Sonymen, toqsanynshy jyldardyń basynda KSRO delingen alyp memleketke jetpis jyldan astam ýaqyt boıy gegemondyq jasap kelgen KOKP-nyń dámi taýsyldy. Óz ýaqyty ábden pisip-jetilgende Qazaqstan da óz táýelsizdigine ıe boldy. Kompartıa kelmeske ketti. Endigi jerde jańa basqarý qurylymy qandaı bolmaq? Kóp keshikpeı egemen eldiń tizgini prezıdenttik basqarý júıesine kóshetini belgili boldy. Sóıtip, 1991 jyldyń aıaq kezinde elimizde tuńǵysh ret prezıdenttik saılaý ótkizilip, osy joǵary laýazymǵa Nursultan Nazarbaev saılandy.

Al respýblıkadaǵy oblys­tar men qalalardy jáne aýdandardy basqarý úshin ákim­dik basqarý ınstıtýty engizil­di. Bul úrdis 1991 jyldyń 16 jel­­toq­­sanyndaǵy táýelsizdik jarıalanǵan kúnnen keıin kóp keshikpeı ile-shala bastaldy. Eń aldymen oblys, sodan soń qala, aýdan ákimderi taǵaıyndaldy. Kelesi 1992 jyldyń aqpan aıynda ákimdik atty jańa basqarý ıns­tıtýty tolyǵymen jasaqtalyp úlgergenine kýá bola alamyn. Óıtkeni, solardyń biri ózim edim. Men sol 1992 jyldyń 24 aqpany kúni Jańaqala aýdanynyń ákimi bolyp bekitildim. Osy qyzmetti bir aýdanda úzdiksiz 18 jyl boıy atqaryp, óz ótinishim boıynsha qurmetti eńbek demalysyna shyq­tym.

Eń basty aıtaıyn degenim, osy jyldardyń bárinde Tuń­ǵysh Pre­zıdenttiń aýdandyq býyndaǵy ókili retinde Nur­sul­tan Ábish­ulynyń jol jáne jón kórsetýimen el aldyndaǵy jaýapkershilikti teń kóterýge tyrysqanym deı alamyn. Taǵy bir aıta keter másele – 90-shy jyldardyń bas kezinde Jańaqala aýdanynda tótenshe tabıǵı jaǵ­­daı oryn aldy. Kúz aılarynda úzdiksiz seldete jaýǵan jańbyrdyń saldarynan aýdan aýmaǵyndaǵy Máshteksaı, Aıdarhan jáne Jańaqazan aýyl­­­da­ryndaǵy tas balshyqtan soǵylyp salynǵan úılerdiń tóbesi opyrylyp qulaı bastady. Turǵyndarǵa ýaqytsha bas­pana taýyp berýdiń ózi qıynǵa tústi. Osyndaı qysyltaıań kezde Qa­mys Samar eline respýb­lıka basshysy shuǵyl saparmen kelip, tyǵyryqqa tirelgen istiń jaı-kúıimen tanysty. N.Á.Nazarbaev Almatyǵa oral­ǵannan keıin kóp keshikpeı bizge qýanyshty habar kelip jetti. Úkimetten jańa úı sa­lýǵa qajetti qarajat bólinip, mezgildiń qolaı­syz bolǵanyna qaramastan, shaǵa­ladaı sándi úı qurylystary bastalyp ketti.

Sol jyly atalǵan aýyldarda artyq-kemi joq 200 turǵyn úı turǵyzyldy. Sondaǵy el-jurttyń kól-kósir qýanyshy, Nursultan Ábishulynyń atyna bildirgen sheksiz rızashylyqtary men alǵystary áli esimnen ket­peıdi. Úlken kisiniń tıgizgen shapaǵaty degen dál osyndaı-aq bolar.

Egemendiktiń eleń-alańynda bizderdi Almatyǵa aktıvke shaqy­ryp jınaǵan kezinde de, elge kelgen saparlarynda da Nur-aǵań eń aldymen, el-jurttyń jaı-kúıin suraýdy esh umytpaıtyn. Aty-jónimdi atap: «Tólegen, aldymen sen aıtshy, el ne dep jatyr? Halyq bizdiń qolǵa alǵan reformalarymyzdy durys baǵalap otyr ma? Sizder aýyldaǵy aǵa­ıyn­­da­ry­myzǵa bul ótpeli, ýa­qyt­sha qıyndyq ekenin meniń atymnan jaqsylap túsindirip aıtyńyzdar. Táýelsizdik pen derbes el bolýdyń joly eshqashan da jeńil bolmaǵan. Osyny uǵyn­dyryńyzdar. Sizder men bizderdi kútip turǵan is kóp. Ony biz istemegende, kim isteıdi. Ata-babalarymyz ǵumyr boıy táýelsizdikti ańsap, osy jolda bel sheshpeı kúresip ótti emes pe? Soǵan qol jetkize bilgen biz baqytty urpaqpyz. Endi osy tá­­ýelsizdigimizdi ýysymyzdan shyǵaryp almaý úshin qoldan kel­gen­niń barlyǵyn jasaýǵa tıispiz. Artqa qaraı jol joq. Tek qana alǵa umtylýymyz kerek», – deıtin.

Osydan-aq biz Nursultan Ábishulynyń júregi qashanda el, jer dep soǵatynyn ańǵa­ryp, baıqap qalýshy edik. Táýel­sizdiktiń alǵashqy jyldarynan jas memlekettiń jańa basshysy «árqaısymyz elge adal, janashyrlyqpen jáne tereń patrıottyq sezimmen qyzmet jasaı bilýimiz qajet» deıtin. Eń bastysy – búginde Tuńǵysh Prezıdentimiz sóz ben istiń bir­ligin tyǵyz ushtastyra bilgen álem­dik deńgeıdegi tulǵa retinde tanylǵany bárimiz úshin úlken maqtanysh, úlken mereı. Jaqsy adam eldiń baǵy úshin dúnıege keledi degendeı, men Tuńǵysh Prezıdentimizdi Qazaqstan hal­qyn baq pen baqytqa bastaı bil­gen qaıtalanbas tulǵa dep túsinemin.

Derekkóz: Egemen Qazaqstan