Aqmola oblysynyń ákimi Ser­­geı Kýlagın kóktemgi sý tas­qynynan zardap shekken 40 otbasyna jańa páterlerdiń kiltin tapsyrdy. Qýanysh ıelerin quttyqtaý barysynda óńir basshy­sy mundaı tabıǵı apattyń buryn eshqashan bolmaǵanyn, son­dyq­tan alǵashqy kezekte mektep ǵı­maratynda, týysqandarynyń úıinde turyp jatqan otbasylaryna beriletindigin atap ótti. Budan keıin balaly otbasylarǵa osyndaı kiltter tapsyrylady. Al qalǵan turǵyndar salynyp jatqan úılerdiń paıdalanýǵa berilýine qaraı qonystanatyn bolady.

Úıdi jóndeý men múldem jańa úı salýdyń arasy jer men kókteı, dedi oblys ákimi. Búgin munda búkil aýyl salynyp jatyr jáne bir aı-bir jarym aı shamasynda barlyq úıler paıdalanýǵa beriledi degen úmittemiz. Tasqyn zardaby óte aýyr boldy. Tabıǵı apat bul aýdanda ǵana emes, ózge óńirlerde de oryn aldy. Orazaqtaǵy aýqymdy qurylys bastalmas buryn 5 aýdandaǵy 84 úıdi qalpyna keltirdik. Alǵashynda biz bul máseleni aýdandyq ákimdik deńgeıinde sheshe aldyq. Sońǵy sátte Orazaqtaǵy toǵan joıqyn sýǵa shydas bermedi. Onyń saldary barshańyzǵa málim.

Orazaqta eki páterli 100 úı salynady. Bul 200 páter degen sóz. Buǵan qosymsha Qosshy jáne Aqmol aýyl­darynda taǵy da 90 páterli eki úıdiń qurylysy jedel qarqynmen júrip jatyr. Jumys kólemi óte aýqymdy. Jergilikti turǵyndardyń keıbiri sonda kóshýge tilek bildirdi. Oǵan qarsy emespiz.

Ákim óz sózin jalpy qurylys jumystary­na 2 mıl­­lıard 200 mıllıon teńge qarjy jumsalatyndyǵymen qorytyndylady. Onyń ishinde Orazaq aýylyndaǵy jańa úılerge 1 mıllıard 615 mıllıon teńge ja­ratylmaq. Al 45 páterli eki kóp­qabatty úıdiń quny 320 mıllıon teńgege teń. Orazaqtaǵy úıler qazan aıynyń sońynda, ári barsa 10 qarashada barlyq qolaı­lylyqtarymen paıdalanýǵa beriledi dep josparlanýda. Al tótenshe jaǵdaılar júıesimen salynyp jatqan 45 páterli úıler 20-25 qarashada óz turǵyndaryn qabyldaıdy. Sondaı-aq, ákimniń turǵyndarmen áńgimesi barysynda apattyń aldyn alý maqsatynda aýyl jaǵalaı jańa bógetter salynyp, onyń bıiktigi burynǵy 3 metrdiń ornyna 5 metrge uzartylǵany belgili boldy. Jalpy, oblys aýmaǵyndaǵy sý tasqyny zardabyn tolyq joıý úshin áli de 320 páter salý qajet kórinedi.

Úkimet qaýlysy negizinde tur­­ǵyn úı qurylysyna Úkimet rezervinen 3 mıllıard teńgeden astam maqsatty qarjy bólindi. Atqarylyp jatqan jumystar barysy joǵaryda ataldy. Iaǵnı, jýyq arada 290 selınogradtyq jańa úılerge qonystanatynyna senim mol.

Buǵan qosymsha, «Aqmol aýylyn jylýmen qamtý júıesin qaıta qurý» jobasymen jańa qazandyq salý jumystary aıaqtaldy. Qýattylyǵy saǵatyna 53,8 gkal. bolatyn qazandyq 12,94 shaqyrymdyq jylý jelisin qamtamasyz etedi.

Derekkóz: egemen Qazaqstan