HHHlll jazǵy Olımpıada oıyndarynyń chempıony Eldos Smetovke qurmet kórsetilip, Jambyl oblysy ákimdiginiń qoldaýymen «Taraz» ortalyq stadıonynda gala-konsert uıymdastyryldy.

Sport sheberine qurmet kórsetý úshin 15 myńǵa jýyq jambyldyq jınaldy.

Aldymen Eldos Smetov sporttaǵy joly týraly beınerolık kópshilik nazaryna usynyldy.

Saltanatty sharada Jambyl oblysynyń ákimi Erbol Qarashókeev quttyqtaý sóz sóılep, Fransıa tórinde Olımp shyńyn baǵyndyrǵan Eldos Smetov pen onyń jeke jattyqtyrýshysyna qurmet kórsetti.

– El balasy – Eldos Smetov Táýelsiz Qazaqstannyń tarıhynda dzúdodan tuńǵysh Olımpıada chempıony atanyp otyr. Danqty sportshy Jaqsylyq Úshkempirov aǵamyzdan keıin birde-bir qazaq balasy bul bıikti baǵyndyrǵan emes. Araǵa 44 jyl salyp Eldos Smetov qazaqtyń kópten kútken arman-maqsatyna qol jetkizdi.
Qazaq elin álem aldynda pash etken nebir saıypqyrandar, sańlaq sportshylardyń deni – Áýlıeata topyraǵynan túlep ushqan. Olımpıada chempıondary – Jaqsylyq Úshkempirov, Ermahan Ibraımov, Bahtıar Artaev, Olımpıada oıyndarynyń júldegerleri Serik Qonaqbaev, Islam Baıramýkov, Bolat Jumádilov, Bolat Nıazymbetov, Aqjúrek Tańatarovtar alty alashtyń abyroıyn aspandatqan el maqtanyshtary! Áýlıeata óńiri – chempıondar ólkesi, myqtybapkerler ordasy.
Qasıetti Jambyl jeri – er Eldostyń jeńisinen keıin jaýyryny jer ıiskemegen palýandardyń basty ordasy desek qatelespeımiz. Eldostyń erligi men jeńisi barsha qazaqstandyqqa ortaq qýanysh. Qazaqsportynyń dańqy arta bersin! – dedi oblys ákimi.

Erbol Qarashókeev tórtkúl dúnıe kóz tikken tórtjyldyqtyń basty dodasynda top jarǵan Eldos Smetovke oblys ákimdiginiń uıymdastyrýymen demeýshilerdiń tarapynan Taraz qalasynan 5 bólmeli páter (penthaýs) jáne sońǵy úlgidegi (Lexus 600) avtokóliktiń kiltin tabystady. Sport sańlaǵynyń jeke bapkeri Ǵalymjan Jylgeldıevke 2 bólmeli páter men avtokóliktiń (Hyundai Santa Fe) kilti berildi.

– Olımpıada oıyndarynda elimniń kók baıraǵyn kókke kóterip, ánuranymyzdy shyrqatý meniń bala kezden bergi armanym bolatyn. Sol maqsatqa jetý jolynda aıanbaı ter tóktim. Jaqsylyq Úshkempirov atamyzdyń tilegin oryndaǵanyma óte qýanyshtymyn. Barsha jankúıerlerime erekshe alǵys aıtqym keledi. Qoldaýlaryńyzdy sezindim. Jerlesterime kóp raqmet! – dedi QR eńbek sińirgen sport sheberi Eldos Smetov.

Saltanatty sharada Olımpıada chempıonynyń jeke jattyqtyrýshysy Ǵalymjan Jylgeldıev te sóz alyp, ortaq maqsat pen tókken terdiń aqtalǵanyn atap ótti.

Eske sala keteıik, Eldos Smetov Parıjde ótken HHHİİİ jazǵy Olımpıada oıyndarynda jeńis tuǵyrynan kórinip, el qorjynyna alǵashqy altyndy saldy. Tatamı sheberi 2016 jyly Rıo Olımpıadasynda kúmis, 2020 jyly Tokıoda ótken tórtjyldyqtyń basty dodasynda qola medaldi enshiledi.

Gala-konsert sońy elimizge tanymal estrada juldyzdarynyń konserttik baǵdarlamasy men otshashýǵa ulasty.

Jambyl oblysy ákiminiń baspasóz qyzmeti