قىرعىزستاننىڭ وش وبلىسىندا تۇرمىسقا شىعۋ تۋرالى ويىنان اينىپ قالعان قىز 70 مىڭ سوم كولەمىندەگى قالىڭ مالدى الىپ قاشىپ كەتكەن. بۇل تۋرالى Qamshy.kz  Stan.kz-كە سىلتەمە جاساپ حابارلايدى.

“جىگىت قىزعا قالىڭ مال اقشاسىن بەرگەن. ال قىز بولسا اقشا قولىنا تيگەننەن كەيىن كۇيەۋگە شىعۋ تۋرالى ويىنان اينىپ قالىپتى. ەندى مىنە ءبىر جىل بويى اقشانى قايتارماي ءجۇر. جىگىت وعان 70 مىڭ سوم تولەگەن. مۇنىڭ بارلىعىن اتا-انالارى كەزدەسىپ كەلىسكەن ەكەن. جاستار جارتى جىل بويى كوڭىل جاراستىرىپ جۇرگەن. قىزدىڭ جاسى – 22-دە، ال جىگىت 26-دا”، – دەيدى “يمپەرا گرۋپپۋ” زاڭگەرلىك كومپانياسىنىڭ باسشىسى ەميل دجاپاقبايەۆ.

جىگىت وعان نە بولعانىن سۇراماقشى بولىپ بىرنەشە رەت تىرىسقانىمەن، ەش ناتيجە شىقپاعان.

“باستاپقىدا قىز اۋىرىپ، اۋرۋحاناعا جاتقان. ءبىراق ونىڭ اتا-اناسى جىگىتكە قىزدىڭ قاي اۋرۋحانادا ەكەنىن ايتپاعان. سودان ءۇش بويى مۇلدە حابار الا الماپتى. قىزدىڭ اتا-اناسى دا جىگىتتەن بويلارىن الا قاشقانىمەن، كەيىن وزدەرى دە قىزىن تاپپاي وتىرعاندىقتارىن مويىنداپتى”، – دەپ اتاپ ءوتتى زاڭگەر.

ونىڭ سوزىنشە، زارداپ شەگۋشى زاڭگەردەن كەڭەس الماقشى بولعان. الايدا ۇيالامىن دەپ وش پروكۋراتۋراسىنا شاعىم بىلدىرۋدەن باس تارتىپتى. “جىگىتكە وبال، ونىڭ وتباسى دا اسا باقۋاتتى ەمەس. قالىڭمالدىڭ اقشاسىن ءوزى ەڭبەكتەنىپ جيناعان ەكەن”، – دەيدى دجاپاقبايەۆ.

زاڭگەردىڭ ايتۋىنشا قىرعىزستاندا قالىڭ مال زاڭمەن بەكىتىلمەگەن. ءبىراق، مۇنداي جاعدايعا ۇشىراعاندار كوپ رەتتە قىلمىستىق كودەكستىڭ 166 “الاياقتىق” بابى بويىنشا ارىزدانىپ جاتادى.