قاجىلىق – مۇسىلماننىڭ بەس پارىزىنىڭ ءبىرى. الايدا زەكەت سياقتى قاجىلىق تا تەك جاعدايى جەتكەن ادامدارعا عانا پارىز بولعاندىقتان، ادەتتە بۇل عيبادات جايلى كوپ ايتىلا بەرمەيدى، ءتىپتى كەيدە كولەڭكەدە دە قالىپ جاتادى. بىلتىر اللانىڭ قالاۋىمەن قاجىلىق پارىزىن وتەۋ باقىتى بىزگە دە بۇيىردى. وسى ماقالادا قاجىلىق پارىزىنىڭ مۇسىلمان ومىرىندە قانشالىقتى ماڭىزدى ەكەندىگى جايلى وي قوزعاپ، اراسىندا ءوز تاجىريبەممەن دە بولىسكىم كەپ تۇر.

قاجىلىققا اتتانباستان بۇرىن اركىم «قاجىلىققا قانداي ماقساتپەن بارامىن؟»، «قانداي ناتيجەلەرگە قول جەتكىزەمىن؟» دەگەن ساۋالدارعا جاۋاپ ىزدەۋى كەرەك. ءوزى ءۇشىن وسىلاردى ايقىنداپ العان ادام قاجىلىقتىڭ ءمان-ماڭىزىن تەرەڭ تۇسىنەدى ءارى وزگەلەرگە دە جەتكىزە الادى. قاجىلىعىن وتەپ بولعان سوڭ العا قويعان ماقساتتارىنا، كوزدەگەن ناتيجەلەرىنە جەتكەن، جەتپەگەنى جايلى وز-وزىنە ەسەپ بەرەتىن بولادى. قاجىلىققا بارۋدىڭ نەگىزگى ماقساتتارى مەن سەبەپتەرىنىڭ ءارقايسىسىنا توقتالىپ كەتسەم دەپ ەدىم:

1.     اللانىڭ بۇيىرعان پارىزىن ورىنداۋ

ءبىراز ايات-حاديستەردە قاجىلىقتىڭ ادامعا جۇكتەلگەن پارىز ەكەندىگى ايتىلادى. ماسەلەن، «ول جەرگە بارۋعا شاماسى جەتكەن بارلىق ادامعا اللا ءۇشىن قاجىلىق جاساۋ پارىز» («ءالي يمران» سۇرەسى، 97-ايات). پايعامبارىمىزدىڭ (وعان اللانىڭ يگىلىگى مەن سالەمى بولسىن) «كۇمانسىز اللا تاعالا سىزدەرگە قاجىلىقتى پارىز قىلدى، قاجىلىقتى ورىنداڭىزدار» (مۋسليم) جانە «راببىلارىڭنىڭ ۇيىنە قاجىلىق ەتىڭدەر» (ءمۋسناد احماد) دەگەن حاديستەرى دە بار. مۇسىلمان ادام قاجىلىقتى ەڭ اۋەلى بەس پارىزىنىڭ ءبىرى رەتىندە قابىلدايدى. سول پارىزدى ورىنداۋ ارقىلى اللانىڭ رازىلىعىنا، ءجانناتىنا جەتۋدى كوزدەيدى. اللاعا ەڭ ۇنامدى ىستەر – ونىڭ پارىز ەتىپ بەكىتكەن امالدارى. ءاربىر مۇسىلماننىڭ جۇرەگىندە بايتۋللاھتى ومىرىندە ءبىر رەت بولسا دا، زيارات ەتۋگە دەگەن ۇمتىلىس، سوعان دەگەن زور ىنتىزارلىق بولۋى كەرەك. اللاعا شۇكىر، قازىرگى تاڭدا بۇرىنعى زامانمەن سالىستىرعاندا قاجىلىق پارىزىن وتەۋ الدەقايدا جەڭىل. كەزىندە اتا-بابالارىمىز الىستان ات ارىتىپ، ارىپ-اشىپ قاسيەتتى مەككە-ماديناعا جەتەتىن. بۇگىندە ميلليونداردىڭ اڭساعان مەكەنىنە ۇشاقپەن بار-جوعى 5-6 ساعاتتا جەتە قوياسىز. وسى جەردە اللانىڭ بىزگە بەرگەن تاعى ءبىر جەڭىلدىگى جايلى دا ايتا كەتۋ كەرەك. بۇگىندە قازاقستاننان جىلىنا 3000 ادام قاجىلىققا اتتانا الادى. نەگىزى ساۋد ارابياسى ءار مەملەكەتكە قاجىلىق كۆوتالارىن ۇلەستىرگەندە، ءاربىر ميلليون مۇسىلمانعا 1000 كۆوتادان بەرەدى ەكەن. بىزدە شارتتى تۇردە 10 ميلليون مۇسىلمان تۇرادى دەپ الساق، 10 000-عا دەيىن كۆوتا الۋعا مۇمكىندىگىمىز بار. الايدا بىزگە بەرىلگەن 3000 ورىننىڭ ءوزى تولماي جاتادى. باسقا ەلدەردە جاعداي كۇردەلىرەك. ماسەلەن، 60 ميلليون مۇسىلمانى بار مالايزيادا قاجىلىققا نيەتتەنگەندەر جىلدار بويى كەزەگىن كۇتەدى ەكەن. كورشىلەس قىرعىز ەلىندە جەرەبە تارتادى دەگەندى ەستىدىك. بىزگە، قازاقستاندىقتارعا، قاجىلىققا ەش كەدەرگىسىز بارۋعا مۇمكىندىك جاساعان اللاعا سانسىز شۇكىرلەر ايتىپ، بەسىنشى پارىزىمىزدى وتەۋگە اسىعۋىمىز كەرەك.

2.     قاجىلىقتىڭ پايدالارىنا قول جەتكىزۋ

«قاجىلىق پەن ۇمرانى قاتار جاساڭدار. ويتكەنى تەمىر، التىن جانە كۇمىستىڭ داعىن كورىكتىڭ كەتىرگەنى سەكىلدى قاجىلىق پەن ۇمرا كەدەيلىك پەن كۇنالاردى جوق قىلادى» (تيرميزي)، «قاجىلىق جاساۋشىلار مەن ۇمراعا بارعاندار – اللانىڭ سىيلى قوناقتارى. ەگەر بۇلار تىلەك تىلەسە، اللا تىلەكتەرىن قابىل الادى، كۇنالارىنا كەشىرىم سۇراسا، كۇنالارىن كەشىرەدى» (يبن ءماجا) دەگەن حاديستەر قاجىلىقتىڭ ماڭىزىن ايقىنداي تۇسكەندەي. قاجىلىقتا رۋحاني، ماتەريالدىق جانە فيزيكالىق كوپتەگەن پايدالار بار. قاجىلىققا اتتانعان ادام اللانىڭ قورعاۋىندا بولىپ، زور ساۋاپقا كەنەلەدى. ماسەلەن، نۇرلى ءمادينا قالاسىنداعى پايعامبار مەشىتىندە وقىلعان ءبىر ناماز باسقا جەردە وقىلعان نامازدان ساۋابى جاعىنان 1000 ەسە ارتىق. ال ءال-حارامداعى ءبىر ناماز باسقا جەردەگى 100 000 نامازعا تەڭ. ءتىپتى حارام ايماعىنداعى ءاربىر ساۋاپتى امال 100 000-عا ەسەلەنەدى ەكەن. سونىمەن قاتار، قاجىلىق راسىمدەرىن تولىق وتەگەن ادامنىڭ بەينە ءبىر ەمدىك تەراپيادان وتكەندەي، دەنساۋلىعى جاقسارا تۇسەدى. مىسالى، قاجىلاردىڭ ءزام-زام سۋىن كۇندە ىشۋگە مۇمكىندىگى بار. ال ول ءوز كەزەگىندە دەنساۋلىقتىڭ تۇزەلىپ، كوپتەگەن اۋرۋلاردان ايىعۋعا سەبەپ بولادى. «كىم ءزام-زامدى قانداي نيەتپەن ىشكەن بولسا، سول نيەتىنە جەتەدى: اۋرۋىنان جازىلۋ ءۇشىن ىشسە، ەم بولادى، ءشولىن قاندىرۋ، تويۋ ءۇشىن ىشسە، ءشولى قانادى، توقتىق سەزىمى پايدا بولادى» دەگەن ماعىناداعى پايعامبارىمىزدىڭ (وعان اللانىڭ يگىلىگى مەن سالەمى بولسىن) سوزدەرى بار. ال ءتاۋاپ جاساۋدىڭ ءوزى ادامعا ەداۋىر ەنەرگيا بەرەدى. بۇگىندە عالىمدار مەككەنىڭ – جەر كىندىگى، ال قاعبانىڭ مەككە كىندىگى ەكەنىن جانە ول جەردە ادامعا جەردىڭ ماگنيت ءورىسى اسەر ەتپەيتىنىن دالەلدەپ وتىر. ياعني، قاعبانى ساعات تىلىنە قارسى جەتى مارتە اينالعان ادام شارشامايدى، كەرىسىنشە بويىنا كۇش-قۋات جينايدى. جاستاردان ەش قالىسپاي، بىرنەشە رەتتەن ءتاۋاپ جاساپ جۇرگەن كوپتەگەن قارت ادامداردى كوردىك. ەلدە جۇرگەندە سۇيەكتەرى قاقساعان بولسا، ودان دا ايىعىپ جاتتى. ارقاسى، بەلى اۋىرعان بولسا، ونىڭ دىمى بىلىنبەي كەتتى. تاعى ءبىر ايتا كەتەرلىك نارسە، مەككەدە اۋاداعى وتتەگى ۇلەسى وزگە جەرلەرمەن سالىستىرعاندا 30%-عا ارتىق ەكەن. وتتەگىنىڭ ادام ومىرىندەگى ورنى جايلى ايتپاسا دا، تۇسىنىكتى. وسىنداي زور پايدالاردىڭ ءوزى ءۇشىن دە قاجىلىققا بارۋعا تىرىسۋىمىز كەرەك.

3.     پەندەنىڭ اللا الدىنداعى دارمەنسىزدىگىن، وعان مۇقتاجدىعىن سەزىنۋى جانە بويىندا وعان مويىنسۇنۋدى تاربيەلەۋى.

وزگە قۇلشىلىقتارمەن سالىستىرعاندا قاجىلىق كەزىندە ءوزىڭنىڭ شىنايى تابيعاتىڭدى، قايدان كەلىپ، قايدا باراتىنىڭدى تەرەڭ سەزىنەسىڭ. كۇندەلىكتى تىرلىكتە تاعىپ جۇرگەن ءتۇرلى ماسكالارىڭ شەشىلەدى. قىسقاسى، ءوز پەندەلىك اقيقاتىڭدى بىلەسىڭ. جالپى ۇلكەن قاجىلىق يحرام كيىپ، ءتالبيا ايتىپ، ميناعا جول جۇرۋدەن باستالادى. يحرام كۇيىندە ءبىراز نارسە رۇقسات ەتىلمەگەن امالداردىڭ قاتارىنا وتەدى. مىسالى، تىرناق، شاش الۋعا، ءيىسسۋ، سابىن قولدانۋعا، جۇبايىڭمەن جاقىنداسۋعا بولمايدى. ۇرسىسۋ، جانجالداسۋعا رۇقسات جوق. «قاجىلىعىم قابىل بولسىن» دەگەن مۇسىلمان ءاربىر ىسىنە مۇقيات قاراپ، ساقتىعى، تاقۋالىعى ارتادى. ءسويتىپ قاجىلار ەڭ اۋەلى قاجىلار ءۇشىن ارنايى شاتىرلار تىگىلگەن مينا دەگەن جەرگە كەپ تابان تىرەيدى. ءبىز دە كوپتىڭ ءبىرى بولىپ ءوز شاتىرىمىزعا كەلىپ، كىردىك. شىنى كەرەك، بۇل جەردەگى جاعداي مەككەدەگى قوناقۇيىمىزدەن قولايلىلىعى جاعىنان الدەقايدا تومەن بولدى. كىلەمدەر توسەلگەن، جەلدەتكىش قوسۋلى. ءبىر شاتىردا 32 ادام جاتادى. ءبىر ادامعا ءبىر جاتىن ورىن، بولدى. باسىندا ءبىراز قولايسىزدىق تۋدىرعانى راس. كەيىن ۇيرەنىپ كەتتىك. كەلەسى كۇنى ارافاتتى بەتكە الدىق. ول جەردە كۇن باتقانشا دۇعادا بولۋىمىز كەرەك. ارافاتتا ميناداعىداي شاتىر دا جوق، جەلدەتكىش تە، كىلەم دە جوق. تەك ءۇستى جابىلعان لاشىقتار جانە استىمىزدا كىلەمشەلەر بولدى. كۇن بولسا، وتە ىستىق. ءارى ۇستىمىزدەگى يحرام دا قولايسىزدىق تۋدىردى. سوندا دا دۇعامىزدى، قۇلشىلىعىمىزدى جاساي بەردىك. كۇن باتقان سوڭ، مۇزداليفاعا تۇنەۋگە اتتاندىق. مۇزداليفاعا جەتكەندە، «ءناپسىنىڭ ناعىز جەڭىلەتىن جەرى وسى-اۋ» دەپ قالدىم. سەبەبى وندا قارا جەردەن باسقا ەشتەڭە بولمادى. اشىق اسپان استىندا جەرگە جاينامازدارىمىزدى توسەپ، جاتا كەتتىك. ىشىندە ءمينيسترى بار، بايى بار – ءبارى-بارى وسىندا. ادەمى، قىمبات كيىمدەر كيىپ جۇرگەن ادام دا وسى جەردە ءوز اقيقاتىن تانيدى. تاكاپپارلىق، مەنمەندىك، ماقتانشاقتىق سىندى قاسيەتتەردىڭ ءبارى وسى جەردە ولەدى دەپ ويلايسىڭ.  كۇنى بويى شارشاعاندىق بار، ۇيىقتاي كەتتىك. تاڭ نامازعا تۇرعاندا، عاجايىپ كورىنىسكە كۋا بولدىق. يحرام كيگەن ادامدار ورنىنان تۇرىپ جاتقاندا، قيامەتتە قابىرلەرىنەن قايتا ءتىرىلىپ تۇرىپ جاتقان ادامداردى كوز الدىڭا اكەلگەندەي بولادى ەكەن. جالپى قاجىلىقتا اقىرەتكە كوپتەگەن يشارالار بار. ماسەلەن، سافا مەن ءمارۋا اراسىندا ساعي جاساپ، جەتى رەت ارى-بەرى جۇگىرگەندە، قيامەتتە شاپاعات ىزدەپ ءدال وسىلاي اۋرە-سارساڭ بوپ، ارى-بەرى جۇگىرەتىنىڭدى ەسكە الاسىڭ. 3-4 ساعاتتىق ۇيقىدان سوڭ، شايتانعا تاس اتۋعا جاماراتقا بەت تۇزەدىك. ول كۇنى كۇش-دارمەن ازايىپ، ۇيقى قانباي، شاڭ-شاڭ بولعان كۇيدە ەدىك. سول ساتتە ءوز دارمەنسىزدىگىمدى، اللانىڭ ۇلىقتىعىنىڭ الدىندا ءوزىمنىڭ السىزدىگىمدى، وعان مۇقتاجدىعىمدى ەرەكشە سەزىندىم. قۇلشىلىقتان شارشاۋدىڭ وزىندىك ءلاززاتى بولادى ەكەن. ناپسىگە اۋىر تيەتىن امالداردى ورىنداپ، اللاعا مويىنسۇنۋدىڭ، قۇلشىلىق ەتۋدىڭ پارقىن بىلگەندەي بولدىم. شايتانعا تاس اتىپ كەلگەن سوڭ، ميناداعى شاتىرىمىزعا قايتا ورالدىق. جول بويى ارافاتتاعى، مۇزداليفاداعى قولايسىزدىقتاردى كورگەن سوڭ، الگى باس كەزىندە جاقتىرماعان شاتىرىمىز بەس جۇلدىزدى قوناقۇيدەن دە ارتىق بوپ كەتكەندەي كورىندى. جالپى قاجىلىق وزىندىك ماشاقاتى بار كىشىگىرىم ءبىر ساپار ىسپەتتەس. وسى ساپار كەزىندە سابىر، اللانىڭ امىرلەرىنە تولىقتاي بويۇسىنۋ، ءناپسىڭدى تەجەۋ سىندى قاسيەتتەر جاقسى تاربيەلەنەدى. ءناپسىسىن سىندىرىپ، وزگەرگىسى كەپ جۇرگەن پەندەلەر قاجىلىق جاساۋعا اسىقسىن دەر ەدىم.

 4.     يسلامداعى جاسامپاز باۋىرلاستىقتى سەزىنۋ.

قاجىلىق ماۋسىمىندا قاسيەتتى جەرلەردى 2 ميلليونداي ادام زيارات ەتەدى ەكەن. ءتۇرلى ۇلت پەن ۇلىس وكىلدەرى جەر شارىنىڭ ءار تاراپىنان اللانىڭ رازىلىعىن ىزدەپ كەلەدى. ءار ۇلتتىڭ وزىنە ءتان كيىمى، ادەتتەرى بولادى. سونى قاجىلىقتا ەرەكشە بايقايسىڭ. مالايزيالىقتاردىڭ، يندونەزيالىقتاردىڭ، تۇرىكتەردىڭ جيناقىلىعىنا، ۇيىمشىلدىعىنا، افريكالىقتاردىڭ ومىرگە دەگەن ءپوزيتيۆتى كوزقاراسىنا، ارابتاردىڭ دارحاندىعىنا، قوناقجايلىلىعىنا كۋا بولدىق. ءتۇرى-تۇسى، ءتىلى ءارتۇرلى دىندەس باۋىرلارىڭمەن نامازدا ءبىر ساپتا تۇرعاندا، ەرەكشە كۇيگە بولەنەسىڭ. ءار تىلدە سويلەيتىن جەردىڭ ءار تۇكپىرىنەن كەلگەن ءبىرىن ءبىرى تانىمايتىن ءجۇز مىڭداعان ادامنىڭ ازانشى ايتقان قاماتتان كەيىن بىر-ەكى مينۋت ىشىندە ءتۇپ-تۇزۋ ساپ تۇزەپ تۇرا قالعانى عاجاپ ەمەي نەمەنە؟! ءبارىنىڭ نيەتى، تىلەگى ءبىر. ءبارىن بىرىكتىرەتىن ءبىر عانا نارسە – اللاعا دەگەن يمانى، ماحابباتى. قاجىلىق كەزىندە وزگە ەلدەردىڭ قاجىلارىمەن تىلدەسىپ ەدىم. ولاردىڭ ەلدەرىندەگى جاعدايدى، قاجىلىققا قالاي كەلگەنىن سۇراستىرۋ ارقىلى دۇنيەتانىمىم ءبىراز كەڭىگەندەي بوپ قالدى. ءتىل تابىسۋ جەڭىل بولدى. سەبەبى جۇرەكتەرىمىز اللا دەپ سوقتى. «ءاي ادام بالاسى! ءشۇباسىز سەندەردى ءبىر ەر، ءبىر ايەلدەن (ادام اتامەن حاۋا انادان) جاراتتىق. سونداي-اق بىر-بىرلەرىڭدى تانۋلارىڭ ءۇشىن ۇلتتارمەن ۇلىستارعا بولدىك. راسىندا اللا الدىندا ەڭ ابىرويلىلارىڭ  تاقۋالارىڭ  (اللادان شىنايى تۇردە قورىققاندارىڭ). اللا بارلىق نارسەنى تولىق ءبىلۋشى، بارلىعىنان حاباردار» (حۋجۋرات سۇرەسى، 13-ايات) دەگەن اللا سوزدەرىنىڭ ومىردەگى كورىنىسىنە كۋا بولدىم. مۇسىلماندار اراسىنداعى جاسامپاز باۋىرلاستىقتى، سوبەن ايتىپ جەتكىزە الماس ءوزارا ماحاببات، سۇيىسپەنشىلىكتى سەزىنگىسى كەلگەن ادام بايتۋللاھتى بەتكە السىن.

 5.     اللانىڭ قۇلدارىنا دايىنداعان سىيلارىنا قول جەتكىزۋ.

قاجىلىق پارىزىن وتەگەن ءمۇمىن ادام اللانىڭ وعان دايىنداعان سىيلارىنا قول جەتكىزۋدەن ءۇمىت ەتەدى. ال ول سىيلاردىڭ قانداي ەكەنىن پەندە بىلسە، ءومىر بويى قاجىلىق جاساسام عوي دەپ ارماندايتىن ەدى. پايعامبارىمىزدىڭ (وعان اللانىڭ يگىلىگى مەن سالەمى بولسىن) «ۇمرا ۇمراعا دەيىنگى ارالىقتاعى (كىشى) كۇنالاردى شايادى، ال حاج مابرۋردىڭ (شىنايى قاجىلىقتىڭ) سىيلىعى – تەك ءجاننات» (بۋحاري، مۋسليم) دەگەن ءسوزى ەرەكشە قۋات بەرەدى. ويلاپ قاراڭىزشى، تەك قاجىلىق جاساۋعا نيەتتەنىپ، نيەتىڭىزگە جەتىپ، بۇكىل قاجىلىق راسىمدەرىن تولىق ورىنداپ شىقساڭىز، بەينە ءبىر ءجانناتقا تىكەلەي بيلەتتى قولىڭىزعا ۇستاتقانداي بولادى ەكەن. ءبىراق ول بيلەتتى ءومىرىڭىزدىڭ سوڭىنا دەيىن «جىرتىپ الماي، جوعالتىپ الماي» ءوتۋ تىكەلەي وزىڭىزگە بايلانىستى. قاجىلىقتىڭ ۇلكەن سىيلارىنىڭ تاعى بىرەۋى – بۇعان دەيىن قانداي كۇنا جاساعان بولساڭىز دا، ارافاتتا تۇرىپ كەشىرىم تىلەسەڭىز، انادان جاڭا تۋعانداي پاك بولىپ، كۇنالارىڭىزدان ارىلاسىز. ءتىپتى «ارافاتتا تۇرىپ، اللا «مەنى كەشىرمەيدى» دەپ ويلاعان ادام جازاعا لايىق» دەگەن ءسوز بار. «اللا قاجىنى جانە ول كىمگە دۇعا جاساعان بولسا، سول كىسىنى دە كەشىرەدى» دەگەن حاديس تە جانعا جىلۋ سىيلايدى. قاجىلىقتىڭ نەگىزگى راسىمدەرىن وتەپ بولعان سوڭ، تالاي جىل مەككەدە تۇرىپ جاتقان جەرگىلىكتى قازاق اقساقالمەن كەزدەسۋ ءساتى ءتۇستى. ول كىسى قاجىلىقتىڭ سىيلارى جايلى كەڭىنەن اڭگىمەلەپ بەردى. «قاجىلىعى قابىل بولعاننىڭ بەلگىسى بەسەۋ،» - دەدى ول كىسى. – «1) قابىل بولعان قاجىلىقتىڭ سىيى – تەك ءجاننات؛ 2) قاجى اقىرەتتە 400 ادامعا شاپاعات ەتۋ قۇقىعىنا يە بولادى؛ 3) قاجىلىعى قابىل بولعان ادام ەشقاشان كەدەي بولمايدى؛ 4) دۇعاسى ءاردايىم قابىل بولاتىن بولادى، 5) يمانى ارتىپ، دىندە نىق بولا تۇسەدى». ءسوز سوڭىندا «ەلگە بارعاندا، قاجىلىقتارىڭدى قورعاڭدار» دەپ وسيەت ەتكەن ەدى. وسى ايتىلعان سىيلاردان ءۇمىت ەتىپ، «قاجىلىعىمىز قابىل بولدى ما، جوق پا» دەپ قوبالجىپ ءبىز دە ەلگە ورالدىق. ءتىرى كۇنىندە ءجانناتقا جولداما العىسى كەلگەن مۇسىلمان قاجىلىق قامىنا ەرتەرەك كىرىسسىن!

 6.     پايعامبارىمىزبەن اراداعى بايلانىستى كۇشەيتۋ.

قاجىلىق كەزىندە پايعامبارىمىزدىڭ (وعان اللانىڭ يگىلىگى مەن سالەمى بولسىن) ءقابىرىن زيارات ەتۋ وتە ماڭىزدى. «كىم مەنى دۇنيەدەن وتكەن سوڭ زيارات ەتسە، ءتىرى كەزىمدە زيارات ەتكەندەي بولادى» دەپ سۇيىكتى پايعامبارىمىز (وعان اللانىڭ يگىلىگى مەن سالەمى بولسىن) ايتىپ كەتكەن ەدى. پايعامبارىمىز وزىنە سالەم بەرگەن ادامعا جاۋاپ بەرۋ ءۇشىن اللا وعان رۋحىن قايتارادى ەكەن جانە زيارات ەتىپ كەلگەن ادامعا قيامەتتە پايعامبارلىق شاپاعات ءۋاجىپ بولادى ەكەن. پايعامبارىمىز ءمادينا قالاسىندا جاتىر. ول جەردەگى اتموسفەرانى سوزبەن ايتىپ جەتكىزۋ مۇمكىن ەمەس. پايعامباردىڭ تابانى تيگەن جەردى باسۋ – بىلە بىلگەنگە ناعىز باقىت. ونىڭ قابىرىنە بارىپ، سالەم بەرىپ، ەلدەگى باۋىرلاردىڭ سالەمىن جەتكىزىپ، مىنبەرى مەن ءقابىرى اراسىنداعى ءراۋداتۋل-مينال-جانناتتا (جەردەگى ءجاننات باقشاسى) ناماز وقىپ، ەرەكشە اسەر الىپ قايتتىم. سالاۋاتتارىم بۇعان دەيىن ءتىلىمنىڭ ۇشىنان شىقسا، ەندى جۇرەگىمنىڭ تۇبىنەن شىققانىن سەزدىم. ءقازىر پايعامبارىمىزدىڭ ءومىربايانىن وقىعاندا، كوزگە ەرەكسىز جاس كەلەدى. قيماستىق، ساعىنىش جاسى. اللا ەلشىسىنە (وعان اللانىڭ يگىلىگى مەن سالەمى بولسىن) دەگەن ماحابباتى ارتقانىن قالايتىن جان بار مالىن سارپ ەتسە دە، ومىرىندە ءبىر رەت بولسا دا، مەككە-ماديناعا بارۋعا اسىقسىن دەر ەدىم.

PS:

بىزدە كوبىنە «قاجىلىققا جاسى كەلگەن قارت ادامدار بارۋى كەرەك» دەگەن پىكىر قالىپتاسقان. ەندى ارينە بالالارى اتا-انالارىن سىيلاپ، قاجىلىققا جىبەرىپ جاتسا، بۇل - ماقتاۋعا تۇرارلىق ءىس. دەگەنمەن جاس كەزدە جاسالعان قاجىلىقتىڭ ورنى ەرەكشە. قاجىلىققا بىرگە بارعان ءبىراز ۇلكەن كىسىلەردەن «بۇدان ون جىل ەرتەرەك كەلگەنىمدە عوي...» دەگەن سىندى سوزدەردى ەستىپ قالدىق. قاجىلىق راسىمدەرىن تولىق ورىنداۋعا ءبىراز كۇش-قۋات، فيزيكالىق دايىندىق كەرەك. سول ءۇشىن ءاربىر مۇسىلمان جۇرەگىندە قاجىلىققا دەگەن قۇشتارلىعىن وياتىپ، جوعارىدا اتالعان قاجىلىق جەمىستەرى جايلى وي جۇگىرتىپ، دايىندىق قامىن ەرتە جاستان باستاعانى دۇرىس دەپ ويلايمىن. 

دەرەككوز: islam.kz