بۇگىندە قازاق ەلى ناۋرىز مەيرامى سەكىلدى، جاڭارىپ، تۇرلەنىپ كەلەدى. بۇكىل عالامدا كۇن مەن ءتۇن تەڭەلسە، ال قازاقستان بولاشاققا جاڭا قاداممەن، سەنىمدى اتتانىپ بارادى. ەگەر ءبىز شىنىمەنەن الەمدەگى باسەكەگە قابىلەتتى 50 ەلدىڭ قاتارىنا كىرگىمىز كەلسە جانە ولاردىڭ ءبىرشاماسىنان وزعىمىز كەلسە وندا ءبىز ءوزارا اۋىزبىرلىكتى ساقتاپ قانا قويماي، وسى ماقساتقا جەتۋ ءۇشىن ءبىر اتانىڭ بالاسىنداي جۇمىس ىستەۋىمىز كەرەك. *** تاريحى تەرەڭدە جاتقان ناۋرىز مەرەكەسى قازاق جەرىندە ءارقاشان تويلانعان، الايدا، ءبىر زامانداردا حالقىمىز ونى جوعالتىپ الدى. ەلىمىز تاۋەلسىزدىك العاننان كەيىن ءتول مەرەكەمىزدى ءبىز قايتادان جاڭعىرتتىق. بۇل مەرەكە ءارۋاقىتتا حالقىمىزدا ىرگەسى سوگىلمەگەن بىرلىكتىڭ، ەڭسەلى ەرلىكتىڭ، ىرىس پەن باق-بەرەكەنىڭ مەرەكەسى بولىپ سانالاتىن. قىستان، قيىننان شىققان حالقىمىز بىر-بىرىمەن قاۋىشىپ، ءتوس ءتۇيىستىرىپ، اعايىننىڭ امانشىلىعىن ءبىلىپ، وتكەنگە سالاۋات ايتىپ، كەلەشەكتەن باقىت تىلەپ، ناۋرىز كوجە ىشەتىن بولعان. بۇل كۇنى ۇرىسقان اعايىن تابىساتىن، رەنجىسىپ قالعان جاستار قايتادان تابىسىپ، ماحابباتتارىن ارتتىرىپ، باس قوساتىن، بارلىق جامانشىلىق ۇمىتىلاتىن، جاقسىلىققا قاراي بەت بۇراتىن كەز بولعان. تۇبىندە ءبىزدىڭ ناعىز جاڭا جىلىمىز وسى ناۋرىز مەيرامى بولۋى قاجەت. جۇڭگو ءوزىنىڭ جاڭا جىلىن اقپاننىڭ ورتاسىندا ءبىر اپتا تويلايدى. شىعىستىڭ بارلىق حالقىنىڭ ءوز جاڭا جىلدارى بار. ءبىز دە تۇبىندە ءوز مەرەكەمىزگە كەلۋىمىز كەرەك.