ۇزىناعاش بازارىندا مال ساتىپ ءجۇرىپ جوعالىپ، سوڭىنان مايىتتەرى تابىلعان ءۇش جىگتتىڭ 36 باس مالى اقى يەلەرىنە قايتارىلعان بولاتىن. ال قالعان 6 باس ءىرى قارادان ەش دەرەك جوق،-  دەپ حابارلايدى Qamshy.kz Baq.kz –كە سىلتەمە جاساپ.

ايۋاندىقپەن ولتىرىلگەن ءۇش جىگىتتىڭ اعاسى ءامىرباي ۇلى تۇرسىننىڭ ايتۋىنشا، قازىرشە ۇستالعان ەكى كۇدىكتىدەن باسقا جاڭا دەرەكتەر جوق. ءبىراق، ىنىلەرى ساتۋعا اپارعان 42 باس مالدىڭ 36-سى عانا جامبىل اۋداندىق پوليسيا تاراپىنان اقى يەلەرىنە قايتارىلعان. قالعان 6 باس مالدىڭ قايدا ەكەنى ءالى بەلگىسىز.

«سول جوعالعان مالدار تابىلسا، جاڭا قىلمىس دەرەگى اشىلۋى مۇمكىن. بۇل جونىندە وسى ىسپەن اينالىسىپ جاتقان پوليسەيلەر دە، تەرگەۋشىلەر دە ءۇنسىز. ەكى كۇدىكتى تۇراتىن سۇرانشى باتىر اۋىلىن جانە قىلمىس بولعان جەرلەردى مۇقيات تەكسەرسە، تاعى دا جاڭا دەرەكتەر اشىلار ەدى»، - دەيدى تۇرسىن ءامىرباي ۇلى.

«ۇزىناعاش ءىسى» بويىنشا كۇدىكتىلەر تالعات سۇلەيمانوۆ پەن مۇرات وڭالبايەۆتىڭ ادۆوكاتى الماتى وبلىسىندا قازا تاپقان اعايىندىلاردىڭ ولىمىنە قاتىستى وقيعانىڭ ءمان-جايىن ايتىپ بەرگەن بولاتىن.

ادۆوكات مەركەبەك ماكەنبايەۆتىڭ ايتۋىنشا، ونىڭ قورعالۋشىلارى وسىعان دەيىن سوتتى بولماعان.

«ولاردىڭ وتباسىلارى بار. ءارقايسىسىندا جەكە جەر ءۇي مەن مالى بار. سۇلەيمانوۆتىڭ ءۇش ۇلى بار – كەنجە ۇلى ءۇش جاستا. وڭالبايەۆتىڭ دا ءۇش ۇلى بار. ولار ۇزىناعاشتان 25 شاقىرىم جەردەگى اۋىلدا تۇرادى»، - دەيدى ادۆوكات.

سونىمەن قاتار، ادۆوكاتتىڭ ايتۋىنشا، قايتىس بولعان اعايىندىلار مەن كۇدىكتىلەر تانىس بولماعان. كۇدىكتىلەردەن الىنعان جاۋاپ بويىنشا، وقيعانىڭ حرونولوگياسى بىلاي وربىگەن:

17 قىركۇيەكتە سۇلەيمانوۆ ۇزىناعاشتاعى مال بازارىنا بارادى. ول مال شارۋاشىلىعىمەن اينالىسادى. سەنبىدەن جەكسەنبىگە قاراعان ءتۇنى بازاردا ادەتتە ادامدار كوپتەر جينالادى: بىرەۋ مال اكەلەدى، ەكىنشىسى ورىن الىپ قويادى. وسىلايشا، كۇدىكتىلەر دە سول كۇنى بازارعا كەلىپ، ءوزىنىڭ 2-3 بۇزاۋىن ساتادى.

كەيىننەن سۇلەيمانوۆ ەكى كولىكپەن مال اكەلگەن اعايىندىلاردى كورىپ، ولارمەن ساۋدالاسا باستايدى. سۇلەيمانوۆ 16 باس سيىر ساتىپ الادى. الىنعان تاۋار ءۇشىن كۇدىكتى سۇلەيمانوۆ ساتۋشىلارعا 2 ميلليون تەڭگەدەن اسا اقشا بەرەدى. سودان كۇدىكتىلەر اعايىندىلاردىڭ جۇك كولىگىمەن مالداردى سۇرانشى باتىر اۋىلىنا اپارادى. جولدا سۇلەيمانوۆ ءوزىنىڭ اۋىلداسى وڭالبايەۆقا حابارلاسىپ، ودان مالداردى كولىكتەن شىعارۋعا كومەكتەسۋىن سۇرايدى. 28 قىركۇيەكتە شامامەن ساعات 13.00-دە ولار سۇلەيمانوۆتىڭ ۇيىنە كەلىپ، مالداردى سوندا قالدىرادى.

ايتا كەتەيىك، ولار اعايىندىلاردىڭ 36 مالىن ساتىپ الامىز دەپ كەلىسكەن ەكەن.

«سودان سۇلەيمانوۆ ولاردى الداپ، 20 مالدى ونىڭ تاۋ جاقتا تۇراتىن تۋىسى العىسى كەلەتىنىن ايتادى. سوندا قالعان اقشانى بەرەمىز دەپ كەلىسكەن. ولار اعايىندىلارعا تاعى ەكى ميلليون 800 مىڭ تەڭگە تولەۋ كەرەك بولاتىن. وسىلايشا، مال ساتۋشىلار كەلىسىپ، مەنىڭ قورعالۋشىم وزىمەن بىرگە ۆينچەستەر الىپ شىعادى. اعايىنداردىڭ «قارۋدى نەگە الىپ شىقتىڭ؟» دەگەن سۇراعىنا سۇلەيمانوۆ وندا قاسقىرلار كوپ دەپ، قارۋدى قويشىلارعا اپارىپ بەرەتىنىن ايتقان»، - دەدى مەركەبەك ماكەنبايەۆ.

تاۋعا بارۋعا كەلىسكەن ءۇش اعايىندى مەن كۇدىكتىلەر وسىلايشا جولعا شىعادى. ولاردىڭ سوڭىنان سۇر ءتۇستى Mercedes كولىگىن جۇرگىزىپ كەلە جاتقان وڭالبايەۆ كەلەدى. تاۋداعى قوراعا جاقىنداعان بويدا ولار سۋلى ساي شاتقالىنىڭ الدىنا بارىپ توقتايدى. سودان مالشىلار كامازدان 12 مالدى تۇسىرەدى.

«شاتقالعا جەتكەندە سۇلەيمانوۆ قاسىنداعى ەر ادامنىڭ ارقاسىنا وق اتادى. الايدا ول قۇلامايدى. سودان مەنىڭ قورعالۋشىم ەكىنشى رەت تاعى وق اتادى. سودان ەر ادامنىڭ ءمايىتىن الىپ، ءشوپتىڭ اراسىنا تىعىپ، ارى قاراي كەتە بەرەدى. سول جاقتا سۇلەيمانوۆ اعاسىنىڭ مال قوراسىندا قالعانىن ايتادى. شاتقالدا تالعات سۇلەيمانوۆ ەكىنشى ەر ادامدى اتىپ ولتىرەدى. وسىنى كورگەن مۇرات وعان «وسى قىلمىس ءۇشىن قاماۋعا الىناتىندارىن» ايتقان. ال تالعات بولسا ونىڭ بۇل ايقايىنا «ەگەر سەن ماعان ءقازىر كومەكتەسپەسەڭ، سەنى دە ولتىرەمىن» دەپ جاۋاپ قايتارعان»، - دەدى ادۆوكات.

سۇلەيمانوۆ مۇراتتى قورقىتىپ، وعان ءۇشىنشى ەر ادامدى شاي ىشۋگە شاقىرۋىن بۇيىرادى. سودان مۇرات ءۇشىنشى ەر ادام جاققا قاراي بەت بۇرعان بولىپ، جولدا جاسىرىنىپ قالادى. ءبىرشاما ۋاقىت وتكەن سوڭ سۇلەيمانوۆتىڭ ءوزى سول جاققا قاراي بارىپ، تابيعاتتى تاماشالاپ جۇرگەن ءۇشىنشى ەر ادامدى كورەدى.

«300 مەتر بيىكتىكتە تۇرىپ، ۆينتوۆكامەن ءۇشىنشى ەر ادامنىڭ باسىنا وق اتادى. سودان مۇراتتى تاۋىپ الىپ، ونى كومەكتەسۋگە ماجبۇرلەيدى. ءسويتىپ ەكەۋى مايىتتەردى كامازعا سالادى. مۇردەلەردى كامازدىڭ ىشىندەگى تەزەكتەرمەن جاۋىپ تاستايدى دا كەرى جولعا شىعادى.

الايدا جۇك كولىگى جولدا بۇزىلىپ قالادى. سودان ولار كامازدى سول جاقتا تاستاپ، ۇيلەرىنە قايتا بەرەدى. مۇنىڭ بارلىعىن سۇلەيمانوۆتىڭ ءوزى ايتىپ بەردى. كىناسىن تولىقتاي مويىندادى. اعايىندىلاردى ولتىرگەن سوڭ قاتتى قينالعانىن جانە دۇيسەنبىدە ءوزى كەلىپ، كىناسىن مويىنداماقشى بولعانىن دا ايتتى. سونداي-اق، ول ءۇش ەر ادامدى 20 مالدى تارتىپ الۋ ءۇشىن ولتىرگەنىن ايتتى»، - دەدى ادۆوكات.

سونىمەن قاتار، ادۆوكات كۇدىكتىلەردىڭ بۇل قىلمىستى الدىن الا ويلاستىرماعانىن مالىمدەدى.

ال الماتى وبلىسى پروكۋراتۋراسى ءبىرىنشى باسقارماسىنىڭ اعا پروكۋرورى الىبەك مىرزابەكوۆتىڭ مالىمدەۋىنشە، اعايىندى ءۇش جىگىتتى ۇرلانعان مىلتىقپەن اتىپ ولتىرگەن.

«مىلتىقتى يەسى 2 اي بۇرىن جوعالتقان. قازىرگى تاڭدا الماتى وبلىسىندا قارۋ-جاراق توناۋ فاكتىلەرى جيىلەپ كەتكەن. 200-دەن استام قارۋ-جاراق ۇرلانعان قارۋ تىزىمىندە تۇر. وبلىستىق پروكۋراتۋرا قىزمەتكەرلەرىنىڭ ايتۋىنشا، «ولاردىڭ ەشقايسىسى تابىلماعان. نەگىزىنەن قارۋدى جەكە تۇرعىن ۇيلەردەن كەيدە سەيفتەرىمەن قوسا قولدى قىلادى. ۇرلانعان قارۋ تەك قىلمىس جاسالعاندا عانا اشكەرەلەنىپ جاتادى. قازىرگى تاڭدا الماتى وبلىسى تۇرعىندارىنىڭ قولىندا 24 مىڭ بىرلىك قارۋ رەسمي تىركەۋدە تۇر»، - دەدى الىبەك مىرزابەكوۆ.

ەستەرىڭىزگە سالساق، تالدىقورعان قالاسىنا جاقىن ماڭداعى كوكسۋ اۋدانىنىڭ 3 تۇرعىنى الماتى جاقتاعى ۇزىناعاش بازارىندا مال ساتامىز دەپ ءىز-تۇزسىز جوعالىپ كەتكەن بولاتىن. كەيىنىرەك ولاردىڭ ءولى تابىلعانى حابارلانعان ەدى. ۆەدومستۆوداعىلاردىڭ ايتۋىنشا، مارقۇمداردىڭ دەنەسىندە زورلىق بەلگىلەر بار.

پوليسەيلەر كىسى ءولتىردى دەگەن كۇدىكتىلەردى ۇستادى. ولار جامبىل اۋدانىنىڭ ەكى تۇرعىنى. قازىرگى ۋاقىتتا ق ر قىلمىستىق كودەكسىنىڭ 99-بابى («ادام ءولتىرۋ») بويىنشا سوتالدى تەرگەۋ باستالىپتى. كۇدىكتىلەر ۋاقىتشا ۇستاۋ يزولياتورىنا قامالدى.

تەرگەۋ اياقتالعانشا، ۇستالعاندار ەكى ايعا – 24 قاراشاعا دەيىن قاماۋعا الىندى. كەيىنىرەك ساعىنتايەۆ الماتى وبلىسىندا ولتىرىلگەن اعايىندىلاردىڭ وقيعاسىنا قاتىستى پىكىر ءبىلدىرىپ، سالا مينيسترىنە ءتيىستى تاپسىرما بەردى. سونداي-اق،ماجىلىستە دە، سەناتتا دا  قازا تاپقان اعايىندىلاردىڭ وقيعاسىنا قاتىستى ماسەلە كوتەرىلدى.

ۇزىناعاشتا ايۋاندىقپەن ولتىرىلگەن ءۇش جىگىتتىڭ تۋىستارى ەلباسىدان اتۋ جازاسىن ەنگىزۋدى سۇراپ وتىر.