قازاق ءتىلىنىڭ بۇگىنگى جاعدايىنا قاتىستى راسۋل جۇمالى الەۋمەتتىك جەلىدەگى پاراقشاسىنا بىلاي دەپ جازىپتى:
"Cاياساتتىڭ باسى – ءتىل. ونسىز ۇلت جوق، دەمەك ۇلتتىق رۋح جوق، ولاي بولسا مەملەكەتتىڭ ءوزى جوق. قازاق ءتىلى مەملەكەتتىك مارتەبەگە يە بولعالى 27 جىلدان استى. ءسوز جۇزىندە. ءىس جۇزىندە ورىس ءتىلىنىڭ تاساسىندا قالىپ كەلەدى. بيلىك جۇمىسى مەن وتىرىستارىنىڭ 95 پايىزى ورىسشا جۇرگىزىلەدى، مەملەكەتتىك مەكەمەلەرگە قازاقشا بىلمەي جۇمىسقا تۇرۋ وپ-وڭاي، ورىس ءتىلىنسىز مۇمكىن ەمەس. قوعامدىق ورىندار – حالىققا قىزمەت ورتالىقتارى، بانكتەر، دۇكەندەر، كينوتەاترلار، قوعامدىق كولىك - 95 پايىزى ورىسشا. كوشەلەردەگى حابارلامالاردى قاراڭىز، 95 پايىزى قايتا ورىسشا. تەلەديداردى قوسساڭىز دا، راديونى تىڭداساڭىز دا سول جاعداي - 95 پايىزى ورىس تىلىندە دە، قالعانى ارالاس. راس، باسقا دا ۇلىستاردى كەمسىتپەۋ كەرەك دەگەن ءسوز ءجيى ايتىلادى. ءبىراق، بىرىنشىدەن، قازاق ءتىلى تەك قازاقتىڭ عانا ەمەس، سول ۇلىستار تۇراتىن مەملەكەتتىڭ ءتىلى. ەكىنشىدەن، سوراقىسى سول، اتالعان قوعامدىق ورىنداردا جۇرگەننىڭ 95 پايىزى قازاق. وسىنداي باسسىزدىق پەن نامىسسىزدىققا كىم جاۋاپ بەرەدى؟ ءوز مەملەكەتىنىڭ ءتىلىن قۇرمەتتەمەگەن لاۋازىم يەلەرىنەن نە يگىلىك كۇتۋگە بولادى؟ بوگدە ەلدىڭ مۇددەسىن ءوز حالقىنان جوعارى قويعاندار نەلىكتەن جوعارى مانساپتاردا وتىرۋ كەرەك؟ الايدا كىنا وزىمىزدەن دە بار. قازاق ءتىلىن ءوزىمىز نەگە دارىپتەمەيمىز؟ ءتىل زاڭىنىڭ ورىندالۋىن نەگە تالاپ ەتىپ، سوتقا بەرمەيمىز؟ باسقالار بىلاي تۇرسىن، ءوزارا نەگە انا تىلىمىزدە سويلەسىپ جازىسپايمىز؟ ءوز اتتارىمىزدا –وۆ، -ين، -يچ سىقىلدى وتارلىق جالعاۋلاردان قاشان ارىلامىز؟ رەسەيدىڭ گۋبەرنياسى ەمەس، بۇل ءور دە ازات قازاقتىڭ ەلى ەكەنىن نەگە كورسەتپەيمىز؟"