aýylǵa qaraı jolǵa shyǵatyn boldyq.

          Álqıssa. Álgi qońyraý shalǵandar «31» telearnanyń qyzmetkerleri eken. Qazaq handyǵynyń 550 jyldyq uly toıyna tartý etip telehıkaıa túsirgeli jatyrmyz deıdi. Qonaq bolyp, túsirilim barysymen tanysyp ketýimizdi surady.

            Tańmen talasa oıanyp, tup-týra sonda qaraı tarttyq. Kún jaýyndy, azdaǵan yzǵar da bar. Kóńil-kúı jaǵyn ózińiz baǵamdaı berińiz. Biraq sapar sońynda qandaı keremet áserde qaıtqanymyzda ǵoı áńgime.

            Sonymen... Otandyq elektrondy BAQ ókilderi, ıaǵnı áriptesterimizben -barlyǵymyz bir shaǵyn «Gazel» avtokóligine otyrdyq. Uzyn sany jıyrmaǵa taıaýmyz. Órimdeı bolsa da, otty tilshiler. Hıkaıa izdep bara jatyrmyz.

            Shamamen bir jarym saǵat  júrip jettik. Jol boıy tanysý, tabysýlar bolǵan soń ba, ýaqyt zý ete qaldy.

            Mine tamasha. Túsirilim alańy.Tup-týra XV ǵasyrdan biraq shyqtyq. Á, degende solaı kórindi. Kúnniń yzǵary esten shyǵyp ketken. Ártisterdi kórdik, prodúser, senarıst, rejıser myrzalar túgel osynda. «Kamera», «Stop», «dúbl» degen daýystar. Degenimizdiń aıǵaǵy retinde sýrettegilerge de muqıat qaraı otyryńyzdar.

            Túsirilip jatqan fılmniń  ataýy -«Adasqandar». Áý basynda kózimizge jolynan adasqan, jańylǵan bireýler elestegen-di. Tereńinen tartýǵa úırmiz ǵoı. Biraq telehıkaıa tup-týra maǵynasynda adasqandar týraly eken. Bul týraly bizge «31» arnanyń atqarýshy prodúseri Ásel Toıanova baıan etip berdi.

            Hıkaıa 20 serıadan turady. Birinshi hám ekinshi bólimderi bir-birimen baılanysty. Qalǵany óz aldyna jeke hıkaıalardan turady. Basty rólde Aıdana degen qyz ben onyń prodúseri Álisher. Olar etnofestıvalǵa bara jatqan jerinde eksperıment ortalyǵyna túsip on besinshi ǵasyrdan biraq shyǵady. Kisiligi tasyp, talǵamy kók tiregen Aıdana on besinshi ǵasyrda qalaı ómir súredi. Prodúser Álisher paıdagóıligin orta ǵasyrda asyra alady ma? Bul suraqtardy bilý úshin «31» arnadan telehıkaıany kórýińiz shart.

            Telejobanyń túsirilim sapasyn arttyrý úshin Máskeýden arnaıy Shota Gamısonıa degen rejıser shaqyrtylǵan eken.

            Gamısonıa myrzamen de tildesip úlgerdik. Ol ártister men túsirilim tobyna degen rızashylyǵy mol ekenin jetkizdi. Sonymen qatar, rejıser qazaq kıno salasynyń edáýir artta qalǵanyn jetkizdi. Alaıda, ol qorlyq emes, tek kóp jumys jasaý kerek degen sóz deıdi rejıser.

            Sapar barysynda ártis Altynaı Joldybaeva (ánshi Aıdananyń rólinde) jáne onyń prodúseri Álı Marat pen (Álisher rólinde) de tildestik. Aıtqandaı Altynaı Joldybaeva estradanyń jaryq juldyzy Kámshat Joldybaevanyń týǵan sińilisi bolyp shyqty.

            Uıymdastyrýshylardyń degenine senetin bolsaq, telehıkaıanyń eń qıyn bóligi ártis tańdaý bolǵan eken. Sol qıyn básekeden qısynyn taýyp úzdigi bolǵan Altynaı óz ónerin bizge kórsetip berdi.

            Osymen bizdiń sapar aıaqtalatyndaı bolyp kórindi. On besinshi ǵasyrǵa qaıta kelgen adasqandardyń qatarynda biz de júrmiz.   

            P.S. Bir qyzyǵy tup-týra biz qaıtatyn kezde «Gazel» joq bolyp ketti. Japan dala. Jańa ǵasyrdyń tilshileri on besinshi ǵasyrda qaldyq. Sirkirep jaýyn jaýyp tur. Qolshatyr astyndamyz. Alystan bizge orta ǵasyr qarap tur. Qonaqqa myqty elmiz ǵoı. Kózderinen qımastyq baıqalady. Tamasha sezim. Tereń oıǵa kire bergende, «kólik keldi» degen daýys eleń etkizdi...

            Aıan MEIRASH