رەسەيلىك كورەرمەنگە “چەرنوبىل. زونا وچۋجدەنيا”، “ەكيپاج”، “لاسكوۆىي ماي” سىندى كينولار ارقىلى جاقسى تانىس اكتەر سەرگەي رومانوۆيچ نەلىكتەن يسلامدى قابىلداعانى تۋرالى سۇحبات بەردى.

بۇل تۋرالى islam.kz حابارلايدى.

بۇل شەشىمدى سەرگەي ءتورت جىل بۇرىن قابىلداعان. بالا كۇنىنەن ءارتىس پراۆوسلاۆتى حريستيان وتباسىندا تاربيەلەنگەن. شوقىنعان. نيكولاي چۋدوتۆورەس اۋليەنىڭ سۋرەتىن تۇمار قىپ تاعىپ جۇرگەن ەكەن. ءبىراق 17 جاسىندا سەنىمىندە كەرەعارلىق كوپ ەكەنىن بايقايدى. شىركەۋگە بارىپ، ءدىن قىزمەتشىسىنەن “ىنجىلدەگى ەكىنشى وسيەتتە: “وزىڭە ەشكىمدى ءپىر تۇتپا، سۋرەتتەرگە تابىنبا” دەلىنەدى. “ال، ءبىز نەگە اۋليەلەردىڭ سۋرەتتەرىنە تابىنامىز؟” – دەپ سۇرايدى. ءدىن قىزمەتشىسى ءسوزبۇيداعا سالىپ، اۋليەلەر دەگەن جولباستاۋشىلار دەگەندەي اڭگىمە ايتادى. “مەن جالپى ماكسيماليستپىن. ەگەر باسىندا وسىلاي جازىلسا، وندا ونى باسقاشا تاپسىرلەۋ ارتىق دەپ بىلەم. وسىلاي ىشىمدەگى كەرەعارلىق ءپىسىپ جەتىلدى. شىركەۋگە بارماي كەتتىم. اۋليەلەردىڭ سۋرەتتەرىنە قاراپ شوقىنبايتىن بولدىم. قۇداي ءار ادامنىڭ جانىندا دەپ ءتۇسىندىم. ءدىن توبىردى باسقارۋ ءۇشىن ويلاپ تابىلعان دەپ باعالادىم” دەيدى ول.

سەرگەي 20 جاسقا تولعاندا شەشەن دوسى ءشامىلدىڭ اعاسىمەن ءدىن حاقىندا داۋلاسىپ قالادى. ەكەۋى بەس ساعات تالاسىپ-تارتىسادى. ءشامىلدىڭ اعاسى وعان، “سەن ءارتىسسىڭ، ارتىستىگىڭدى دالەلدەۋ ءۇشىن وبرازعا ەنەسىڭ، ساحنادا وينايسىڭ. ال، قۇدايعا سەنگەنىڭدى قالاي كورسەتەسىڭ، نەمەن دالەلدەيسىڭ؟” – دەپ سۇرايدى. سودان كەيىن سەرگەي قۇران مەن ءىنجىلدى قاتار ساتىپ اكەلىپ، سالىستىرىپ وقيدى. اللانى تانۋ ءۇشىن ونىڭ پارىز ەتكەن امالدارىن بۇزباي ورىنداۋ كەرەكتىگىن مويىندايدى.

“مەنى سول كۇننەن باستاپ ءدىن تاقىرىبى قىزىقتىردى. باردىم دا قۇران مەن ءىنجىلدى قاتار ساتىپ الدىم. سالىستىرعىم كەلدى. ويىم تەك اقيقاتتى ءتۇسىنۋ بولدى. ءبىر ايدان كەيىن يسلامدى قابىلدادىم. ءشامىلدىڭ اسۇيىندە وتىرىپ، سەنىمگە تولى جۇرەكپەن: “ءلا يللاحا يللاللا، مۇحاممادار راسۋلاللا” دەپ مويىندادىم. سول كۇننەن باستاپ بەس ۋاقىت ناماز وقيمىن. وسى جولى ورازا ۇستادىم. كۇن باتقانشا ءنار تاتپاي ءجۇردىم”، – دەيدى سەرگەي.

“قۇراندى بىتىرگەن سوڭ سوڭىنداعى حاديستەرىن وقىعان كەزدە كوزىم شاراسىنان شىعا جازدادى. تاڭ قالىسىمدا شەك بولمادى! بارلىق ساۋالعا جاۋاپ تاپتىم! ءبارى ماعان عانا ارنالىپ جازىلىپ، مەنىمەن بىرەۋ سويلەسىپ وتىرعانداي كۇيدە بولدىم. تۇسىنە الماي جۇرگەن دۇنيەنىڭ ءبارىن قاراپايىم تۇردە ايتىپ، جەتكىزگەنىنە تامساندىم”، – دەيدى ءارتىس كەزەكتى ءبىر سۇحباتىندا.

سەرگەيدىڭ اتا-اناسى العاشىندا ۇلدارىن سەكتاعا كىرىپ كەتتى دەپ ويلادى. تەك ۋاقىت وتە كەلە تۇسىنىستىك تانىتا باستادى. ال سەرگەي ءرومانوۆيچتىڭ ءوزى وسىدان كەيىن ءدىني سەنىمىنە قايشى كەلەتىن فيلمدەرگە تۇسۋدەن باس تارتتى. الەكساندرا گولوۆكوۆا اتتى سۇلۋعا ۇيلەنىپ، نەكەلەرىن مۇسىلمانشا قيدىردى.