«بالاڭدى ەسىڭە ال – اليمەنت تولە» جوباسى اياسىندا 300-دەن استام بورىشكەر جۇمىسقا ورنالاستىرىلدى دەپ حابارلايدى astana.gov.kz.

استانادا «بالاڭدى ەسىڭە ال – اليمەنت تولە» جوباسى اياسىندا 300-دەن استام بورىشكەر جۇمىسقا ورنالاستىرىلدى. سونداي-اق تاعى 9 ادام قىزمەتكە ورنالاسۋ ءۇشىن قاجەتتى قۇجاتتاردى جيناۋدا، 10 ادام كومپانيالاردىڭ جاۋابىن كۇتۋدە، دەپ حابارلادى استانا قالاسىنىڭ پروكۋراتۋراسى.

جوبانىڭ ماقساتى - جۇمىسسىزداردى قىزمەتكە ورنالاستىرۋ ارقىلى اليمەنت تولەمەيتىندەردىڭ سانىن ازايتۋ.

جۇمىسپەن قامتۋ باسقارماسىندا قىزمەت ىستەۋگە نيەت تانىتقان جۇمىسسىز بورىشكەرلەردىڭ (بىلىكتى ەلەكتريكتەر، سانتەحنيكتەر، ەكونوميستەر مەن زاڭگەرلەر) ءتىزىمىن ازىرلەدى.

بۇل باستامانى استانالىق قۇرىلىس كومپانيالارى قولداپ، اليمەنت تولەمەگەن 700 بورىشكەردى قىزمەتكە الۋدى ۇسىندى. بورىشكەرلەردى جۇمىسقا قابىلداۋ پروسەدۋراسى باستالدى. ولاردىڭ جالاقىلارى 100 مىڭ مەن 200 مىڭ تەڭگە شاماسىندا بولماق.

ادىلەت دەپارتامەنتى عيماراتىنداعى جۇمىس توبى كۇن سايىن تۇرعىنداردى قابىلداپ، بورىشكەرلەردىڭ مەكەن-جايلارى بويىنشا رەيد جۇرگىزەدى. سونداي-اق قارىزىن تولەۋدەن جالتارىپ جۇرگەندەردى ىزدەستىرۋ شارالارى ۇيىمداستىرىلادى.  بورىشكەرلەردەن 23 ملن تەڭگەدەن استام قارجى ءوندىرىپ الىندى، كامەلەتتىك جاسقا تولماعان بالالارىنا بەرىلدى، 45ء-ى اكىمشىلىك جاۋاپكەرشىلىككە تارتىلدى.