Atyraý oblystyq prokýratýrasynyń málimetinshe, tabıǵatty qorǵaý salasynyń basym baǵyty – qaýipti qaldyqtar aınalymyna turaqty qadaǵalaý júrgizý. «Máselen, «Kaspıı neft» AQ-nyń 2021-2022 jyldary burǵylaý jáne ken ornyn paıdalaný kezinde 4500 tonnadan astam qaýipti qaldyqtarǵa jınaqtalý lımıtin almaǵany anyqtaldy.

Prokýrordyń usynysyn qaraý nátıjesi boıynsha Atyraý oblystyq sotynyń sot alqasynyń 2 shildedegi qaýlysymen «Kaspıı neft» AQ QR Ákimshilik quqyq buzýshylyq týraly kodeksiniń 328-babymen ákimshilik jaýapkershilikke tartylyp, 13 684 868 730 teńge aıyppul salyndy», – dep habarlady oblystyq prokýratýradan.

Prokýratýranyń prınsıpti ustanymy nátıjesinde ákimshilik aıyppul búdjetke óndirildi. Aıyppul qarjysy tolyǵymen Ulttyq qorǵa aýdaryldy. Eske sala ketelik, budan buryn Atyraýda aýany lastaıtyn qaldyqtardyń basym bóligi 4 kompanıanyń úlesine tıesili ekenin jazǵan edik. Sondaı-aq, Atyraý oblysynda jer qoınaýyn paıdalanýshyǵa 12,2 mlrd teńge aıyppul salynǵanyn habarlaǵan bolatynbyz.