وبلىس باسشىسى ۇلىستىڭ ۇلى كۇنىن باۋىرلاس ەلدەرگە بارىپ تا تويلاۋ كەرەكتىگىن ۇسىندى، دەپ حابارلايدى «ءتىلشى». مادەنيەت سالاسىنىڭ قىزمەتكەرلەرىمەن كەزدەسۋىندە بەردىبەك ساپاربايەۆ جىل باسىن، ماسەلەن، ورىنبور قالاسىندا، تاتارستان مەن باشقۇرتستاندا، ءتىپتى، سوناۋ قاراقالپاقستاندا تويلاۋ كەرەكتىگىن دە ايتتى.
«ول جاقتاردا دا ءبىزدىڭ قانداستارىمىز بار. سول وڭىرلەردە نەگە ناۋرىز مەيرامىن اتاپ وتپەسكە؟! باۋىرلارىمىز ءبىر قۋانىپ قالادى عوي. قازاقتىڭ ءسالت-داستۇرىن كورسەتۋىمىز كەرەك. تاتارستاندا دا، العاشقى استانامىز بولعان ورىنبور قالاسىندا دا قانداستارىمىز از ەمەس. تاۋەلسىزدىك العان جىلدارى قانداي جەتىستىكتەرگە قول جەتكىزدىك، سونى كورسەتە ءبىلۋ كەرەك قوي. پاش ەتۋىمىز كەرەك»، — دەدى وبلىس باسشىسى.
بەردىبەك ساپاربايەۆتىڭ پايىمىنشا، ناۋرىز مەيرامىن مىندەتتى تۇردە ناۋرىز ايىندا وتكىزۋ كەرەك ەمەس.
«كۇن رايىنا قاراي، ءساۋىر نەمەسە مامىر ايىندا دا تويلاۋعا بولادى. تەك ءۇش-تورت ادام جىبەرىپ وتكىزدىك دەپ ەسەپ بەرۋگە بولمايدى. بارلىق ءسالت-داستۇرىمىزدى، تاريحىمىزدى كورسەتەيىك»، — دەدى وبلىس باسشىسى.
ايتا كەتەيىك، وتكەن جىلى اقتوبەدە ۇلىستىڭ ۇلى كۇنى العاش رەت ءبىر اپتا بۇرىن تويلانا باستادى.
مارات تولەپبەرگەن، «ءتىلشى»
پىكىر قالدىرۋ