تۇرىك پوليسەيلەرى رەسەيدىڭ تۇركياداعى ەلشىسى بولعان اندرەي كارلوۆتىڭ ولىمىنە قاتىسى بار دەگەن كۇدىكپەن رەسەيلىك ب.ەكاتەرينانى تۇتقىندادى دەپ حابارلايدى A Haber تەلەارناسى.
ول وتكەن جىلدىڭ قاراشا ايىندا ەلشىنى ولتىرگەن مەرت التىنشاشپەن جانە انكاراداعى رەسەيلىك مادەنيەت ورتالىعىمەن تەلەفون ارقىلى سويلەسكەن. تەرگەۋ بارىسىندا ول التىنشاشپەن كوبىنە مەسسەندجەر ارقىلى حات جازىسىپ تۇرعانىن مويىندادى.
33 جاستاعى ەكاتەرينا قوناق ۇيلەردە ايەلدەردى ءىرى كاسىپكەرلەرمەن كەزدەستىرىپ انكارادا جەڭگەتايلىقپەن اينالىسقان. ول كەزدەسۋلەردى ەكى سايت ارقىلى جۇزەگە اسىرىپ وتىرعان.
ءقازىر رەسەيلىك ايەل سوتتىڭ شەشىمىمەن انكارا تۇرمەسىندە جاتىر. رەسەي ەلشىلىگى باق-تا اندرەي كارلوۆتىڭ ولىمىنە قاتىسى بار دەگەن كۇدىكپەن ۇستالعان رەسەيلىك ايەلگە قاتىستى جاريالانعان اقپاراتتىڭ ناقتىلىعىن ءبىلۋ ءۇشىن رەسمي ساۋال جولدادى.
«ەلشىنىڭ ولىمىنەن كەيىن ەكى جاق بىرىگىپ تەكسەرۋ جۇمىستارىن باستادى. انكاراعا رەسەيدىڭ تەرگەۋ توبى كەلگەن. تەكسەرۋ بارىسىندا رەسەي مەن تۇركيا ازاماتتارى ۇستالدى، تەرگەلدى» دەيدى رەسەيدىڭ تۇركياداعى ەلشىلىگىنىڭ باسپاسوز-اتتاشەسى يرينا كاسيموۆا.
ەستەرىڭىزگە سالا كەتەيىك، اندرەي كارلوۆ 2016 جىلدىڭ 19 جەلتوقسانىندا انكاراداعى فوتو كورمەنىڭ اشىلۋىندا كىسى قولىنان قازا تاپقان. وعان وق اتقان بۇرىنعى پوليسەي مەرت التىنشاش سول جەردە ءولتىرىلدى. رف ءسىم بولعان جاعدايدى تەراكتى دەپ اتاپ، قىلمىستىق ءىس قوزعادى.
