تانىمال ءانشى اباي بەگەي باسىنان وتكەن قايعىلى جاعدايدى تىڭدارماندارمەن ءبولىسىپ، ەكىنشى رەت ۇيلەنۋگە دايىن ەمەس ەكەنىن ايتتى.
ءانشى بۇل تۋرالى "قازاقستان" ارناسىنىڭ "ايتۋعا وڭاي" باعدارلاماسىندا ءبولىستى.
"ايتۋعا وڭاي" باعدارلاماسىنىڭ كەزەكتى سانى "انا ورنىنا انا بولعاندار" دەپ اتالدى. بۇدان ەكى جىل بۇرىن قايتىس بولعان جارىنا ارناپ اباي بەگەي "ءجانناتىم" دەپ اتالاتىن ءانىن ورىنداپ بەردى. بۇل ءاندى ەستىگەن ستۋديا قوناقتارى تەگىس كوزدەرىنە جاس الىپ، ونىڭ قايعىسىنا ورتاقتاس بولدى.
اباي بەگەي 19 جاستا بولعاندا 17-جاسار جارىن ۇيگە كەلىن قىپ تۇسىرگەن. بۇگىندە جۇبايلاردىڭ 4 بالاسى بار، ولاردىڭ ۇلكەنى 20 جاستا.
"جالعىزدىق قۇدايعا عانا جاراسادى"، ەكىنشى رەت ۇيلەنۋگە قاتىستى پىكىرىڭ قانداي؟"،- دەگەن جۇرگىزۋشىنىڭ سۇراعىنا اباي بەگەي وعان دايىن ەمەستىگىن ايتتى. ونىڭ ايتۋىنشا، ايەلى ومىردەن قايتقان سوڭ، ءانشى ءۇش اي بويى ءوز وزىنە كەلە الماپتى. سوندىقتان، ءقازىر ول اناسىنىڭ جوعىن بىلدىرمەي بالالارىنا باس-كوز بولعىسى كەلەتىنىن جەتكىزدى.
