قازاقستان رەسپۋبليكاسى پرەمەر-مينيسترىنىڭ ورىنباسارى يمانعالي تاسماعامبەتوۆتىڭ تورالاعىلىعىمەن الماتى قالاسىندا وتەتىن 2017 جىلعى 28ء-شى دۇنيەجۇزىلىك قىسقى ۋنيۆەرسياداعا دايىندىق بارىسى جونىندە كەڭەس ءوتتى. قازاقستان رەسپۋبليكاسىنىڭ سپورتشىلارى العاش رەت ۋنيۆەرسيادا باعدارلاماسىنا ەنگەن سپورتتىڭ بارلىق ءتۇرى بويىنشا سايىسقا تۇسەدى. سونىمەن قاتار قازاقستان تاراپىنان قاتىساتىن 250 سپورتشىنىڭ ءتىزىمى جيناقتالىپ، كەلىسىلدى. ولاردىڭ بارلىعى جيناقتالىپ، سايىسقا ءازىر تۇر. 

«ءبىز 28ء-شى دۇنيەجۇزىلىك قىسقى ۋنيۆەرسياداعا دايىندىق بارىسى جونىندە ماسەلەنى، ونىڭ ىشىندە ستۋدەنتتىك كوماندالاردىڭ وقۋ-جاتتىعۋ جيىنىن وتكىزۋ قورىتىندىسىن، FISU كونفەرەنسياسىن ۇيىمداستىرۋ جانە ۇلتتىق قۇراما كوماندانى پارادتىق سپورت كيىمدەرىمەن قامتاماسىز ەتۋ ماسەلەلەرىن قاراستىرامىز». ۋنيۆەرسياداعا دايارلىق اياسىندا 12 قىسقى سپورت تۇرىنەن 26 وقۋ-جاتتىعۋ جيىنى ۇيىمداستىرىلدى جانە وتكىزىلدى. ونىڭ ىشىندە كەرنينگ، شايبالى حوككەي، كونكي تەبۋ سپورتى، مانەرلەپ سىرعاناۋ، شورت-ترەك، بياتلون، شاڭعى جارىسى، شاڭعىمەن ترامپليننەن سەكىرۋ، تاۋ شاڭعىسى، فريستايل (اكروباتيكا)، سنوۋبورد جانە شاڭعى قوس سايىسى بار. وعان 32 جوعارى وقۋ ورنى مەن 5 كوللەدجدەن 137 سپورتشى قاتىستى.

سونداي-اق 2-5 اقپان كۇندەرى «ۋنيۆەرسيتەتتىك سپورت: قوعامنىڭ دەنساۋلىعى مەن بولاشاعى» تاقىرىبىندا ۋنيۆەرسيادا باعدارلاماسىنىڭ رەسمي بولىگى سانالاتىن FISU قىسقى كونفەرەنسياسى وتەدى.  شاراعا الەمنىڭ 30 ەلىنەن ۇلتتىق ستۋدەنتتىك فەدەراسيالاردىڭ پرەزيدەنتتەرى، جوو-نىڭ رەكتورلارى، الەمدىك قاۋىمداستىقتاعى جەتەكشى عالىمدار مەن ماماندار قاتىسادى دەپ كۇتىلۋدە. ايتا كەتەيىك، ۋنيۆەرسيادانىڭ باستى مىندەتى – ۋنيۆەرسيتەتتەردە سپورتتى دامىتۋ، جاستار اراسىندا سالاۋاتتى ءومىر سالتىن قالىپتاستىرۋ.