Óz elimizde turyp, óz tilimizde óz máselelerimizdi oı eleginen ótkize almaıtynymyz uıat – Rýslan Jubanysh

Osydan birneshe jyl buryn Astanada qurylǵan Táýelsiz täuel[dı]sız art jobasy biraz ýaqyttan beri Astana, Almaty t.b qalalarynda óner keshin ótkizip keledi. Belgili joba Qańtar qyrǵyny, Reseı basqynshylyǵy, jasandy ıntellekt jáne ekologıalyq másele sıaqty Qazaqstanda jáne álemde bolyp jatqan oqıǵalarǵa ún qatyp, oılaryn batyl aıtyp kele jatqan jastardan quralǵan. 

Jaqynda täuel[dı]sız art jobasy Mádenıet mınıstrliginiń salǵyrttyǵynan qujattan qate jiberip, qorytyndy keshterin ótkize almaı, tosqaýylǵa ushyrap otyrǵandaryn aıtyp, dabyl qaqty.

«Táýelsiz» art jobasynyń avtory ári prodúseri Rýslan Jubanysh osy ýaqytqa deıin uıymnyń jumystary ár qoıylym saıyn senzýraǵa ushyrap kele jatqandyǵyn aıtady. 

–         Biz 5 jyl boıy úlken sahnalarda Jasandy ıntellekt sıaqty jańa tehnologıaraldy paıdalanyp, qalyń kópshilik nazaryna qazaqtyń zamanaýı óneri men poezıasyn usynyp kelemiz. 2019 jyldan beri 6 qalada jalpy myńdaǵan kórermendi qamtyǵan 12 úlken aýqymdy konsert berdik. Onda til, ult máselesi, tarıhymyz, dińgegimiz sıaqty qazaq qoǵamy úshin, ásirese ózekti máselerdi qozǵaýdan esh taısalmadyq. Ár konserttiń aldynda áıteýir bir dırektordan, bir bastyqtan, ne bir dókeıden qysym kórdik dep naqty aıta alamyz. Onyń barlyǵy shymyldyqtyń artynda qalyp otyrdy. Óıtkeni kórermenniń kóńiline obal, komandadaǵy 30 adamnyń aılar boıǵy eńbegine qıanat dep qashan da bar dıplomatıamyzdy salyp, yńǵaıly, ońtaıly bir sheshimin taýyp júrdik, – deıdi.

Sondaı-aq ol árbir qoıylym el arasynda dúrbeleń týǵyzatyndaı bolmasa da, ár kesh saıyn senzýraǵa ushyrap otyratyndyǵyn, eń soraqysy bul jolǵy ótetin qorytyndy keshteriniń ótýine úlken tosqaýyl qoıylyp otyrǵanyn aıtyp, kórermenderden qoldaý kútetinin jetkizdi.

–  Bul joly aldymyzǵa buryn-sońdy kórmegen úlken tosqaýyl qoıylyp otyr. Qorytyndy keshimiz negizi 17 jeltoqsanda ótýi kerek bolatyn. Biraq zaldaǵy jospardan tys jóndeý jumystaryna baılanysty keshimiz 25 qańtarǵa shegerilgen edi. Biz osy kúndi zaldyń ákimshiligimen jáne Mádenıet basqarmasynyń tikeleı ruqsatymen bekitkenbiz. Biraq  bul joly zalda basqa shara ótetinine jáne Mádenıet basqarmasy qujatty qatelesip joldaǵanyna baılanysty qorytyndy keshimiz ótpeıin dep tur. Óz elimizde turyp, óz tilimizde óz máselelerimizdi, óner, mádenıet performans deńgeıinde oı eleginen ótkize almaıtynymyz uıat. Birde bir konsertimizde zańǵa qaıshy qandaı da bir áreketke úndeıtin sózder aıtylǵan emes. Birde bir konsertimizden keıin jurt daýryǵyp, búlik shyǵarǵan emes. Biraq elimizde óz kóleńkesinen qorqyp, qazaqtyń qara sózi men qara óleńiniń parqyna boılaı bermeıtin bas-basyna bı bolǵan óńkeı qıqym jetip jatyr. Eń bastysy, biz aýdıtorıamyzǵa qashanda adal bolyp keldik. Aldymyzda tańdaý turǵanda arymyzdy, abyroıymyzdy oılap, bılet alyp kelgen ár kórermenniń qadirin bilip keldik. Dál osy sátte bir árqaısyńyzdan qoldaý kútemiz, – deıdi Rýslan Jubanysh.

Táýelsiz täuel[dı]sız art jobasy qorytyndy keshterinde «Jerge tabyn adam endi» qoıylymyn qoımaq edi. Onda 1930 jyldardaǵy asharshylyq, 1949-1989 jyldardaǵy Semeı polıgony jáne búgingi ekologıalyq áleýmettik qaýipter týraly kórsetilmek bolǵan.Kesh mazmuny da zamanaýı qazaq poezıasy men Toǵjan Qasenova, Sara Kemeron sıaqty jahan deńgeıindegi ǵalymdardyń eńbegine negizdelgen deıdi joba avtory.