نەكەلى ءتورت ايەلى بار قاراعاندىلىق ازامات قۋانىش حانتورە 8 ناۋرىز مەرەكەسىندە ايەلدەرىنە قانداي سىي جاسايتىنىن ايتتى، دەپ حابارلايدى Baq.kz اگەنتتىگىنىڭ قاراعاندىداعى ءتىلشىسى.
قاراعاندى وبلىسىنىڭ شەت اۋدانىندا تۇراتىن قۋانىش حانتورە شاريعات جولىمەن ءتورت ايەلگە ۇيلەنگەن. ەلۋدىڭ بەل ورتاسىنا كەلىپ قالعان قۋانىش حاميت ۇلى بۇگىندە ۇلكەن شاڭىراقتىڭ وتاعاسى بولىپ وتىرعان جايى بار.
قۋانىش حانتورە بايبىشەسىمەن 1986 جىلى 22 جاسىندا وتاۋ قۇرىپ، التى بالانىڭ اكەسى اتانادى. وسىدان كەيىن 2001 جىلى ەكىنشى رەت ۇيلەنۋگە بەل بۋعان وتاعاسى تۋعان-تۋىستارىنىڭ قارسىلىعىنا قاراماستان وزىنەن 17 جاس كىشى قىزبەن نەكەلەسەدى. ەكىنشى ايەلىنەن التى بالا سۇيگەن وتاعاسى شەت اۋدانىنىڭ ورتالىعىنان ەڭسەلى ءۇي تۇرعىزىپ، ەكى ايەلىمەن سول ۇيدە قونىستانادى. 2006 جىلى ءتورت بالامەن جەسىر قالعان ايەلمەن نەكەلەسىپ، بالالارىن باۋىرىنا باسقان. سول جىلدارى شارۋا قوجالىعىن اشىپ، مال شارۋاشىلىعىمەن اينالىسقان قۋانىش حانتورە ءۇشىنشى ايەلىنىڭ وتاۋىن وسى قىستاققا تىگەدى. 2014 جىلى قۋانىش حاميت ۇلى ەكى بالامەن جەسىر قالعان دوسىنىڭ ايەلىنە ءتورتىنشى رەت ۇيلەنەدى. ءتورتىنشى ايەلىن قۋانىش ەكىنشى قىستاققا ورنالاستىرادى. ىنتىماعى جاراسقان، ونەگەلى وتباسىنىڭ اسىراۋشىسى، وتاعاسى قۋانىش حانتورە بۇگىندە اۋىل-ايماققا، تۋعان-تۋىسقا سىيلى ازامات. حالىقارالىق ايەلدەر مەرەكەسىنىڭ قارساڭىندا قۋانىش اعاعا حابارلاسىپ، ايەلدەرىنە قانداي سىي جاسايتىنىن سۇراپ بىلگەن ەدىك.
«بۇل مەرەكەنىڭ ماقساتى ايەلدەردىڭ، انالاردىڭ كوڭىلىن كوتەرۋ، ولارعا ىقىلاس ءبىلدىرۋ دەپ ويلايمىن. ال، وزىمە كەلەتىن بولسام ايەلدەرىمە ەڭ ءبىرىنشى جىلۋلىق سىيلايمىن. ولاردى بالالارىمنىڭ اناسى، جالپى قازاقتىڭ، ەلدىڭ اناسى دەپ قۇرمەتتەپ، مەرەكەدە وزگەشە كوڭىل بىلدىرەمىن»، - دەيدى قۋانىش حانتورە.
ءتورت ايەلىنەن 16 بالا، جيىرماعا تارتا نەمەرە سۇيگەن قۋانىش حاميت ۇلى بويىنداعى جىلۋلىقتىڭ ايەلدەرىنە، بالالارى مەن باۋىرلارىنا دا جەتەتىنىن ايتادى.
«اللا «وزىمە ۇقساتىپ جاراتتىم ادامزاتتى» دەگەن ەكەن. ادامنىڭ بويىندا ۇلكەن رۋحاني قۋات بار ەكەن. مەنىڭ دە بويىمداعى جىلۋلىق ايەلدەرىمە، بالالارىما، باۋىرلارىما جەتەدى. قازاق جەسىرىن جىلاتپاعان، جەتىمىن جاۋتەڭدەتپەگەن - حالىق. مەنىڭ ەكى ايەلىم جەسىر، ولاردىڭ ءتورت بالاسىنا قامقورلىق كورسەتەمىن. شامام كەلگەنشە پانا بولۋعا تىرىسامىن»، - دەيدى ءتورت ايەل العان قازاق.
«ايەلدەرىمدى الالامايمىن، ولاردىڭ مىنەز-قۇلقىن، احۋالىن، رۋحاني جاعدايىن، كوڭىلىن بىلەمىن، سوعان قاراي سىيلىق جاسايمىن. بىرەۋگە جىلۋلىق، بىرەۋگە ماحاببات كەرەك، ەندى بىرەۋىنە جىلى سوزدەر ايتامىن. ماتەريالدىق تۇرعىدا دا سىيلىقتار جاسايمىن. ولارعا ەرىم بار، ازاماتىم بار دەپ مارقايىپ، ەڭسەسى كوتەرىلەتىندەي سىيلىق جاساۋعا تىرىسامىن. وسىلايشا ءاربىر ايەلىمدى قۋانتامىن»، - دەيدى قۋانىش حاميت ۇلى.
وسىنداي ۇلكەن وتباسىنىڭ وتاعاسى ايەلدەرمەن قاتار انالاردى دا مەرەكەمەن قۇتتىقتايتىنىن ايتادى.
«قازاقتىڭ قاسيەتى، دانا انالارى كوپ بولعان. بۇگىنگى ۇرپاق، قىزدارىمىز، ايەلدەرىمىز سول انالارداي ەل اناسى بولسىن دەگەن تىلەگىمدى ايتقىم كەلەدى. انالارىمىز امان بولسىن!»، - دەگەن تىلەگىن جەتكىزدى قۋانىش حانتورە.
قۋانىش حانتورەنىڭ 89 جاستاعى اناسى وزىمەن بىرگە تۇرادى. ءتورت ايەلدىڭ ءبىر وتباسىندا ءتاتۋ-تاتتى تۇرىپ، شاڭىراعىنىڭ شايقالماي، ءتۇتىنىنىڭ ءتۇزۋ شىعۋىنا وسى اسىل انانىڭ دا سەپتىگى تيەتىن بولار.
