– Sulýdy qyz jasynda emes, besik qasynda kór! – deıtin seńgir shyńdaı aǵa sózine den berip. – “Aǵasy bardyń jaǵasy bar” – dep bedeli áleı aqyn aǵasy aldyndaǵy kishilik paryzyna arqalanǵan Erkin shý asaýdaı jal sıpatpaıtyn.       

– Sońymnan ergen tentegim-aı! – dep aǵasy kekilin tarap erkeletetin. Tumsa tabıǵatqa tamsanyp jyr tergen bedeli áleı aqyn aǵasyna oı toǵytyp, boı túzegen baǵa jetpes baqytty balalyq shaq-aı deseńshi! 

– O, Táńirim! Arýaqty elim! – dep alty qyr astynan egemen el ekenin esitip bedeli áleı aqyn aǵasy qýanyshy qoınyna syımaı bórkin aspanǵa atqan. 

– O, ne degeniń! – desip birde bireýi qalmaı báıit aıtyp toılaǵan.  

Bir kezde jaıqalyp arqa-jarqa bolyp birge júretin qaımana el-jurty araǵa jyl salyp qatyn-qalash, bala-shaǵalaryn shubyrtyp qala kóship, qazan-oshaǵyn artynyp qıyr jaılap ketti. Alla bermegendi, paıǵambar bere me?! Ata-jurtynan aýǵan aýyldasyn bedeli áleı aqyn aǵasy júregin shabaqtap tirideı kómip ketkendeı kórgen.    

Kóshede shubyrǵan qalyń mashına qaıshyalysady. Kún-tún tynbaıtyn ý-shý ábden qulaq sarsytty. Saryarqa dańǵylyn salyp uryp qaz tabandap bara jatqan-dy. 

– Erkin! – dedi ashshy bir daýys kósheniń arǵy betinen aıqaı sap.  

– Úıirinen adasyp júrgen kim? – degendeı oǵan údireıe qarasqan. 

– Erkin! – dep shaqyraıǵan kózderden ımenbeı taǵy daýystady ol.  

– Áý, – dep burylmaǵan soń óńmeńdep óńesh qyrnaı berý qolaısyz eken. Jasyl bilte sham tamyp janǵansha ıin tiresken toptyń arasynda aýyzdyqpen alysqan attaı typyrshydy. Jol aıyryqty attap súrine-jyǵyla júgire jónelsin. Alaq-julaq alqynyp baryp shap bere selk etkizsin. Tar kepesh kıgen ábi-tábi júdeý júzin shyramyta almaı Erkin tur, Qudaı qyryna alyp, qyrqynda taz keıipke túsken músápir miskin túrine kirpik qaqpaı qadalyp.

– Qudaı-aı, aman júrsek kóremiz, kúlgen kúle jeter, eki etegin túre jeter, – dep balasha bultıatyn Esen qarttyń, – E-e, Erkinsiń be? – dep meń-zeń jantaıa ketkeni esine túsken. Baıyrqalady. Ákesinen aýmaı qalǵan. Sol sátte-aq bedeli áleı aqyn aǵasy kóz ushynda qazdıyp tura qaldy.    

– Áı, aqymaǵym-aı! Bizde áne-mine degenshe sońynan jeldirip jetemiz, – desin “kúlseń kárige kúl” degendeı emeýrin emizitip. Bedeli áleı aqyn aǵasy aıtpaqshy, taramysqa ilinip qarttyq meńdetpeı-aq qara basyp, taı qulyndaı tebisken Mádıdi tanymaı qalǵanyn qarasańshy!  

– Adam kózi ózgermeıdi deýshi edi? – alǵashqyda ańtarylyp turyp qap, – Mádı! – dep qushaqtaı alyp, – Osy meniń aqyl-esim aýysyp qalǵan joq pa? – degen kúdikti oı qylp etken. – Jıyrma bes jyl zymyrap óte shyǵypty-aý! Eske tússe neler joq, eskirmeıtin táńiri joq, – dedi kúbirlep. Qıaldaǵy oıdyń bári qaz-qalpynda bola berý múmkin emes ǵoı. Tamuq tuńǵıyǵyndaǵy shúńireıińki janardy kórip, – Mádı-aý! Osynsha nege azyp-tozdyń? – dep ot aýyzdy, oraq tildi Arda kep surasyn. – Alma-kezek ómir! Keshe sen, búgin men, erteń ol, barshamyz ótetin ortaq bir jol, – dep bas shulǵyp, bas ıýinen góri bátýálása keter. Bundaı qur qıal, qur tústen qaıta-qaıta aına-qatesiz qozdaı berip ómirden sán qashpaı ma?

Bular burys shyntaqty aınalyp baryp oryndyqqa jaıǵasty. Onyń bileginnen ustaǵan qalpy Mádı bedeli áleı aqyn aǵasy Arda jóninde baǵanadan baıyz tappaı ańyz ete tizbelep aıtyp kelgen.    

– Besik jantaıyp, esik tozdyrǵan bireýdi mise tutqan jaıym bar, – dedi jalpaq murnyn sheńbekteı ýystap, óziniń kesheli-búgingi shetin ómirine oıysyp, – Qudaı buıyrtsa, paıǵambar “qyńq” demeıdi, – dep kókeıdegisin kúlbiltelemeı aqtardy. Sodan zeket aıtyp, ilkidegi jibergen qateliginen keshirim surady.        

– Eshteme de qaz-qalpy qaıtalanbaıdy, – dep ishteı aıap jany ashyǵan. Súıemdeı sıraǵynyń úshkir qara tyrnaǵymen jorǵalap, baletshi bıkeshteı qyldyryq moınyn jelpip kóterip, japadan-jalǵyz jer shoqyp jem tergen kógershin qusqa telmire qarǵan Mádıdiń keıpin músirkegen Erkin oıdan ushqyr, oıdan ozyq eshteme joq ekenine sirá sengendeı. “Bı urǵashyny tegi kúıletedi deıdi ǵoı” desin sý qarańǵy syńar kózdi qusqa qıal qylaýlap túsip. “Soqyr qustyń uıasyn Qudaıdyń ózi qorǵaıdy” degen japadan-jalǵyz sandalyp júrip shaǵylysar shaq izdep abaısyzda aıaǵynan tutylmasa ıgi. 

Julyǵyna sý juqpastaı sylań qaqqan qatynyna qapıada kezigip barmaq shaınaǵan Mádıdiń ókinshi ishinde jatyr. Bıttiń qabyǵyndaı úlp-úlp etken jyltyraqty shókimdep ilip, kirpik ishine shaptap, kúlgin kózildirikti tanaýyna tirep qat-qabat terezeden syǵalaı naıqalyp edi. Onysynda qoıshy. Oınasshyl oıy “óńdi bolsam eken” dep qýtyńdap qylpyńdaǵan. Qulaq estip, kóz kórmegen áreketpen dúńk etkizip es shyǵardy. Qatynynnyń qoldaǵy barǵa emes, joldaǵy joqqa kúılegenin qaıtersiń. Qol-aıaǵy bútin, bir shaqalaq týar degen úkili úmitti jelge ushyrdy. Átteń, átteń deısiń! Bedeli áleı aqyn Arda aǵasynyń anasy tiri bolǵanda, taırańdatyp qoımas edi. Shuralap ap kep boz bıeniń sútine shomyldyryp jyn-shaıtannan alastap jiberýi qaq.

Jumys qańtarylyp, soqyr jarmaqqa jarymaı, bireý-mireý keziger degen aqsaq dáme kóshege jeteledi. Kenet Erkindi kórip qap, ólgen ákesi Esen tirilip kelgendeı aıqaılap jibergen.   

Bir mezet melshıip únsiz otyrdy. Sodan baıaǵyda tanaby keýip tartylyp qalǵan Altynbulaq bastaýynyń kúı-jaıyn estitsin. Jetim qozdaı júdeý-jadaý janary jalt etkende jaı otyndaı tas tóbeni osyp ótken. 

– Oı, táıiri-aı! – dep Erkin oıyn lezge jıa qoıyp. – Tananyń kózindeı kishkene bastaýdy qaıt deısiń, anaý Aral teńizi tartylyp sortań shańdaqqa aınalǵaly qashan, ejelgi atlantıdanyń ǵalam shardan ǵaıyp bolýynyń ózi nege turady, múmkin janar taýlardyń joıqyn jarylysy jutyp áketti dermiz. Qudaı úıgen tóbeni pendesi ketpendep taýysa almaıdy deýshi edi, – desin.    

“Arǵymaq jaby kóriner” dep kókesi Manaq taıbýrylynda básire bergen. Enesi aq boz bıeniń sútine bedeli áleı aqyn aǵasynyń inisi Erkindi derttenbesin desip jórgeginde shomyldyryp ósirdi. Jabaǵyny bastaý sýyna sýaratyn. Birde shylbyrynan ustap, birde qazy moınynan qushaqtap qasynda Nazym júretin. Qıylyp qaraǵan qaraqat kózi sondaı súıkimdi kórinedi.  

Bedeli áleı aqyn aǵasy aldyndaǵy kishilik paryzyna arqalanǵan Erkindi aq bozǵa mingestirip ap mektepke jetkizip salatyn. Qulynynda býryl qulan jalynyń túsi keıtinde bozaryp tutas tula-boıyna sheıin aǵaryp ketti.

Sary atanyń qos órkeshindeı Saýyr taýynyń tip-tik saıynyń qoıyn-qonyshyn qysy-jazy aq qar kók muz qursaýlap, tulym tóbesinen qazbaýyr bulttar jóńkilip jatady. Bir jeri qaǵyr, bir jeri sony bókterinde aq boz kúlte quıryǵyn qynaptan sýyrǵan qanjardaı kóterip, tósin kere, jyltyr baqaıyn serpip jele jónelgende shashasyna shań juqtyrmaı or qoıandaı orǵyp báhra etetin. Býyrqana býsanǵan boz bastaý basynda móldirep Nazym turatyn, bedeli áleı aqyn aǵasyna tas kenedeı jabysqan erdiń artyndaǵy Erkindi qyzyqtap. Etekti taspadaı tilip, doldana kóbik shashyp, quldılap aqqan ózenmen birge dúldildiń tuıaq dúrsili qosylyp uly dalanyń ár tarabyn áldılep áketkendeı erekshe áser áperetin. 

Jyl qusy oralyp jatqan kóktemniń alǵashqy kúni ádetinshe Erkindi mingestirip mektepke jetkizip salyp qaıtqan jolynda gý-gýlesken kisilerdi kórip tizgin irikken.

– Oı, Alla! Esenniń uly baqsy bop ketipti.

– Qaısy eken?  

– Álgi Mádı she.

– Em-dom júrgize me?

– Jo-jo-joq.

– Sýqany súımeıtinderdi súf-lep shoshqa-ǵa aınaldyrady desip júr.

– Sumdyq-aı, ne deıdi? 

– Ol bizdiń Erkinmen birge oqıdy, – dedi bedeli áleı aqyn sambyrlaı kımelep. Kúbir-sybyr sap tyılyp, lezge tarasyp ketken kóptiń jel sózine kámil sener-senbesin bile almaı Arda daǵdaryp qaldy. 

Sol kún, shańqan tús mezgili kól jaǵalap qara ıt jortyp júrgen. Qyzyl tobylǵy kómkergen bulaq sýy kólge quıylǵan ózenniń bas jaǵyndaǵy kómeıden aǵyp kep qosylyp jatyr. 

– Anaý ıt ne oılap barady? – degen Mádı mańǵazdanyp. Bedeli áleı aqyn aldyndaǵy kishilik paryzyna arqalanǵan Erkin ádepki jaǵdaıdan oza ozbyrlana suraǵan Mádımen súzise sóılesti.

– Onyń ishine kirip shyqty deısiń be?  

– Áńgime ana jaqta! – dedi Mádı suq saýsaǵyn kókke nusqap, – Aq saqaldy áýlıe bárin kórip tur.  

– Pishtý! Sóziniń syqpytyn, – dedi Erkin tyjyrynyp.

– Jerdegi jándik qurt qurly qunyń joq.

– Oho, jat planetalyq kelip joıqyn jarylys jasap shabýyldaıdy dep shoshytpaqsyń ba, myna sandyraǵyna meni qoıyp, ǵalymdar senip qalsyn. Qoı sharbysyndaǵy jylaýyq shardaǵy túıirshikke tumsyq suǵyp kúıdirýin qaraı gór, – dedi Erkin qolyn sermep. – Itke ıt sýat basynda jolyǵar, kóldegi balyqqa kóz súzip bolashaqty boljap bal asha ber, – dep ernin jybyrlatyp betin sıpaǵan Mádıge oqty kózin qadaǵan.

– Paı-paı! Jyn da beıimdini qaǵady eken-aý! – dep saıtansha sap etip jetken Arda attan qarǵyp túsip kes-kesteı berdi. – Páli, kóripkeldiń kózin oıyp alsa da ókinbes em, – dedi qyzyl tobylǵy qamshysyn búkteı ustap. Ózi urttap alǵan, shala qyzý, ashýy qara qazandaı, áı-túıge qaramaı qyzyl tilin osqylady-aý. Kenet mańdaıdan shaq etkizip súzip kep ketken. Aspan aınalyp jerge qulap bara jatqandaı. Eki aıaǵy kóterile shalqalap sulap tústi. Arada arashashy Erkinniń ózi bilek sybanyp qarsy júgirgen. Sıyr jalaǵandaı jatqyzyp taralǵan shashyn jeńil sıpap, basyn shulǵyp tastap buryla bergen Madıdiń tumsyq tusyna judyryq júgirtti. Áp-sátte aýzy-muryn qyp-qyzyl qanǵa boıalǵan baqsy Mádı sendele teńselip baryp otyra ketti.

– Qudaı aıamaǵandy qosa soq! – dedi jan-jaǵyna alaqtaı qarap ústi basyn qaǵyp. – Ań atatyn quralmen, zatynan aty úreıli shaıtandy jer jastandyrar em, myltyq turmaq qaryndash ushtaıtyn báki bolmaı qalǵanyn qarashy, – dedi qany qaraıyp. Til-jaqqa súıenip aýzymen oraq ordy demeseń, tyshqan murnyn qanatpaǵan.  

– Perishteniń de mini bar deıdi. “Kórshi haqysy, táńir aqysy”. Kóńilde kek qalmasyn, Qudaı qalǵysa shaıtan oıyna kelgendi isteıdi, –  dedi álgindegi arpaq-qurpaqqa aıaýshylyq sezimi seldegen bedeli áleı aqyn aǵasy sabyr shaqyryp, – Qalaıda Qudaı kórip tur. “Taý aınalmasa da taýdyń tasy aınalar”. Qasqyr paıǵambardan – bir Qudaı artyq ekenin túsindik, soǵan táýbe! – dedi úzeńgige oń aıaǵyn salyp jatyp.    

Bul jetpis jyl dáýrendegen zymystan komýnıs kór jastanǵan tus. Sol bir jyldyń shilińgir jazynda bedeli áleı aqyn aldyndaǵy kishilik paryzyna arqalanǵan inisine shóp shaýyp júrip kezdesken bal arasyn qyzyqty áńgimep bergen-di.

– Kúlli álem qatygez de, meıirimdi de emes. Mynaý aranyń uıashyǵyn buzyp ashýlandyryp ýymen shaqtyrsań paıdaly, balyn jeseń emdik áseri de ushan-teńiz, mamyq jaılap myńdap jumyrtqa salatyn olardyń ózi shaǵyp alǵan soń sút pisirim mezgil óter-ótpesten ólip qalatynyna eriksiz qaıran qalasyń. Ómir súrý ońaı deımisiń! Baǵzyda babalarymyz “Ashynyń bári dári ý-dan basqa, táttiniń bári ý baldan basqa” dep jaıdan-jaı aıta salmasa kerek. Jarǵaq qanat jaryqtyq erkekteri úlken uıashyqta jalǵyz urǵashy aranyń qý tirshilik qamyty úshin uryq sebelep, alajazdaı balaýyz tazalap qalt-qult júrip ótedi eken, – dedi shalǵy sabyn shymǵa tirep, qolyn onyń ústine aıqastyryp qoıyp mańdaıyna kóleńke qalqalap, túıe qumalaǵyndaı qujynaǵan aralarǵa qarap sózin ázil aralas qyzdyra túsip. – Só-ó-óı-tip. – dedi áýelgi áýenge oralyp. – Osylaı shalǵy sabyn tireı súıenip beıqam turǵan bir orysqa, anadaıda ótip bara jatqan bir orys “zdrastı” desin basyn shulǵyp, bu da “zdrastı” desin ıegin kókke qaraı silke kóterip qap. Sol sátte shalǵynyń júzi sorlynyń uzyn murnyn qaǵyp qyrqyp túsiripti...         

Atty kisi jele jortyp jetip baratyn tústik jerdegi marqum Manaqtyń ákesi jatqan qarǵys atqyr Karlagqa jotada turyp kóz júgirtken bul ekeý, sonaý germanıadaǵy Asvensýmde myń bir azappen qan jutqan talaı jandar týraly, jezdesi Arda qaıtqanda kelgen Nazymnyń sóz arasynda áredik esitken. Sol aıtqandardy eske alysty. Qudaıdyń sulý nyǵmeti tal boıyna buıyrǵan qyz sýret salýǵa qumar. Saǵynyp sarǵaıyp júrsem maýqymdy basam-dep, aq boz attyń sýretin syzyp áketken. Sonda ózin áli umyta almaı júrgenin ishteı sezdi.

Kúreń beldi máńgilik meken etken Manaq basymnan ótken qyıly ómir jolym qasyret shegip, zar ılegen kúlli bir ulttyń qasynda túkke turǵysyz degen. Ómirde adaldyq ar joly buıyrǵan adam baqytty deıtin ol.

– Qudaıdyń tizesine otyra ketkisi keletin Alla Taǵalanyń jar degende jalǵyz uly sıaqty erkeleımiz, – degen marqumnyń qonaǵasynda kónekóz kórshi qurdasy Mádıdiń ákesi Esen, – Adamnyń basy – Allanyń doby. Soǵan qarap Manaqtyń tilegen tilegin bergen. Tarıhtaǵy keıbir qatelikter úshin Qudaı da ózin keshirmes. Pende kúızelse jalbarynady, suraǵandy bermese, sen ne kórsetpediń dep qarǵanady, basyn taýǵa da, tasqa da uryp ábden dińkeleıdi, – dep kúńirene kúrsingen. Jaryq dúnıeniń tún irgesin túre kún kóterilgende súıek jer qoıyna tapsyryldy. Birinen soń biri ketip azaıyp jatqan kóne kóz qarıalardy qımaı taǵy bir kún batyp bara jatty. 

Qorqyt babanyń kúmbirli qobyz únin alǵash esitken Manaq edi. Bul bal-bul es toqtatqan kez bolatyn. Sol qobyzdy qaıtyp qolyna almaı ketken Manaq bertinde qumalaq salyp bal ashatyn. – Qyryq bir qumalaq biledi degen kiside es joq, ólgen ákem tirilip kele me deshi, esikten tórge deıin súıinshi, ázir jetedi deıdi, – deıtin ol kúlip. Sodan birdeme juqty ma, tereze aldyna alshysynan asyq qoıyp qoıatyn. Sol asyǵyn baǵana úıden shyǵarda tizege qaǵyp úıirip kep jibergende alshysynan túsken. Sonyń aldynda ǵana qońyraý shyryldap edi. 

– Úsh kúnnen keıin tańǵy beste áýejaıda bolamyn, – degen syńǵyrly ún. Qońyraýdy germanıadan shalǵan Nazym edi. Kútip alatyna qýandy. Qudyrettiń ámirin deshi! Bar-joǵy múlde umytylǵan Mádı tosattan kezdese ketken. 

Bedeli áleı aqyn aǵasy aldyndaǵy kishilik paryzyna arqalanyp inisi shyr aınalyp júrgen jyndy tusaqtyń jynyn alysyp, tesilgen tóbesine qurym kıiz jamap tigisken. Qońyr kúzde junttaı semirgen sol qoıdy “mal ıesi Qudaıdan” dep aǵasy soıyp aldy, biraq qoıdyń mıynan eshkimge dám tatyrmaı qoıǵan.

– Jyndy qoıdyń mıyn qoıyp, etin jep, sorpasyn ishýge bolmas. – degen Arda badyraıa qarap. Sodan kóp ótpeı, Mádıdi jyn soǵyp ketipti degen sóz aıaq astynan tarap kep ketsin.

– “Qudaı ózgerister dáýirinde týyp ósýden saqtasyn” deıdi eken ejelgi qytaılar. Osyndaı kezde ásirese baqsy-báliger kóbeıip ketedi, – dedi Arda komýnıstik partıa qulaı sala, jyn qondy desip jar salyp, talaı qatynnyń ishindegi balasyn túsire jazdaǵan Mádıdiń sáýegeıligine muryn shúıirip. Kim bilsin, dám-tuz taýsylyp sarqyldy ma? Mádıdiń jyny basylyp, bir jyl óte bere Arda aıaq astynan qaıtys bolyp, Manaqty aýyr qaıǵyǵa batyryp ketken. Ólimge shara joq. Peshenedegi jazý solaı bolar. Sodan kóp uzamaı Manaq ta kóz jumǵan.

– Ertede aspan qudaılaryna arnap qurbandyqqa aq boz at shalyp, eki dúnıe arasyn jalǵaımyz degen el aýzyndaǵy ápsana edi, – dep bedeli áleı aqyn aǵasy aldyndaǵy kishilik paryzyna arqalanǵan inisi aq boz atty arnaıy tuldap qur qoıa bergen. Aǵasynyń jyldyq asyna aqbozdy jetektep alyp kelgende kóz kórgen jurttyń janaryna jas úıirildi. 

Astana, Qaraǵandy ortasyndaǵy eldi mekendegi Manaqtyń muńlyq jesiri, aq samaıyn jaýlyǵynyń ishine jasyryp, kórshi kempirmen álde neni sybyrlasa sóz etisip otyrǵan, aman-saýlyq surasyp Erkinmen birge ishke kirip kelgen Mádıdi kórgen jerde bas sap jylady.   

Ol syrtqa shyǵyp temeki tamyzdy. Ashshy tútin Erkiniń qolqasyn qapty. Aýyldyń myjyraıǵan murjasynan uıtqytyp ushqandaı tanaýynan býdaqtaǵan kók tútin saýsaǵyn myspen qaptaǵandaı sap-sary qyp jibergen, andaǵaılaǵan murty ystalyp bitken, aqsıyp kúlgende arsıǵan tisteriniń túbi shirigeni álden baıqalady.  

– Áıel balaǵa tyrtıǵan sholaq kıim kıý jaraspaıdy, – dedi satýshy qaratory ádemi qyzǵa shúıligip. – Tobanaıaq bolsań bálem sıyrdyń shýyndaı shubyrtyp kıip alar ediń, – dep baqaıynan basyna súze qaraǵan. Qyz “mynaý bir quj ǵoı” dep tomsyraıyp turyp temeki qorabyn sórege qaraı laqtyryp tastaı saldy.  

Baıaǵyda el aman, jurt tynyshta, kóz almaı qaraıtyn kógildir kók jáshik joqta, «Abaı joly» romanyn baıy oqyp bergen, qara tory kelinshegi móltildep tyńdaǵan. Sońyra qara tory ajary taımaǵan tolysqan báıbishe boldy. Basyna jastap oqıtyn zańǵar klasıktiń kitabynyń janynda eleýsizdeý bir tútin býdatqysh jatatyn. Ol kezde bul ekeýi ógiz shekken temir shanamen tezek teretin. Álginde, apaq-sapaqta, bular kirip kelgen kezde, ıyǵyna kórpeshe jamylǵan qara kempir eskirgen sol bir kúnderin kórshi kempirdiń qulaǵynda qońyrsytqan. Altaı asyp qystap júrgende úsh metr barqyt mata ákelgen týysqanyna taılaq ingendi syıǵa tartyp jetektetip jiberetin qaınysy Arda. – Áı, jeńgeshe osy sóziń túptiń túbi ózińdi aınalyp baryp taýyp júrmeı me? – deıtin ańqyldap mahorkasin qaǵazǵa jýandap orap ap qushyrlana soryp.   

Qar jaýyp, boqyraýynnyń sýyǵy túse salysymen, baý-baqshanyń dýaly keptelse boldy saýsaǵyna túkirip, myqynynan syrǵyp turmaıtyn shalbarynyń yshqyryn kóterip qoıyp qan sorpasy aǵyp, qara jonynan bý burqyrap Mádı qar kúreıtin. Kózáınek taqqan kókbet qatyndy alǵaly o tirlikter ádirem qaldy.     

Bala murtyn syıpap, qasyna qaqqan qazyqtaı Mádıdi qadap qoıyp, qyz ańdyǵan kez saǵymǵa aınalǵan. Qutyrǵannan qutylý qıampurys qylyq bola qoımas. Begimsal boıyn bútindep, tıyn-tebenin qolyna ustatyp jolǵa salǵan. 

Azan shaqyrǵan áteshteı qabyrǵadaǵy qońyraý shyryldap ala jónelsin. Bir jarym saǵattan soń ushaq qonady. Atyp turyp tereze aldyna barǵan. Batys teriskeı jıekte aqbozat juldyzy jarqyrap kózge uryp tur. Aq ulpa qar jamylyp appaq dala jatyr, pák mahabbat, ystyq qushaqty jasyryp. Shirkin! Mahabbat...

Baǵaı Nazarbaıuly