XXXIII jazǵy Olımpıada oıyndarynyń chempıony, QR eńbek sińirgen sport sheberi Eldos Smetovti Jambyl jurtshylyǵy Taraz qalasynyń shyǵys qaqpasynan sán-saltanatpen qarsy aldy.

Saltanatty sharaǵa Jambyl oblysynyń ákimi Erbol Qarashókeev, óńir turǵyndary men zıaly qaýym ókilderi, sport jankúıerleri, belsendi jastar qatysty.

Eldos Smetov kólikten túsken boıda ónerpazdar ánderin áýeletip, aq jaýlyqty ájeler shashýyn shashyp, ulttyq dám usyndy.

Jambyl oblysy sport ardagerleri keńesiniń tóraǵasy Táýirbek Qaraýyltegi Olımpıada chempıonyna aq batasyn berdi.

Oblys ákimi Eldos Smetovke barsha jambyldyqtardyń atynan alǵys bildirdi.

– Elimizge, týyp-ósken jeriń – Jambyl tórine Olımpıada chempıony bolyp oralýyńmen quttyqtaımyn! Bul jeńis – jalpy qazaqstandyqtardyń, jambyldyqtardyń ortaq qýanyshy! Sen naǵyz batyrsyń! Ózińe senim artqan Memleket basshysynyń, barsha jankúıerlerdiń, jambyldyqtardyń úmitin aqtadyń!

Seniń bul jeńisiń Jambyl oblysynyń 85 jyldyǵyna tamasha tartý boldy dep bilemin!

Ózin bala kezden kúndelikke jazyp, Olımp shyńyn baǵyndyrýdy armandadyń! Sol armanyńa mańdaı terińmen jete bilgen naǵyz er azamatsyń!

Kezinde Qajymuqan atamyz atoı salǵan Parıj tórinde jeńiske jetip, danqty sportshy Jaqsylyq aǵamyzdyń armanyn 44 jyldan keıin oryndaı bildiń!

Seniń esimiń Olımpıadanyń 3 dúrkin júldegeri retinde el tarıhynda qalatyny sózsiz!

Qasıetti Áýlıeata topyraǵynan daryǵan tektilik, kúsh-jigeriń seni osyndaı jetistikke jeteledi dep oılaımyn! Ár beldeskenińde barsha jankúıerleriń, ásirese, jerlesteriń – jambyldyqtar barynsha taqym qysyp, tileýińdi tilep otyrdy.

Bul jeńisińde – ata-anańnyń, otbasyńnyń tálim-tárbıesi men qoldaýy, jattyqtyrýshylaryńnyń da zor eńbegi jatyr. Biz seni maqtan tutamyz, — dedi Erbol Qarashókeev. 

Eldos Smetovti qarsy alý rásimi J. Jabaev dańǵyly men Y.Súleımenov kóshesi boıynsha kólikterdiń saltanatty sherýimen jalǵasty.

Jol boıyndaǵy jambyldyqtar chempıonǵa zor qurmet, ystyq yqylastaryn bildirdi.