اقتوبە مەن الماتىداعى لاڭكەستىك وقيعالارعا قاتىستى تەرگەۋ اياقتالىپ، ءىس سوتقا جەتتى. كەشەلى بەرى قاندى قىلمىسقا قاتىستى سوت وتىرىستارى وتۋدە.

5 ماۋسىم كۇنى اقتوبەدە بولعان تەراكتىگە بايلانىستى سوتتا بارلىعى 29 ادام ايىپتالۋدا. ولاردىڭ 9-ى ناقتى لاڭكەستىك ارەكەت جاساپ قولعا تۇسكەندەر، 18 ايىپتالۋشى جاسالعالى جاتقان قىلمىس تۋرالى بىلە تۇرىپ، ءتيىستى ورگاندارعا حابارلاماعانى ءۇشىن جازىقتى بولسا، 2 ادام بويتاسالاعان لاڭكەستەردى جاسىرۋعا سەپتەسكەنى ءۇشىن سوت الدىندا جاۋاپ بەرۋدە. سوتتىڭ العاشقى وتىرىسى بۇگىن باستالدى.  

الماتىداعى اتى شۋلى اتىسقا قاتىستى باستى ايىپتالۋشى ر. كۇلىكبايەۆ ءىسى بويىنشا دا العاشقى سوت تىڭداۋى كەشە بولدى. اتى سوت وتىرىسى بولعانىمەن بۇل شارا كۇلىكبايەۆ قامالعان تەرگەۋ يزولياتورىنىڭ قابىرعاسىندا ءوتتى. كۇلىكبايەۆپەن بىرگە تاعى بەس ادام زاڭسىز قارۋ ساقتاعانى جانە قاراقشىلىق شابۋىل جاساعانى ءۇشىن سوت الدىندا جاۋاپ بەرۋدە. كۇلىكبايەۆتىڭ ءوزى تەرروريزم، كىسى ءولتىرۋ، توناۋ، قارۋ جاساۋ، قاراقشىلىق، ادامدى زاڭسىز باس بوستاندىعىنان ايىرۋ، كولىك ۇرلاۋ سىندى بىرنەشە باپتارمەن ايىپتالۋدا.

اتىشۋلى ەكى سوتتىڭ دا باستى ەرەكشەلىگى – قاۋىپسىزدىك شارالارىنىڭ ەرەكشە جاعدايدا كۇشەيتىلۋى. ارينە، كارتوشكا ۇرلاعان ادەتتەگى ۇرى ەمەس، بىرنەشە كىسىنىڭ قانىن جۇكتەگەن، قارۋلى شابۋىل جاساعان قىلمىسكەرلەر سوتتالىپ جاتىر. قىراعىلىق تانىتپاسا بولمايدى. ءبىراق، مىنا سوتتاردان بايقاعانىمىز قۇزىرلى ورگاندار سوتتالۋشىلاردىڭ بوستاندىقتا جاقتاستارى، جاي عانا جاقتاس ەمەس، قۇقىققورعاۋ ورگاندارىنا شابۋىل جاساپ، كۇدىكتىلەردى جازادان قۇتقارىپ الۋدى كوزدەيتىن توپتاردىڭ بارىن سەزەتىن سياقتى. الماتىداعى سوت پروسەسى تەرگەۋ يزولياتورىنىڭ قابىرعاسىندا وتۋدە. بۇعان دەيىن اتاقتى «قورعاس ءىسى» دە وسىنداي تارتىپپەن وتكەن. ول تۇسىنىكتى دە. بىرنەشە ميلليون دوللارلىق قارجى جىمقىرۋ سحەماسىن جۇزەگە اسىرعان كۇدىكتىلەردىڭ سوت زالىنان قاشىپ شىعۋى، وعان كەزىندە قارجىلىق قيتۇرقىلىقتاردى بىرگە جاساپ، بوستاندىقتا جۇرگەن ىقپالدى بىرەۋلەردىڭ كومەكتەسۋى دە مۇمكىن ەدى.  ال، تۇتاستاي قوعام قارعىس ايتىپ وتىرعان كۇلىكبايەۆكە قاتىستى مۇنداي ساقتىق شارالارى نەدەن تۋىپ وتىر؟ تەرگەۋ ورگاندارى باس كۇدىكتىنى قالا ىشىمەن ايداۋىلداپ قىلمىستىق سوت عيماراتىنا اپارۋدان نەگە قاۋىپتەندى؟ باستى سەبەپ – سوتتا ايتىلعانداي كۇدىكتى ايداۋىلداۋ كەزىندە قاشىپ كەتۋى مۇمكىن. ال، مۇزداي قارۋلانعان جاساققا قارسىلىق كورسەتىپ، ارنايى كولىكتەن بوساپ شىعۋ ءبىر ادامنىڭ قولىنان كەلەر ءىس ەمەس.

اقتوبەدەگى سوتتاعى جاعداي دا وسىعان ۇقساس. العاشقى وتىرىس سوت عيماراتىندا وتكەنمەن، ول اۋماق تا قاتاڭ باقىلاۋعا الىنعان. ءتىپتى، ۇيلەردىڭ توبەلەرىنە مەرگەندەر قويىلىپ، سوت عيماراتىنىڭ اينالاسىن اۆتوماتپەن قارۋلانعان ارنايى جاساق كۇزەتۋدە. دەمەك، پوليسيا قاندى قىرعىن ۇيىمداستىرعان كۇدىكتىلەردىڭ جاناشىرلىق تانىتۋى مۇمكىن تۋىستارىنان ەمەس، ارام نيەتتى، تەرىس اعىمدار جەتەگىندە كەتكەن يدەيالىق جاقتاستارىنان قاۋىپتەنەتىن سەكىلدى. ال، ول «جاقتاستاردىڭ» كىم ەكەنىن انىقتاۋ، بۇل ءقاۋىپتىڭ قاشانعا دەيىن سوزىلارى، لاڭكەستەرمەن نيەتتەس راديكالداردىڭ قاشان قۇرىقتالىپ، قوعامداعى ۇرەيدىڭ قاشان سەيىلەرى اۋەلى ءبىر اللاعا ايان، سودان كەيىن كۇشتىك قۇرىلىمدار مەن جاۋاپتى مەملەكەتتىك ورگانداردىڭ جۇيەلى جۇمىسىنا بايلانىستى.