ءماجىلىس دەپۋتاتى باقىتگۇل حامەنوۆا پارلامەنت پالاتالارىنىڭ بىرىككەن وتىرىسىنداعى سوزىنەن كەيىن جەلى قولدانۋشىلارىنىڭ پىكىرىن كوڭىلىنە المايتىنىن جەتكىزدى، دەپ حابارلايدى «قامشى» پورتالى.
وسىدان بۇرىن ءماجىلىس دەپۋتاتى باقىتگۇل حامەنوۆا استاناعا نۇرسۇلتان نازاربايەۆتىڭ ەسىمىن بەرۋ جايىندا ۇسىنىس جاساعان ەدى، بۇل ۇسىنىسىنان كەيىن جەلى قولدانۋشىلارىنىڭ مازاعىنا اينالدى.
الايدا، حامەنوۆا حانىم رايىنان قايتار ەمەس. بۇل جولى دەپۋتات حالىقارالىق اۋەجايعا نازاربايەۆتىڭ ەسىمىن بەرۋ ماسەلەسىن كوتەردى. كەيىننەن جەلىدە ونىڭ سويلەگەن ءسوزىن سولتۇستىك كورەيانىڭ جۇرگىزۋشى-ديكتورلارىمەن سالىستىرعان ۆيدەولار تارادى.
«مەن ەكى مارتە ماسليحات دەپۋتاتى بولىپ سايلاندىم، بۇگىن ماجىلىستەمىن. ءبارىمىز ەت پەن سۇيەكتەن جارالعانبىز. ارينە، بۇل قىلىقتارى كوڭىلىمە تيگەنىن مويىندايمىن. حالىق مەنى دۇرىس تۇسىنبەگەن سەكىلدى. مەن جاستىققا كوز جاسىمدى مالىپ جىلادىم دەپ ايتا المايمىن. تەك اراداعى تۇسىنىسپەۋشىلىك كوڭىلىمە ءتيدى. ءبىراق، ۋاقىت – ەمشى»، - دەدى حامەنوۆا تىلىشىلەرگە بەرگەن سۇحباتىندا.
«مەن ەلباسىن سۇيەمىن. پرەزيدەنتپەن «كوزىمدى اشتىم». تاۋەلسىز قازاقستاننىڭ ۇرپاعىمىن. نەگە مەن پرەزيدەنتىمىزگە جۇرەكجاردى ءسوزىمدى ايتا المايمىن؟ اركىمنىڭ ءوز پىكىرى بولۋى كەرەك جانە سەن بۇلاي ويلاي المايسىڭ دەپ ەشكىمگە تىيىم سالا المايسىڭ. ءسىز ءتىلشى رەتىندە «ءبىزدىڭ تاۋەلسىز مەملەكەتتە ءومىر ءسۇرۋىمىز بىرىنشىدەن، اللانىڭ ارقاسى بولسا، ەكىنشىدەن، ءبىزدىڭ دانا ەلباسىمىزدىڭ ارقاسى» دەپ ايتا الاسىز با؟»، - دەپ پىكىرىن ءبىلدىردى دەپۋتات.
ءماجىلىس دەپۋتاتى نۇرلان ءابدىروۆ ايتقانداي، استانانىڭ اتىن اۋىستىرۋ ماسەلەسى جازباشا تۇردە ۇسىنىلماعاندىقتان كونستيتۋسياعا ەنگىزىلمەك وزگەرىستەردى تالقىلاۋ بارىسىندا قارالماعان بولاتىن.
بۇدان بۇرىن استانانى «نۇرسۇلتان» نەمەسە «نازاربايەۆ» دەپ دەپۋتاتتار تاراپىنان وزگەرتۋ ماسەلەسى تالقىلانعان. الايدا، پرەزيدەنت حالىق پەن دەپۋتاتتارعا شەكسىز العىسىن ءبىلدىرىپ، بۇل ويدان باس تارتۋلارىن ەسكەرتكەن.
