ق ر پرەمەر-مينيسترى باقىتجان ساعىنتايەۆ ۇكىمەت وتىرىسى بارىسىندا 28ء-شى بۇكىلالەمدىك قىسقى ۋنيۆەرسيادانى وتكىزۋ قارساڭىندا جاۋاپتى مەملەكەتتىك ورگاندار مەن ۆەدومستۆولارعا ءبىرقاتار تاپسىرمالار بەردى.

پرەمەر-مينيستر ۋنيۆەرسياداعا ازىرلىكتىڭ سوڭعى كەزەڭى ءجۇرىپ جاتقانىن جانە وسىعان بايلانىستى ۇيىمداستىرۋشىلىق جانە قاۋىپسىزدىكتى قامتاماسىز ەتۋ ماسەلەلەرىنە ەرەكشە نازار اۋدارۋ قاجەت ەكەنىن اتاپ ءوتتى.

الماتى اكىمدىگىنە ينۆەستيسيالار جانە دامۋ مينيسترلىگىمەن جانە باسقا دا مۇددەلى مەملەكەتتىك ورگاندارمەن بىرلەسە وتىرىپ قاۋىپسىزدىك تالاپتارى مەن ستاندارتتارىنا سايكەس ۋنيۆەرسيادانىڭ جاڭا نىساندارىنىڭ جۇمىسى مەن كولىك لوگيستيكاسىنىڭ بارلىق ماسەلەلەرىن ەگجەيلى-تەگجەيلى پىسىقتاۋ ماسەلەسى تاعى ءبىر تاپسىرىلدى.

ىشكى ىستەر مينيسترلىگىنە ادامدار كوپتەپ جينالاتىن نىسانداردا، قوناق ۇيلەردە، سونداي-اق باسقا دا قوعامدىق ورىندار مەن قالا كولىكتەرىندە ءورت قاۋىپسىزدىگى جاعدايىنا باقىلاۋدى كۇشەيتۋ تاپسىرىلدى.

«جالپى، ءىىم قوعامدىق ءتارتىپتىڭ ساقتالۋىن قامتاماسىز ەتۋ بويىنشا بارلىق ماسەلەلەردى پىسىقتاۋدى تاپسىرامىن»، - دەدى ب. ساعىنتايەۆ.

سونىمەن قاتار، اقپارات جانە كوممۋنيكاسيالار مينيسترلىگىنە اقپاراتتىق-يميدجدىك جۇمىستارعا ەرەكشە نازار اۋدارۋ تاپسىرىلدى. بۇل جارىستاردى، جاڭالىقتار بلوكتارىن ترانسلياسيالاۋعا دا، جۋرناليستەردىڭ جۇمىسىن قامتاماسىز ەتۋگە دە قاتىستى.

ق ر دەنساۋلىق ساقتاۋ جانە الەۋمەتتىك دامۋ مينيسترلىگىنە ۋنيۆەرسيادا كەزىندە مەديسينالىق قىزمەت كورسەتۋدى تۇراقتى باقىلاۋدا ۇستاۋ تاپسىرىلدى.

«بارلىق مينيسترلىكتەر مەن ۆەدومستۆولاردىڭ باسشىلارىنان ات سالىسىپ،  قاجەتتى كومەكتى كورسەتۋلەرىن سۇرايمىن»، - دەپ ناقتىلادى ب. ساعىنتايەۆ.