قۇرمەتتى، اسقار مىرزاحمەت ۇلى! مەن تۇرلىبەكوۆ باقداۋلەت الماتى وبلىسى، پانفيلوۆ اۋدانى، قوڭىرولەڭ اۋىلىنىڭ تۇرعىنىمىن. سىزگە حات جازىپ، كومەك سۇراۋىمنىڭ باستى سەبەبىن ايتسام،  2015 جىلدىڭ تامىز ايىندا «سىباعا» باعدارلاماسى بويىنشا ەتتى باعىتتاعى جاس مالداردى ءوسىرۋ ءۇشىن ءىرى قارا (انالىق مال) مەن تۇقىمدىق بۇقالاردى ساتىپ الۋعا 15 ميلليون 320 مىڭ نەسيە العانمىن.  15 ميلليون 320 مىڭنىڭ العاشقى قايتارىمىن 2016 جىلدىڭ  5ء-شى تامىزى قۇيدىم. نەگىزگى بورىش وتەمى  900000 تەڭگە،   سىياقى وتەۋ سوماسى ءۇشىن (پروسەنت) 2046240 تەڭگە تولەدىم. «سىباعا» باعدارلاماسىنىڭ شارتىندا جازىلعانداي، سىياقى مولشەرىنىڭ 7%، دالىرەك ايتسام،  1023120 تەڭگە مەنىڭ ەسەبىمە قايتارىلۋى ءتيىس.

وكىنىشكە وراي، سىياقى مولشەرى وسى ۋاقىتقا دەيىن ەسەپشوتىما تۇسپەدى.  نەسيەنى بەرگەن الماتى وبلىسى «قازاگرو قارجى» اق ماماندارىنىڭ ايتۋىنشا،  ۇكىمەتتەن قايتارىلۋى ءتيىس 7% سىياقى قارجىنىڭ جوقتىعىنا بايلانىستى قاشان تۇسەتىنى بەلگىسىز. بۇل ماسەلەنى انىقتاۋ ءۇشىن استانا قالاسىنداعى كەڭسەگە دە قوڭىراۋ شالىپ كوردىم، ءبىراق ول جەردە تۇتقانى كوتەرىپ، جاۋاپ بەرگەن ادام بولمادى. بىزگە ءتۇسۋى ءتيىس قاراجاتتىڭ  قاشان تۇسەتىنىن ناقتى ەشكىم ايتا المايدى. 2017 جىلدىڭ اقپان ايىنىڭ 6-شى جۇلدىزى تاعى دا 996800 تەڭگە سىياقى مولشەرىن تولەۋگە مىندەتتىمىن.

كەلىسىمشارت بويىنشا، ءبىز نەسيە قايتارىمىن 14 % قۇيامىز، ونىڭ 7 % ۇكىمەت قايتارۋعا مىندەتتى دەلىنگەن.  سوندا ۇكىمەتكە قالتامىزدان قۇيىپ وتىرعان 7% سىياقىنى الا الماي وتىرعانىمىز قالاي؟!

الداعى اقپان ايى تاعى سىياقى پايىزىن تولەيتىنىمدى جوعارىدا ايتتىم. ءبىرىنشى قۇيعان قارجىنىڭ جارتىسىن قايتارماي وتىرعان ۇكىمەتكە نەسيەمدى تولەمەسەم، پايىزى وسكەن ۇستىنە وسە بەرمەك. سوندا اۋىل شارۋاشىلىعىن دامىتىپ، مال ءوندىرىپ وتىرعان بىزدەي شارۋا قوجالىقتارىنىڭ جاعدايىن كىم ويلايدى؟!  «سىباعا» باعدارلاماسىمەن نەسيە الىپ وتىرعان تالاي شارۋا قوجالىقتارىنا ءوز سىباعاسىنىڭ بۇيىرماي وتىرعانى الاڭداتادى.  ءبىرىنشى سىياقىنىڭ پايىزىن الماي تۇرىپ، ەكىنشى سىياقىنىڭ بورىشىن قالاي وتەمەكپىز؟!     

ەت ەكسپورتى باعىتىنداعى جۇمىستاردى جۇيەلەۋگە ارنالعان «سىباعا» باعدارلاماسى قاراپايىم ەڭبەك ادامى ءۇشىن نەگىزگى تىرلىكتىڭ كوزىنە اينالدى دەپ قۋانعان ەدىك، ەندى ءوز قالتامىزدان قۇيعان اقشانى قاشان الاتىنىمىزدى بىلمەي، شاراسىز حالدە وتىرمىز.

وسى ماسەلە بويىنشا بىرنەشە جەرگە حابارلاسىپ، ءجونى ءتۇزۋ ءبىر جاۋاپ الا الماعاندىقتان،  تالاي قازاقتىڭ مۇڭ-مۇقتاجىن ايتىپ جۇرگەن  «قامشى» پورتالى ارقىلى وزىڭىزگە حات جازىپ وتىرمىن. اتالعان ماسەلەنى ءوز قاراۋىڭىزعا الىپ، وڭ شەشىم تاۋىپ بەرەسىز دەگەن سەنىمدەمىن!