Oblys ortalyǵynan 500 shaqyrym shalǵaıda jatqan Zaısan aýdanynyń turǵyndary kógildir otyndy osydan eki jyl buryn tutyna bastaǵan edi. Búginge deıin aýdan ortalyǵynda júzdegen turǵyn úıge gaz keldi, al keıbir eldi mekenderge gaz qubyrlary tartyla bastaldy. Sol eldi mekenniń biri Keńsaı aýylynda bolǵanymyzda jaǵymdy jańalyqtyń kýási boldyq.
Keńsaı aýyldyq okrýginiń ákimi Talǵatbek Byqaev kire­be­riste qarsy aldy. Shynynda da, aýylǵa kireberiste birneshe jigit «Belarýs» markaly trak­­torynyń kómegimen tereń shuńqyr qaza bastapty. Bular – «Qurylysshy» jaýapkershiligi shekteýli seriktestiginiń basshysy Muratbek Manapov, Ómirbek Gýbashev, Dáýken Tileshov, Aı­dar Smaǵulov degen azamattar eken. Árli-berli ótip jatqan jergilikti turǵyndar qyzyǵýshylyq tanytyp, kógildir otynnyń ıgiligin kóretin boldyq dep rızashylyq tanytýda.
– Keńsaıda 215 úıge gaz tar­­tylady. Amanshylyq bolsa, jyl aıaǵyna deıin qubyr tóseletin shuńqyrlardy ázirlep qoımaqshy. Eldiń qýanyshynda shek joq. Keńsaı aýyldyq okrýgine bes eldi meken qaraıdy. Sarjyra, Sarshı, Baqasý, Jarsý jáne Keńsaıda qazirgi kúnde 2370 adam turyp jatyr. Eki orta mektep, eki ortalaý bilim ordasy bar. Bıyl sharýalar egin naýqanyn ýaqtyly aıaqtady, túsim jaman emes. On myńǵa tarta iri qara, 12 myńdaı qoı-eshki, 1398 jylqy bar. Aýyldaǵy 165 qojalyqtyń ishinde Oralbek Jıenbaev, Raýl Májıtov, Iakov Lı, taǵy basqalar jóninde erekshe atap ketken oryndy. Oralbek jylqy, iri qara ustaıdy, al Raýl 10 gektarǵa qaýyn-qarbyz, qyzanaq, sábiz egip, kókónistiń kóbin satyp, qalǵanyn qysta satý úshin qoımaǵa saqtap qoı­­dy. Al Iakov Lıdi oblys turǵyndary jaqsy biledi desek, artyq aıt­qandyq emes. Ol óziniń balalarymen jáne nemerelerimen birge kókónis egedi, ónimderin oblysqa jóneltedi. Bıyl 500 gektarǵa baqsha daqyldaryn ekti, – dep aýyl ákimi Talǵatbek Faızrahmanov atqaryp jatqan isterinen habardar etti.
Keńsaı aýylyn ara­laǵa­nymyzda jańadan salynyp jat­qan birneshe qurylys ǵı­ma­rattaryn kórip, aýyl áki­miniń iskerligine súısindik. Talǵatbektiń aýyldy basqar­ǵanyna eki jyldan endi assa da, birshama isterdi tyndyryp tastapty. Qasymyzda júrgen Zaısan qalasynyń ákimi Doldan Tojybaev T.Byqaevtyń isker, az sóılep, kóp is tyndyratyn azamat ekenin aıtqan. Shynynda da, birer kúnde iske qosylatyn erkekter men áıelderge arnalǵan monsha, jemis qoımasy, aǵash tiletin seh, mashına jóndeý sheberhanasy aýyldyń ajaryn asha túspek. Al bul qurylys alańdaryn salyp jatqan Saıyn Lambýkov degen isker azamat eken. Saıyn Ulan aýdanynyń azamaty. Budar buryndary da Zaısanǵa kelip, soıa ósirgen. Endi «100 naqty qadam» baǵ­dar­lamasynyń júzege asýyna úles qosyp jatyr.
– Jemis qoımasy aýylǵa qa­jet. Keńsaı aýyldyq okrýginde jemis ósirýmen birneshe qojalyq aınalysady. Al ony saqtaıtyn oryn joq. Demek, aýyl turǵyndarynyń qysy-jazy jemis-jıdekti paıdalanýy aǵzaǵa paıdaly emes pe, – deıdi Saıyn.
Kórkeıgen Keńsaıdaǵy at­qarylyp jatqan ıgi ister osyndaı.

Derekkóz: egemen Qazaqstan