24 قازاننان باستاپ، دۇيسەنبى- جۇما كۇندەرى 19.00-دە 31 ارنا توي ماۋسىمىنىڭ شىمىلدىعىن ءتۇرىپ، كوپتەن كۇتكەن «كەلىندەر بايگەسى» شوۋىنىڭ جالعاسىن ەفيرگە شىعارماقشى،- دەپ حابارلايدى Qamshy.kz.

بۇگىن « مۋ Cafe» كافەسىندە  31 ارناداعى «كەلىندەر بايگەسى»  رەاليتي- شوۋىنىڭ ەكىنشى ماۋسىمىنىڭ جۋرناليستەرگە ارنالعان تانىستىرىلىمى بولدى.  العاشقى بولىپ ءسوز كەزەگىن ارنا باسشىسى باعدات قوجاحمەتوۆ مىرزا الدى. «كەلىندەر بايگەسى» جوباسى – شىن مانىندە بۇكىلحالىقتىق ءونىم، ونى وتباسىمەن بىرگە كورۋگە بولادى جانە كورۋ كەرەك. توي – ءاربىر وتباسىنىڭ ەڭ باستى مەرەكەسى.  قازاقستاندىقتاردىڭ تويعا قالاي نازا اۋداراتىنىن ەسكەرسەك، ءبىزدىڭ كەيىپكەرلەردىڭ دە سالتاناتتى مەرەكەلەرىنە كۋا بولۋ كورەرمەندەر ءۇشىن دە قىزىقتى دەپ ەسەپتەيمىن»- دەيدى 31 ارنانىڭ باس ديرەكتورى باعدات قوجاحمەتوۆ.

ەستەرىڭىزگە سالايىق، «كەلىندەر بايگەسى» شوۋىنىڭ العاشقى كورسەتىلىمى بيىلعى ناۋرىز ايىندا ەفيرگە شىققان. وعان قازاقستاندىقتار ەرەكشە قىزىعۋشىلىق تانىتىپ، بۇل جوبا تەلەنارىقتاعى ءبىزدىڭ مەنتاليتەتكە ساي تەلەشوۋعا، قازاق ءتىلدى كورەرمەندەر ءۇشىن بىرەگەي ۇسىنىسقا اينالعان.

رەاليتي- شوۋدىڭ ەكىنشى ماۋسىمىندا باعدارلاماعا رەسپۋبليكامىزدىڭ ءارتۇرلى قالالارىنان قالىڭدىقتار قاتىسادى. ەگەر ءبىرىنشى ماۋسىم شىمكەنت، تاراز جانە الماتى قالالارىندا ۇيىمداستىرىلعان بولسا، ەكىنشى كەزەڭدە جوبانىڭ اۋقىمى كەڭىپ، باتىس، شىعىس جانە سولتۇستىك قازاقستان، سونىڭ ىشىندە پاۆلودار، اقتوبە قالالارىنىڭ وكىلدەرى جوبا قاتىسۋشىسى اتاندى.  كاستينگ ءالى دە جالعاسىپ جاتىر، بايگەگە قاتىسقىسى كەلەتىن قالىڭدىقتار سانى دا از ەمەس.

«كەلىندەر بايگەسىن» كورىپ وتىرعان كورەرمەن  شىنايى ومىردەگى قازاق تويىنىڭ بەينەسىن، ءوز ورتاسىندا بولىپ جاتقان  توي تالقىسىنا كۋا بولادى. ەفيردى قاراپ وتىرعان كورەرمەن ءۇشىن قالىڭدىقتاردىڭ بىرىنە-بىرى باعا بەرىپ، جايىلعان داستارحاندى سىنعا الۋى ەرسى كورىنۋى مۇمكىن، ءبىراق  قازاقتىڭ ءار تويىنىڭ  سوڭى وسىنداي تۋىستار مەن تانىستاردىڭ سىنىنا ۇشىراپ، تالقىلاۋعا تۇسەتىنى جاسىرىن ەمەس. «ەتى دۇرىس پىسپەگەن»، « قۇيعان شارابى ارزان»، « اساباسى ونشا ەمەس»، «قالىڭدىقتىڭ كويلەگى ناشار»، «ماعان ءسوز بەرمەدى»، «اناۋ بالەنشە مىڭ اكەلىپتى»  دەگەن سىندى كۇندەلىكتى ءوزىمىز ايتاتىن پىكىرلەر.  بولاشاق نەمەسە تويعا دايىندالىپ جۇرگەن قالىڭدىقتار وزدەرىنىڭ تويىنا كەرەك كەڭەستەر الا الادى. ەڭ ادەمى توي كويلەگىن قالاي تاڭداۋ كەرەك، قانداي قىزىقتى ويىندار ويلاستىرۋ، ءبىرىنشى جانە ەكىنشى داستارحانعا نە قويۋ كەرەك، قوماقتى قاراجات جۇمساپ، نەمەسە اقشانى ۇنەمدەپ-اق توي وتكىزۋگە بولا ما؟ وسى سۇراقتاردىڭ بارلىعىنا جاۋاپتى «كەلىندەر بايگەسى» جوباسىنان كورەسىزدەر!

 سوڭىندا جالعىز عانا قالىڭدىق ءوز باسەكەلەستەرىنەن وزىپ شىعىپ، تۇركيا ەلىندە وتەتىن بال ايىنا ارنالعان  جولدامانىڭ يەسى اتانادى.

ارنانىڭ اتقارۋشى پروديۋسەرى اسەل تويانوۆا  شوۋدى ءتۇسىرۋ بارىسىنداعى ءوزىنىڭ تاڭدانىستارىمەن ءبولىسىپ، بىلاي دەيدى: ءار ايماقتا توي مەرەكەلەرى ءارتۇرلى وتەتىنىن باقىلاۋ سونداي قىزىقتى. ماسەلەن، شىمكەنتتىڭ تويلارىنا 500-دەن اسا ادام قاتىسسا، توي كورتەدجدەرى، ليمۋزيندەر، جاستاردىڭ قىدىرىسىنا ەرەكشە كوڭىل بولىنەدى. اقتوبەدە كەلىننىڭ قولىنان ءشاي ىشۋگە قاتىستى ەرەكشە ءداستۇر بار. ال پاۆلودارلىق تويلار كۇندىز ساعات ۇشتە باستالىپ، كەشكە ون بىردە اياقتالادى. الماتى مەن تارازدىڭ قوناقتارى، كەرىسىنشە شاقىرىلعان ۋاقىتقا بىر-ەكى ساعاتقا كەشىگىپ جۇرەدى.

 قازاق  تويىنىڭ ءوزىڭىز بايقاماي جۇرگەن قىرلارىن كورگىڭىز كەلسە،  دۇيسەنبى جانە جۇما كۇندەرى 19.00-دە 31 ارنا قوسۋلى بولسىن!