الماتى وبلىسىندا ءىشى اۋىرىپ، اۋرۋحاناعا ءتۇسىپ، ارتىنشا قايتىس بولعان بالانىڭ اتا-اناسى ادىلدىك ىزدەيدى. بالاسىنان ايىرىلعان جاندار جاۋاپتى ماماندار ءادىل جازادان قۇتىلىپ كەتەدى مە دەپ ۇرەيلەنەدى. سەبەبى، دارىگەرلەردىڭ ءوزى ولاردان بالانىڭ ءولىمى جايلى شۋ شىعارماۋدى ءوتىنىپ، ءوزارا كەلىسەيىك دەپ تە ۇسىنىس جاساعان. بۇل تۋرالى قازاقپارات.

وقيعا كوكسۋ اۋدانىنداعى اۋرۋحانادا بولعان. 12 قاڭتار كۇنى بالانىڭ اناسى گۇلزيرا شاكەن ۇلىمەن اۋرۋحاناعا تۇسەدى. اناسىنىڭ سوزىنشە، ءۇش كۇندىك ەمنەن كەيىن بالانىڭ بەتى بەرى قاراپ، جاعدايى جاقسارعان. ءتىپتى ءتورتىنشى كۇنى ۇيلەرىنە قايتامىز دەگەن دە ءۇمىت بولعان. الايدا، ءبىر جارىم جاستاعى اقجولدىڭ كۇرە تامىرىنا سالىنعان سيستەمادان كەيىن بالا قايتىس بولدى، دەيدى اتا-اناسى.

«باستاپقىدا بالانىڭ مويىنىنىڭ وڭ جاعىنداعى كۇرە تامىرعا سيستەما سالدى. قان ءۇيىپ قالعان با، بىلمەيمىن. ءدارى جۇرمەدى. سودان كەيىن سول جاق كۇرە تامىرىنا سيستەما سالىپ، ماعان قاراپ وتىرىڭىز دەپ كەتىپ قالدى. قاراسام بالانىڭ موينىنان قان اعىپ جاتىر. جۇگىرىپ، دارىگەرلەردى ىزدەدىم. شامامەن تاڭەرتەڭگى ساعات وندار شاماسى. اس بولمەگە بارسام ءبارى ءشاي ءىشىپ وتىر ەكەن. موينىنان قان كەتىپ جاتىر دەپ ەدىم، بارلىعى جۇگىرىپ كەلدى. ءبىراق قاندى توقتاتا المادى. بالا قانسىراپ ءولدى»، - دەيدى بالانىڭ اناسى گۇلزيرا شاكەن.

اتا-انانىڭ ويىنداعى بار كۇدىك دارىگەرلەر بالانىڭ كۇرە تامىرىن جارىپ جىبەرگەن دەپ سانايدى.   

«مەنىڭ بالام مال ەمەس، كۇرە تامىرعا ينە تىعاتىنداي. ەگەر بالانىڭ جاعدايى اۋىر بولسا، نەگە دارىگەردى وبلىستان شاقىرتپادى. بىزگە وبلىستان دارىگەرلەر كەلەدى دەدى. ءبىراق كەلمەدى. ءبىزدى الدادى» دەيدى، ۇلدىڭ اكەسى اكپار نۇرجۇما.  

دارىگەرلەر بالانىڭ جاعدايى اۋىر بولعانىن ايتىپ وتىر. ءبىراق بالانىڭ وكپەسىنە سۋىق تيگەن دەگەن پىكىرمەن اتا-اناسى مۇلدەم كەلىسپەيدى. ماماندار، جالعان اقپارات بەرىپ جاتىر دەپ نارازى. ءتىپتى اقجولدىڭ اۋىرعانداعى قۇجاتتارىن وزگەرتىپ، وزدەرىنە ىڭعايلى ەتىپ جاتىر دەگەن سەنىمدە. ال كوز جۇمعان اقجولدى ەمدەگەن دارىگەر-انەستەزيولوگ ۆلاديمير كيم بالانىڭ ءومىرىن ساقتاپ قالۋعا تىرىستىق دەيدى.

1،5 جاستاعى ۇلدارىنىڭ ءولىمى اتا-انانىڭ جۇرەگىن قان جىلاتتى. ولار اقجولدىڭ دۇنيەگە كەلگەنىن 10 جىل بويى كۇتكەن. ەندى ولار جاۋاپتى دارىگەرلەر جاۋاپكەرشىلىكتەن قۇتىلىپ كەتەدى مە دەپ قورقادى. سوتقا جۇگىنگەلى وتىرعان اتا-انا كوكسۋ اۋداندىق اۋرۋحاناسىنىڭ دارىگەرلەرى ءادىل جازاسىن السا دەپ تىلەيدى.