باقىتجان ساعىنتايەۆ قازاقستاندىق كينويندۋستريانى دامىتۋعا قاتىستى ءبىرقاتار تاپسىرمالار بەردى
ق ر پرەمەر-مينيسترى باقىتجان ساعىنتايەۆ ۇكىمەت وتىرىسى بارىسىندا ساپالى قازاقستاندىق كينونى ءتۇسىرۋ جانە شالعايداعى ەلدى مەكەندەردە كينوزالدار سالۋ قاجەتتىگىن ايتتى.
بۇگىن ۇكىمەت وتىرىسى اياسىندا «كينەماتوگرافيا تۋرالى» زاڭ، سونداي-اق كينەماتوگرافيانى دامىتۋ تۇجىرىمداماسى ۇسىنىلدى، بۇل قۇجاتتاردا وتاندىق كينويندۋستريانىڭ ودان ءارى دامۋىنىڭ نەگىزگى باعىتتارى كورسەتىلگەن.
سونىمەن قاتار وتىرىس بارىسىندا بولاشاق قازاقستاندىق كينەماتوگرافيا تۋرالى وسى سالاداعى بەلگىلى ونەر يەلەرى ءوز پىكىرلەرىمەن ءبولىستى. ولاردىڭ اراسىندا حالىق ءارتىسى ءاسانالى ءاشىموۆ، كينورەجيسسەر اقان ساتايەۆ، «مەلومان» كومپانياسىنىڭ باس ديرەكتورى ۆاديم گولەنكو، رەجيسسەر رۇستەم ابدىراشيەۆ، «ارمان» كينوتەاترلار جەلىسىنىڭ ديرەكتورى باۋىرجان شۇكەنوۆ، قازاقستان كينەماتوگرافيستەرىنىڭ ءتوراعاسى اقان يبرايەۆ، رەجيسسەر جانە پروديۋسەر راشيد نۇعىمانوۆ بار.
ءسوز سويلەگەندەردى تىڭداعان سوڭ پرەمەر-مينيستر كينوتەاترلارعا كورەرمەندەردى كوپتەپ تارتۋ ءۇشىن جوعارى ساپالى فيلمدەر ءتۇسىرۋ قاجەتتىگىن اتاپ ءوتتى. سونىمەن قاتار ول اسىرەسە، شالعايداعى ەلدى مەكەندەردە كينوزالدار سانانىڭ جەتكىلىكسىزدىگىنە نازار اۋداردى. وسىعان بايلانىستى ب.ساعىنتايەۆ اسىرەسە، مونو- جانە شاعىن قالالاردا وسى سالاعا بيزنەستى تارتۋ تەتىكتەرىن ويلاستىرۋدى تاپسىردى.
پرەمەر-مينيستر ءوزىنىڭ ورىنباسارى ي. تاسماعامبەتوۆكە بارلىق مۇددەلى تاراپتارمەن بىرلەسە وتىرىپ كينەماتوگرافتى دامىتۋ تۇجىرىمداماسى مەن زاڭ جوباسىن تالقىلاپ، ولاردى ۇكىمەت قاراۋىنا ۇسىنۋدى تاپسىردى.
پىكىر قالدىرۋ