Ósip kele jatqan jas urpaqqa ulttyq qundylyq pen salt-dástúrimizdi dáripteý maqsatynda Astana qalasy ákimdiginiń qoldaýymen Dinderdi zertteý ortalyǵy shildeniń 16-17-shi juldyzynda Býrabaı ulttyq parki “Jeti qazyna” etno-aýylynda “Kemel jigit - kúıeý bala” atty ulttyq zıatkerlik kýrsyn ótkizdi.

İs-sharanyń basty maqsaty – elimizdiń bolashaǵy jastardyń rýhanı, mádenı, ǵylymı damýyna qoldaý kórsetý.

İs-shara Astana qalasynan bastaý alyp Býrabaı ulttyq parkinde jalǵasty.

Balalarǵa ulttyq qundylyqtar men tálim-tárbıeni tereńnen nasıhattaý maqsatynda tarıh ǵylymdarynyń doktory, profesor Artyqbaev Jambyl Omaruly, arheologıa jáne etnologıa magıstiri Sháken Turar Sáttarqyzy, pedogog-ekspert, psıholog-konsýltant Janabergenova Juldyz Habıbýlloqyzy, ulttyq qundylyqtardy dáripteýshi Saǵadildá Úsibáldi Bádenuly syndy tulǵalar dáris ótkizdi.

İs-shara eki kúnge sozyldy. Atalmysh kýrs barysynda “Qabanbaı”, “Qobyldy”, “Alpamys” atty úsh topqa bólingen 60-qa jýyq bala “Qazaq tarıhy men dástúrleri”, “maqal mátelderdegi ulttyq tárbıe”, “jigittiń úsh jurty” syndy teorıalyq jáne praktıkalyq sabaqtarǵa qatysty.

İs-sharanyń kezekti kúninde jasóspirimderge qolǵa sý quıý, mal soıý, jilikteý, tabaq tartý, samaýryn qaınatý, atqa miný, sadaq ataý syndy praktıkalyq dástúrli daǵdylarǵa saı sabaqtar ótkizildi.

Sondaı-aq balalarǵa arnap qazaqy úıdiń ishine kınoteatr qurylyp, rýhanı tárbıelik mańyzy bar fılmder kórsetildi.

Kýrsqa qatysqan balalar men ata-analar óz rızashylyǵyn bildirip, “Kemel jigit – kúıeý bala” atty ulttyq zıatkerlik kýrsynyń jalǵasyn tabýyna ótinish bildirdi.

Atalmysh shara barysynda árbir bala rýhanı azyqqa kenelip, ultqa, týǵan jerge, mádenıetimiz ben ádebıetimizge, taǵlymymyz ben tarıhymyzǵa degen qurmetin arttyrǵanyna senimimiz mol.

Dinderdi zertteý ortalyǵy