Facebook الەۋمەتتىك جەلىسىندە قازاقستاندىق دۇكەندەردىڭ بىرىندە ساتىلىمدا تۇرعان جۇكتى باربي ويىنشىعىنىڭ فوتوسى جاريالاندى. ەكى قابات قۋىرشاقتىڭ ساتىلىمىنا جەلى قولدانۋشىلارى ءوز نارازىلىعىن ءبىلدىرىپ جاتىر. ماسەلەنىڭ دۇرىس-بۇرىستىعىن ءبىلۋ ءۇشىن پسيحولوگ مامانعا حابارلاسۋدى ءجون كوردىك. پسيحولوگيا عىلىمدارىنىڭ دوكتورى مەيىرىم ەركىنبەكوۆا اتالمىش ويىنشىقتار بالانىڭ ەرتە ەسەيۋۋىنە الىپ كەلەتىنىن ايتادى.

«جۇكتى قۋىرشاقتاردى ساتۋ دۇرىس ەمەس. بۇعان توسقاۋىل قويۋ كەرەك. سەبەبى ول بالا پسيحولوگياسىنا كەرى اسەرىن بەرەدى. بالانىڭ پسيحولوگياسى ويىن ارقىلى قالىپتاسادى، ويىنشىقپەن ويناۋ ارقىلى دۇنيەنى تانيدى، سىرتقى ورتانى قابىلدايدى. جۇكتى باربي قۋىرشاقتارىن كورگەننەن كەيىن، بالانىڭ جىنىستىق تانىمى ەرتە داميدى. بۇل قىزداردىڭ ەرەسەك ومىرگە ەرتە ارالاسىپ، ەرتە جۇكتى بولۋىنا الىپ كەلەدى. سوندىقتان بالاعا ويىنشىق الىپ بەرەردە مۇقيات قاراۋ كەرەك» دەيدى مامان.

بەيكۇنا بالا الەمدى ءتۇرلى تۇستە كورەدى. وندا ارامدىق، جاماندىق، ساتقىندىقتى بىلمەيتىن،  بالانىڭ قايدان دۇنيەگە كەلەتىنىنەن بەيحابار ءبۇلدىرشىندى ەرتە ەرەسەك ومىرگە ارالاستىرۋ ونىڭ پاك كوزقاراسىن، كىرشىكسىز تازا دۇنيەتانىمىن لاستاۋمەن پارا-پار.

بارلىعى ءوز ۋاقىتىمەن بولعانى ابزال. سەبەبى ءومىر ۋاقىت وتە كەلە بارلىعىن ءوز ورنىنا قويادى.